Görənlərin ovsunlayan qafqaz incisi

Belə bir ifadə var: ruhun dincəlməyi... Ancaq insanın ruhu həqiqətən varmı, yoxmu, bunu tam əminliklə demək olmur. Onda bəs nədən belə bir ifadə işlənir? Görünür irreal aləmlə reallıq üz-üzə qalanda bəşər övladı öz düşündüyünü dilə gətirir, fikrini məhz belə ifadə edir.

Son illər yolum nə vaxt Qax rayonuna düşürsə burada ürəyimcə rahatlığa qovuşuram. Bax, ruhum da dincəlir onda. Əlbətdə, Qaxın təkrarsız təbiət gözəllikləri - dağlar, meşələr, çaylar, göz oxşayan düzlər sənə onsuz da bu rahatlığı bəxş edir. Ancaq başqa bir nüans da var. Bu gözəlliyi daha da mənalandıran firavan kəndlər, ən yaxşı kurort adlarını xatırladan müasir şəhər və şəhər mədəniyyəti Qaxın doğmalığını, ruhuna yaxın olduğunu bir daha yada salır, sənə əsl rahatlıq və sevinc bəxş edir.

Bəli, günün reallığı belədir - Qax tanınmaz dərəcədə inkişaf edərək təbiətlə özünənməxsus bir gözəllik harmoniyası yaradıb. Bu səbəbdən də bəzən heç özün də dəqiq bilmirsən ki, nədən elə ruhun da bu dərəcədə rahatdır?

Müasirləşmənin Qax nümunəsi

Biz Qax rayonunun timsalında buna oxşar mövzularda çox söhbətlər açmışıq və oxucuları burada baş verən yeniliklərlə, müasirləşmənin Qax nümunəsi ilə tanış etmişik. Bu yazının davamı da elə həmin kontekstdəndir: ölkəboyu inkişafın Qaxdakı vüsətindən. Inkişafın müəyyən məqamları, görülən işlər, qarşıda duran vəzifələr rayonda keçirilən hər bir yığıncağın leytmotivini təşkil edir. Elə 2014-cü ilin I rübünün yekunlarına həsr edilmiş yığıncaqda da əsas diqqət məhz bu istiqamətə - ölkədə gedən misilsiz quruculuq işlərinə, eyni zamanda Qaxın inkişaf istiqamətlərinə yönəlmişdir. Yığıncaqda çıxış edən Qax Rayon İcra Hakimiyyətinin başçısı Musa Şəkiliyev demişdir:

- 2014-cü ilin I rübündə rayonumuzda da müvafiq sahədə bir sıra işlər görülmüş və məqsədyönlü tədbirlər həyata keçrilmişdir. Belə ki, rayon statistika idarəsi tərəfindən verilmiş məlumatlara əsasən 2014-cü ilin I rübündə rayon üzrə məhsulun ümumi buraxılışı 35 milyon 738 min manat olmuşdur ki, bu da ötən ilin müvafiq dövründən 2 milyon 678 min manat çoxdur. Məhsulun ümumi buraxılışının tərkibində sənaye məhsulu istehsalı 1 milyon 241 min manat, ötən ilin müvafiq dövrü ilə müqayisədə 81 min manat az, kənd təsərrüfatı məhsulu istehsalı 3 milyon 200 min manat və ya 146 min manat çox, tikintidə 22 milyon 307 min manat və ya 545 min manat çox, nəqliyyatda 493,6 min manat və ya 4,6 min manat çox, rabitədə 197,9 min manat və ya 32,9 min manat çox, ticarətdə 8 milyon 298 min manat və ya 2 milyon 33 min manat çox olmuşdur. Əhalinin gəlirləri 16 milyon 831 min manat, ötən illə müqayisədə 2 milyon 696 min manat artıq olmuşdur.

