Cənnət misallı Masallı

Yox, bu bənzətmədə heç bir mübaliğə yoxdur. Talış dağlarının ətəklərinə sığınan, dağlı-aranlı kəndləri olan bu rayonda 212 min əhali yaşayır. Yaz-yay aylarında Masallının qonaqları daha çox olur. Çünki burada fəaliyyət göstərən 31 turizm obyektindən 27-si müvafiq lisenziya əldə edə bilmişdir. Ötən il rayona gələn 21200 turistdən 932 nəfəri xarici ölkə vətəndaşları olmuşdur. Son 2 ildə Azərbaycanda ilk dəfə olaraq Masallıda keçirilən Beynəlxalq Folklor Festivalı cənnət misallı Masallıya böyük inam və etibardan xəbər verir. 2013-cü il iyunun 12-dən 15-nə kimi burda keçirilən III Masallı Beynəlxalq Folklor Festivalı Ümummilli Lider Heydər Əliyevin 90 illik yubileyinə həsr olunmuşdur. Azərbaycanla bərabər Türkiyə, İran, Rusiya, Latviya, Qazaxıstan, Gürcüstan, Ukrayna, Dağıstan folklor kollektivlərinin iştirak etdiyi bu festival bu il də həmin tarixdə yenə Masallıda keçiriləcək.

Ölkə Prezidenti Masallıda

4 sentyabr 2013-cü ildə Azərbaycan Prezidenti cənab İlham Əliyevin Masallıda olması bir çox mətləblərdən xəbər verir. Bu rayona xüsusi marağı olan prezident burda bir sıra sosial-mədəni obyektlərin açılışında iştirak etmişdir. Heydər Əliyev Mərkəzi, Nizami Gəncəvi adına Mədəniyyət Mərkəzi, YAP Masallı rayon təşkilatının inzibati binası, Taekvando və Boks mərkəzləri İlham Əliyevin iştirakı ilə açılmışdır. Prezident Heydər Əliyev parkına, Heydər Əliyev meydanına, Qəhrəmanlar parkına da baş çəkməyə vaxt tapmışdır.

Azərbaycan Prezidenti Masallıda aparılan abadlıq-quruculuq işlərindən razı qalmışdır. O sakinlərlə görüş zamanı onlar tərəfindən qaldırılmış bütün təklifləri dəstəkləmiş və müvafiq tədbir görmüşdür. Rayonun sosial-iqtisadi inkişafının daha da sürətlənməsi, Masallı Tarix Diyarşünaslıq Muzeyinin, Uşaq İncəsənət Məktəbinin tikintisi, uzunluğu 23,8 kilometr olan kəndarası yolların çəkilməsi məqsədi ilə 10,7 milyon manat vəsait ayrılmışdır. Bütün bunlar Masallı rayonuna, onun sakinlərinə Prezident İlham Əliyevin diqqətinin, qayğısının nəticəsidir.

"Torpağa düşməsin havayı bir dən"

Masallının torpaq sahələri az olsa da, münbit və bərəkətlidir. 2013-cü ildə masallılılar 7604 hektar buğda sahəsindən 17895 ton, 2430 hektar arpa sahəsindən 70299 ton məhsul götürmüşlər. Sahibkarlığın inkişaf etdirilməsi də Masallıda əsas diqqət mərkəzində olan məsələlərdəndir. Bu məqsədlə Sahibkarlığa Kömək Milli Fondu tərəfindən Masallıda fəaliyyət göstərən 80 sahibkara 3 milyon 212 min manat güzəştli kredit verilmişdir. Bakı şəhərində təşkil edilmiş kənd təsərrüfatı məhsullarının satışı yarmarkalarında Masallı sahibkarları yaxından iştirak etmişlər. Yarmarkalara 265 ton tərəvəz, 112 ton kartof, 4 ton mal və quş əti, 10 ton noxud və digər kənd təsərrüfatı məhsulları göndərilmişdir.

Çörəyi torpaqdan çıxan masallılılar heyvandarlığa da həmişə böyük önəm vermişlər. Ona görə də bu gün bu rayonda iribuynuzluların sayı 73644-ə, xırdabuynuzluların sayı isə 83098-ə çatdırılmışdır.

"Yeniləşən Azərbaycana yeni məktəb"

Masallı rayonunda, eləcə də ölkəmizin müxtəlif şəhərlərində bu rayondan pərvazlanmış ziyalılar çoxdur. Onlar rayonun bütün tədbirlərində həmişə yaxından iştirak edirlər. Məktəb partasından başlanan bu uğurların davamlı olması üçün bu gün Masallı rayonunda "Yeniləşən Azərbaycana yeni məktəb" devizi altında Heydər Əliyev Fondunun təşəbbüsü ilə 34 məktəb binası tikilmiş, 5 məktəb binası əsaslı təmir edilmişdir.

2013-cü ildə isə 5 məktəb - 640 şagird üçün Xıl, 360 şagird üçün Öncəqala, 220 şagird üçün Kəlbəhüseynli, 220 şagird üçün Kosakül, 80 şagird üçün Allahyarlı kənd məktəbləri inşa edilərək istifadəyə verilmişdir. 840 şagirdə hesablanmış Bədalan kənd tam orta məktəbinin əsas korpusunun təmiri başa çatdırılmışdır. Hazırda Mahmudavar kənd ümumi məktəbinin tikintisi, Kolatan və Masallı şəhər 1 saylı tam orta məktəblərinin, Bədalan kənd tam orta məktəbinin ikinci korpusunun əsaslı təmiri davam etdirilir. Şatıroba, Çayqıraq, Dəlləkoba, Köhnə Zuvand kəndlərində yeni məktəb binalarının inşası yaxın vaxtlarda reallaşacaq.

Ölkə jurnalistləri Masallıda

Həmişə qonaqlı-qaralı olan Masallıda bu dəfə jurnalistlər qonaq idilər. Martın ilk günlərinə təsadüf edən bu tədbir bir də o incəliyi ilə fərqlənirdi ki, müxtəlif televiziya kanallarının, qəzetlərin, agentliklərin, portalların nümayəndələri Masallının uğurlarına bir yerdə şahidlik edirdilər.

Elə bu yerdə onu qeyd etmək lazımdır ki, ölkənin iqtisadi-siyasi, ictimai həyatında öz layiqli yeri olan Masallı haqqında həqiqətə uyğun olmayan bir sıra xəbərlər, yazılar dərc edən saytların nümayəndələri çox güman ki, utandıqlarından dəvət olunmalarına baxmayaraq, bu tədbirdə iştirak etmirdilər. Çox istərdik ki, məhz bu saytların nümayəndələri Masallı haqqında Masallıda olmadan yazı yazmaq "prinsiplərindən" daşınsınlar.

Şəhəri bir yerdə gəzən jurnalistlər və Masallı rəsmiləri abad parklarda, geniş küçə və meydanlarda olmuşlar. Onlar Bayraq Meydanında və burdakı muzeydə daha maraqlı görüntülərlə qarşılaşmışlar. Qonaqlar Heydər Əliyev Mərkəzində rayon Ziyalılar Cəmiyyətinin üzvləri ilə görüş keçirmişlər.

Daha sonra Masallı rayon İcra Hakimiyyətinin başçısı Rafil Hüseynov jurnalistlərlə görüş keçirmiş və Masallı haqqında çox səmimi dialoq aparmışdır. O, tövsiyə xarakterli xahişini də unutmamışdır: "Gözəl Masallı haqqında ancaq həqiqətləri yazın".

Səxavət Məmmədli

Ədalət.-2014.-19 mart.-S.7.