Bulaq suyu kimi saf...

Yeni nəşrlər

Dost oldunsa, dostu imtahana çək,

Varsa naxələflik, tez görünəcək.

Onunla yol getmə sən axıradək,

Naxələfdən gen qaçmağa nə var ki!

Bu misraların müəllifi Tofiq Ağayevi tələbəlik illərindən tanıyıram. Xoş günlərimiz də olub, ağrılı-acılı anlarımız da. Yuxarıdakı misralarda özünün dediyi kimi, dost sözü əzizdir, müqəddəsdir, əvəzolunmazdır. O vaxtdan bilirəm ki, bu yolda o, hər çətinliyə, əzab-əziyyətə dözməyə hazır olan adamdır. Buna görə də Tofiq müəllim deyir ki,

Dost olanda ürək dostu olasan,

Elə-belə dost olmağa nə var ki!

Onun bu xasiyyəti dəfələrlə sınaqdan keçib, dost-tanışın, qohum-qardaşın ürəyini dağa döndərib. O, bulaq suyu kimi saf olduğu qədər də bulanlıq işlərdən uzaq adamdır. Aydınlığı, aşkarlığı sevir, ağıllı və mənən təmiz olmağı insanlığın ən uca zirvəsi sayır.

Ağıl elə bir sərvətdir,

Varla, pula alınmaz.

Gəbə deyil, xalı deyil,

Ayaq altda salınmaz.

Nə qızıldı, nə cəvahir,

O nə ləldi, nə də almaz,

İşlətdikcə artar bəhri,

Zərrə qədər azalmaz!

Tofiq müəllimin şeir yazdığını bu yaxınlarda bilmişəm. Lakin onun bu addımı məni qətiyyən təəccübləndirməyib. Çünki insan yaşa dolub, ahıllaşdıqca həyata, baş verən hadisələrə, insanlara baxışı da kamilləşir. Buna görə də illərlə qəlbində məskən salan fikir və düşüncələri poetik bir dillə ətrafındakılara çatdırmağa çalışır. Bu mənada Tofiq müəllimi alqışlayıram və həmin bədii parçalara nəzər salıram. "Nurlan" nəşriyyatının bu yaxınlarda çapdan buraxdığı "Bir ömürdən düşüncələr" kitabında öyüd-nəsihətlə, Vətənə, el-obaya sevgi və məhəbbətlə dolu şeirləri oxuyuram. Bunlar uzun illər Bərdə rayonunda müxtəlif vəzifələrdə çalışan, həyatın hər cür keşməkeşlərindən uğurla çıxan, haqqın gözünə düz baxmağı bacaran bir iqtisadçının ürək çırpıntılarıdır.

Tam olsan da çoxdu kəmin,

Nə qayğın var, nə kərəmin.

Kim gəlir-gedir, nə qəmin,

De ağrayır haran, dünya?

Kitabdakı şeirlərin əsas mövzusu, daha doğrusu, canı-qanı Qarabağ dərdidir. Bu dərdi isə Tofiq müəllim kimi Vətən torpağını, onun hər qarışını sevən insanlar çəkə bilər.

Uzağı görmədik biz zərrə qədər,

Demə, ömrümüzü vermişik hədər.

El-obamız yaman oldu dərbədər,

Olmadı bir çalan təbil, ay Şuşam!

Gələnlərin kəsilməyir ayağı,

Erməninin yaman çoxdu dayağı.

İl veririk biz də bayramsayağı,

Yubiley kimi keçir hər il, ay Şuşa!

Bu şeirlərin əsas məna və məziyyəti ondan ibarətdir ki, xain qonşularımız torpaqlarımızı vəhşiliklə işğal etmiş, şəhərlərimizi, abad kənd və qəsəbələrimizi, zümrüd bulaqlı meşələrimizi viran qoymuşlar. Müəllifi qəlbən sarsıdan bu məsələlər qocalı-cavanlı hər birimizin ürəyini göynədir, düşmənə qarşı səfərbərliyə səsləyir.

"Bir ömürdən düşüncədər" kitabındakı şeirlər bir də ona görə maraqlıdır ki, el ağsaqqalı öz yazılarında müstəqil ölkəmizin hər yerində gedən geniş quruculuq işlərinə, hər gün gördüyü, şahidi olduğu yeniliklərə düzgün qiymət verir, onları alqışlayır, təqdir edir.

Mənə elə gəlir ki, Tofiq müəllimin özü kimi sözü də hər birimizin xoşuna gələcək, ürəyincə olacaq.

Polad Qasımov

Ədalət.-2014.-24 may.-S.10.