2014-cü ilin birinci rübündə rayonda sahibkarlığın inkişafı və əhalinin işgüzar fəliyyətinin artırılması və yeni iş yerlərinin yaradılması məqsədi ilə Sahibkarlığa Kömək Milli Fondu tərəfindən 3 lahiyə üzrə 33 min manat güzəştli şərtlərlə kreditlərin verilməsi təmin olunmuş, nəticədə 3-ü daimi olmaqla yeni iş yerləri yaradılmışdır. Hesabat dövründə rayonda daimi olmaqla 102 yeni iş yeri açılmış, orta aylıq əməkhaqqı 168 manat olmuşdur.

2014-cü ilin birinci rübündə rayonun gəlirləri 687 min manat proqnoza qarşı 841 min manat, yəni 122 faiz, xərcləri isə 3 milyon 555 min manat proqnoza qarşı 3 milyon 485 min manat, yəni 98 faiz icra olmuşdur.

Ölkədə növbəti illərdə iqtisadiyyatın diversifikasiyasının, qeyri-neft sektorunun və regionların inkişafının davamlılığının təmin edilməsi, infrastrukturun və sosial xidmətlərin daha da yaxşılaşdırılması məqsədi ilə Azərbaycan Respublikası Prezidentinin 27 fevral 2014-cü il tarixli Fərmanı ilə Regionların sosial-iqtisadi inkişafına dair üçüncü Dövlət Proqramı qəbul edilmişdir.

Məlumat üçün bildirirəm ki, "Azərbaycan Respublikası Regionlarının 2009-2013-cü illərdə sosial-iqtisadi inkişafı Dövlət Proqramı"nda rayonumuz üçün nəzərdə tutulmuş 22 bənddən ibarət tədbirlərin icrası uğurla həyata keçirilmişdir.

Görülmüş işlər nəticəsində 5 il ərzində rayonda 1730 daimi olmaqla 2086 yeni iş yeri açılmış, 2013-cü ildə isə 328 daimi olmaqla 332 yeni iş yeri təşkil etmişdir.

Yeni qəbul olunmuş Dövlət Proqramında da rayonumuz üzrə 22 bənddən ibarət tədbirlərin icrası nəzərdə tutulmuşdur. 2014-cü ilin birinci rübündə Dövlət Proqramında nəzərdə tutulmuş işlərin icrasına başlanılmışdır. Belə ki, Dövlət Proqramında yol təsərrüfatı və nəqliyyat tədbirləri ilə bağlı rayonda avtomobil yollarının tikintisinin, yenidən qurulmasının, əsaslı təmirinin və körpülərin tikintisinin davam etdirilməsi, o cümlədən Alatəmir-Marsan-Tasmalı-Zəyəm-Lələli avtomobil yolunun tikintisi və Qax-Qıpçaq-Ağyazı avtomobil yolunun yenidən qurulması nəzərdə tutulmuşdur. Tədbirin icrası ilə bağlı Azərbaycan Respublikasının Prezidentinin sərəncamı ilə 7 min nəfər əhalinin yaşadığı 8 yaşayış məntəqəsini birləşdirən Alatəmir-Marsan-Tasmalı-Zəyəm-Lələli avtomobil yolunun tikintisinin davam etdirilməsi məqsədi ilə Azərbaycan Respublikasının 2014-cü il dövlət büdcəsindən dövlət əsaslı vəsait qoyuluşu xərclərinin bölgüsündə kəndlərarası avtomobil yollarının tikintisi və yenidən qurulması üçün nəzərdə tutulmuş vəsaitdən 3,8 milyon manat ayrılmışdır. Ayrılmış vəsait hesabına avtomobil yolunun tikintisi və Alatəmir-Marsan avtomobil yolunun üzərində aşırımın uzunluğu 33 p/m olan körpünün tikintisi aparılır.

Bundan başqa rayon büdcəsində yolların əsaslı təmiri üçün nəzərdə tutulmuş vəsait hesabına Aşağı-Malax kəndinin 0,7 km uzunluğunda yolun giriş hissəsinə, o cümlədən şəhərin C.Cabbarlı, M.F.Axundov, M.P.Vaqif və M.Məmmədov küçələrinə asfalt-beton örtüyün salınması nəzərdə tutulmuşdur.

(ardı gələn sayımızda)

Məzahir ƏHMƏDOĞLU

Ədalət.-2014.-8 may.-S.7.