Teatrın işıqlarını yandırmaq...

Və ya hər həftə Bakıda görüşənədək

Sumqayıt Dövlət Musiqili Dram Teatrı böyük dəyişikliklər ərəfəsindədir. İki ay öncə teatra direktor təyin edilən İslam Həsənov artıq qısa müddətdə xeyli işlər görməyə nail olub. İslam bəy bizimlə söhbətdə rəhbərlik etdiyi teatrın gələcək planları barədə danışdı, özü də əminliklə.

- İslam bəy, adətən deyirlər ki, teatr asılqandan başlayır. Sumqayıt Dövlət Musiqili Dram Teatrına direktor təyin olunduqdan sonra dəyişikliklərə asılqandan başladınız, yoxsa...

- Asılqandan yox, teatrın xidməti girişindən başladıq, sonra geyim və qrim sexlərində normal iş şəraiti yaratmağa çalışdıq. Aktyorlarımız üçün yeni qrim otaqlarının hazırlanmasına nail olduq, çünki qrim otaqlarının azlığı üzündən dözülməz vəziyyət yaranmışdı. İşıq və səs rejissorları üçün kompüterlər alınıb, digər yeni texniki avadanlıqların alınması üçün işlər görürük.

- Yəqin ki, bütün bu işlər tamaşaların keyfiyyətinə öz təsirini göstərəcək. Teatr tamaşaçılarla bağlı hansı addımları atmaq istəyir?

- Hər bir teatr çalışır ki, tamaşaçısı olsun, gərgin məşqlərdən, axtarışlardan, əziyyətdən sonra hazırlanan səhnə əsərlərinə tamaşaçı baxsın, yaradıcı heyətin vermək istədiyi mesaj cəmiyyətə çatsın. Ona görə də teatrımızda həyata keçirilən dəyişikliklər görüntü xarakteri daşımır, kollektivimizin məqsədi tamaşaçıları teatra cəlb etmək, onlarda yüksək bədii zövq aşılayan səhnə əsərləri hazırlamaq və Sumqayıt teatrının əvvəlki ad-sanını bərpa etməkdir. Sumqayıt Azərbaycanın böyük şəhərlərindən biridi, şəhərimizdə 650 minə yaxın sakin yaşayır. Təəssüf ki, son dövrlər teatrımız tamaşaçı potensialından səmərəli istifadə edə bilməyib, paytaxta ən yaxın şəhərdə axşam tamaşaları oynanılmayıb. Bunun müxtəlif səbəbləri olub, bu məsələlərə geniş toxunmaq istəmirəm. Onu deyə bilərəm ki, artıq axşam tamaşalarını bərpa edə bilmişik, necə deyərlər, istəyimiz axşamlar teatrımızın işıqlarını yandırmaq idi, buna da nail olduq. Elə tamaşamız var ki, xüsusi təşkil etməyə ehtiyac yoxdu, insanlar özləri kassaya yaxınlaşıb bilet alırlar. Tez-tez şəhərdəki təşkilat və müəssisələrdən sifariş alırıq, bu günlərdə təşkilatlardan biri teatrımızla əlaqə saxlayıb Con Patrikin "Qocanı öldürməliyik" tamaşasına baxmaq istəyində olduqlarını bildirdilər. Bu cür münasibəti görəndən sonra bir daha əmin oldum ki, tamaşaçılarımız teatra gəlmək istəyirlər, sadəcə, onları maraqlandırmaq, cəlb etmək lazımdı. Tamaşaçılarımızla tez-tez ünsiyyətdə maraqlıyıq və inanıram ki, bu ünsiyyətdən hər iki tərəf qazanacaq.

- Bakı ilə Sumqayıt arasında məsafə yaxınlığını nəzərə alsaq, yəqin ki, teatrınızın paytaxt tamaşaçıları ilə də müntəzəm görüşməsində problem olmaz...

- Sumqayıt teatrı fəaliyyət göstərdiyi bu illər ərzində dəfələrlə Bakı tamaşaçıları qarşısında yaradıcılıq hesabatı verib. Biz bu ənənəni davam etdirmək fikrindəyik. Mayın 18-də kollektivimiz paytaxtdakı Aktyorlar Evində İsi Məlikzadənin "Gəl qohum olaq" əsəri ilə tamaşaçılar qarşısında çıxış edəcək. Bir məsələni də qeyd edim ki, həmin gün teatrımızın öz binasında da tamaşa oynanılacaq, sumqayıtlı tamaşaçılarımız İlyas Əfəndiyevin "Sən həmişə mənimləsən" tamaşasına baxa biləcəklər. Bakı qastrollarımızla bağlı sualınıza cavab olaraq onu da deyim ki, yeni teatr mövsümündən hər həftə paytaxtda bir tamaşa oynamağı planlaşdırırıq.

