QARABAĞIM-AZƏRBAYCANIM!

SÖZÜM GÖYNƏYİR

Sənsiz gecələrim sitəmdi-ahdı,

Əbədi qalmadı eşqinin taxtı,

Yolumuz ayrılıb gör, neçə vaxtı,

Əllərim üşüyür, üzüm göynəyir.

Eşqimiz zülümlə gəldi ərsəyə,

Necə də aldandım şirin busəyə,

O qədər baxmışam toza, kəsəyə,

Yoluna baxmaqdan gözüm göynəyir.

Sevənlərin çoxdu, sağın-solunda,

Əməl dəftərin də durub qolunda,

Elə yıxılmışam sevgi yolunda,

Dirsəyim qanayıb, dizim göynəyir.

Unuda bildinmi yaxın-yadını??

Daha çəkəmməzsən sevgi dadını,

İstəyirəm xəlvət çəkim adını,

Dodağım titrəyir, sözüm göynəyir...

QARABAĞIM - AZƏRBAYCANIM!

Qarabağ kədərim, Qarabağ şanım,

Həm dərdim, sevincim, toyum-nişanım,

O gözəl gülüstan, cahi-cəlalım,

Tanrının verdiyi dövlətim, canım,

Bütöv bir adın var-Azərbaycanım!

Şıltaq gözəl təki, xəfif ayazım,

Kəlməm də bəs etmir, bilməm nə yazım?!

Tarixləri görmüş kamanım-sazım,

Şəhid qanı hopmuş qara torpağım,

Gözü intizarda can, Qarabağım!

Torpağımdan gəlir zərif sorağım,

Sən mənim həm şeirim həm də ki, ağım,

Bir səhər gələcək şad-xürrəm çağım,

İnan qurulacaq xoşbəxt növrağım,

Gözəllik Kəbəsi ay Qarabağım!

SƏNGƏRDƏ DAYANAN ƏSGƏR

Oyanmışıq top səsinə,

İgidlərin nərəsinə,

Murov, Tülküdərəsində.

Hərdənbir gözün yol çəkər,

Səngərdə dayanan əsgər!..

Sənsən bu torpağa ürək,

Xoş niyyətsən, əzəl dilək,

Sənsiz Vətən nəyə gərək?!

Xətadan yan keç, ol zirək,

Qamətimizi dərd bükər,

Səngərdə dayanan əsgər!...

Qorxutmur nə qar, nə yağış,

Səni verənə min alqış,

Yaman gəldi bu ilki qış,

Qarda çəkmənin içində,

Barmağını şaxta kəsər,

Səngərdə dayanan əsgər!...

Vətənindi, solun -sağın,

Ürəyindi Qarabağın,

İrəvan əzəl torpağın,

Sən ağasan, "yan"-lar nökər,

Səngərdə dayanan əsgər!...

Qayıtsanız həsrət bitər,

Əziyyətin getməz hədər,

Vətən qiyamətə qədər,

Bizimdi, çalarıq zəfər,

Səngərdə dayanan əsgər!...

ŞƏRƏFLİ SƏRHƏDÇİLƏR

Vətən torpağı canı,

Havası, suyu qanı,

İgidlərə tay hanı?!

Qeyrətli keşikçilər,

Şərəfli sərhədçilər!

Dilində, sözdə Allah,

La İlahə İlləllah,

Yadı edər tərksilah,

Ağır əziyyətçilər,

Şərəfli sərhədçilər!

Çeşməsində yaş olar,

Ay-Ulduza qaş olar,

Vətən üçün daş olar,

Şanlı ziyarətçilər,

Şərəfli sərhədçilər!

Ulu sözü eşidir,

Hərbə ürəklə gedir,

Düşmənləri məhv edir,

Yuxusuz hərbiçilər,

Şərəfli sərhədçilər!

Arzusu pak diləkdi,

Vətənimə ürəkdi,

Xalqa hər an gərəkdi,

Sevimli millətçilər,

Şərəfli sərhədçilər!

ŞƏHİD ÖLÜMSÜZLÜYÜ

Şəhid verdi torpağımız, alışdı yandı

bağrımız,

Od tutdu Qarabağımız,

yazıldı qara baxtımız...

Qara gəldi baharımız,

Xəzan oldu gülüstan-laləzarımız!

İlahi, bu nə zülümdü?

Torpağ üstə gülü üçün

fəda gedən bülbülümdü!

Ədalətə döğru gedən haqq yolumdu,

Qopub sinəmdən ayrılan sağ qolumdu!

Ətimdən, qanımdan olan öz canımdı,

varlığımdı!

Bu itkini, bu əzabı lap dərindən

duymaq üçün, gərək mütləq,

Mənim kimi bir ananın oğlu dayansın

düşmənlə üzbəüz təmas xəttində!

Qumbara əlində, avtomat çiynində!!!

Heç də sevinməsin düşmən!

Nə qədər ki, millətim var,

Yetirəcək ər igidlər...

Düşmənlərlə göz-gözə dayanacaq,

Murdar nəfsini yaracaq!

Kainat durduqca yurdum yaşayacaq,

Qərinələr adlayacaq,

Torpaqlarım qayıdacaq!

Düşmənin doymayan gözü dağlanacaq!!!

Yurdumuza gələn yolu bağlanacaq!

Gözdən axan o yaşlarsa xəbər verir

anaların dözümündən,

Ölüm özü də utandı şəhidlərin

ölümsüzlüyündən!!!

ZİRVƏLƏR

Ürəyim köklənib sevgi siminə,

Bülbülün yerini verməz qarğa, sar,

Bu qəlbim kölədir eşq həvəsinə,

Səslənir könlümdə muğam, kaman, tar.

Hər bir işimizə yol verən Allah,

Qoy giley etməyim, nə də ahu-zar,

Yalançı namərddən uzaq gəz, vallah,

Olmaz o insanda nə qeyrət, nə ar.

Şəlalə sədası, bulağın gözü,

Görürəm dağların sinəsində qar,

Qorxuram zirvəyə qalxmaqdan düzü,

Axı, zirvələrdən yıxılmaq da var!

Mayisə Əsədullaqızı

Ədalət.-2014.-6 may.-S.7.