- Son illər teatrlarımız müxtəlif ölkələrdə qastrollarda olur, beynəlxalq festivallarda iştirak edirlər. Sumqayıt Dövlət Musiqili Dram Teatrına belə dəvətlər varmı?

- Azərbaycan teatrını və ümumilikdə incəsənətini ölkə xaricində təmsil etmək hər bir yaradıcı kollektivin arzusudu. Ölkəmiz bütün sahələrdə olduğu kimi, incəsənət sahəsində də böyük uğurlar qazanıb. Teatrlarımızın uğurlu qastrol səfərləri, nüfuzlu beynəlxalq festivallarda yaxından iştirakı bunu bir daha sübut edir. Sumqayıt Dövlət Teatrı da bu prosesə öz töhfəsini vermək istəyir və beynəlxalq layihələrdə iştirakda maraqlıdı. Bununla bağlı danışıqlar aparır, bizə gələn təklifləri götür-qoy edirik. Artıq konkret nəticələr də var, iyunun sonlarında teatrımızın Gürcüstana qastrol səfəri ilə bağlı məsələ dəqiqləşib. Qonşu ölkənin Kutaisi və Batumi şəhərlərində Con Patrikin "Qocanı öldürməliyik" tamaşaçısını təqdim edəcəyik. Türkiyəyə, Bolqarıstana və Qazaxıstana da dəvətlərimiz var, hazırda bununla bağlı danışıqları yekunlaşdırırıq. Elə tamaşalar hazırlamaq istəyirik ki, onlar daimi tamaşaçılarımızın xoşuna gəlsin, həm də xaricdə bizi izləyəcək insanlarda Sumqayıt teatrı haqqında xoş təəssürat oyada bilsin.

- Repertuardan söz düşmüşkən, tamaşaçılar hansı yeni tamaşalara baxa biləcəklər?

- Teatrımız repertuarını yeni səhnə əsərləri ilə zənginləşdirmək fikrindədir. Uilyam Şeksprin "Otello", Raffi Şartın "Arvadımın adı Morrisdir", Jan Anuyun "Antioqna", məşhur türk yazarı Əziz Nesinin "Öldür məni, can-ciyər", Kamran Nəzirlinin "Narkoman" və Əhməd Orucun "Açarını itirənlər" tamaşaları üzərində yaradıcılıq işi aparırıq.

Bu gün tanınmış səhnə xadimlərinin bəziləri ilk addımlarını məhz Sumqayıt Dövlət Dram Teatrında atıblar. Müxtəlif teatrlarda çalışan həmin sənətkarları bir tamaşa ətrafında toplamaq istəyirik. Bu layihəni gerçəkləşdirə bilsək, onlar yenidən doğma teatrın səhnəsində çıxış etmək imkanı qazanacaqlar.

Ümumiyyətlə, görmək istədiyimiz işlər çoxdur, zaman isə gözləmir. Əminəm ki, planlaşdırdığımız işlərin çoxunu həyata keçirə biləcəyik.

- Direktorun əminliklə danışması yaxşı əlamətdir...

- Bu əminlik boş yerdən yaranmayıb. Nazir Əbülfəs Qarayev başda olmaqla Mədəniyyət və Turizm Nazirliyinin rəhbərliyi kollektivin normal fəaliyyəti üçün bütün şəraiti yaradıb, Sumqayıt Şəhər İcra Hakimiyyətinin başçısı Eldar Əzizov problemlərimizlə maraqlanır, layihələrimizi dəstəkləyir. Son 7 ili Lənkəran Dövlət Dram Teatrının direktoru vəzifəsində çalışarkən xeyli təcrübə toplamışam və inanıram ki, bu təcrübə yeni işimdə köməyimə gələcək. Sumqayıt Dövlət Dram Teatrında çox istedadlı və öz sənətinə vurğun peşəkar aktyorlar var. Belə yaradıcı heyətlə əl-ələ verib yaradıcılıq uğurları əldə etmək olar.

- Bayaqdan diqqət edirəm, müsahibə boyu bir dəfə də olsun Sumqayıt Dövlət Musiqili Dram Teatrı sözü işlətmədiniz...

- Teatrımızın adında dəyişiklik olacaq və "Musiqili" sözü çıxarılacaq. Nazirlər Kabinetinin bununla bağlı rəsmi qərarını gözləyirik. Mən də indidən özümü buna öyrəşdirirəm.

Etibar CƏBRAYILOĞLU

Ədalət.-2014.-14 may.-S.8.