Lerik - dağların füsunkar diyarı

(əvvəli ötən sayımızda)

2014-cü ilin 01 aprelinə hesablanmış rəqəmlərlə danışsaq indi burda 79867 nəfər insan yaşayır. Ötən ilin müvafiq dövrü ilə müqayisədə bu 1,3 faiz çoxdur. Burdakı insanlar doğrudan çörəklərini daşdan çıxaran insanlardır. Çünki dağlara sığınan Lerikin elə də böyük iqtisadi imkanları yoxdur. Ancaq elə bu dağlarda yaşayıb ailə saxlamaq, alın təri ilə çörək qazanmaq elə də asan deyil. Bu ilin 1-ci rübündə havaların yağmurlu keçməsinə baxmayaraq həyat əvvəlki kimi davam etmişdir. 180 şagird yerlik Nücü, Pirsora, Vizəzəmin kənd tam orta məktəblərinin tikintisində, Mastayıl kənd tam orta məktəbinin, Lerik şəhər uşaq bağçasının əsaslı təmirində işlər sürətlə davam etdirilmişdir. 180 şagird yerlik Boykəndil kənd tam orta məktəbinin tikintisinə hazırlıq başa çatdırılmışdır.

Azərbaycan Respublikası Prezidentinin tapşırığına uyğun olaraq 2014-cü ilin fevral ayının 17-dən may ayının 01-nə kimi əhalinin tibbi müayinədən keçirilməsi Lerikdə uğurla həyata keçirilmişdir. Kənd sakinlərinin rayon mərkəzinə gəlməsini diqqətdə saxlayan rəsmilər öz məqsədlərinə tam nail olmuşlar.

Yanvar-mart aylarında rayonda havaların daha sərt keçməsinə baxmayaraq aparılan tikinti-abadlıq işlərində sahibkarlıq subyektlərində, digər sahələrdə 159 nəfər rayon sakini işlə təmin edilmişdir ki, onlardan da 111-i daimi iş yeridir.

Dağlarda yol infrastrukturunu saxlamaq çətin olsa da, Lerik qəsəbəsinin küçə və meydanları rahat və səliqəlidir. Qəsəbənin bütün küçələrində müasir işıqlandırma sistemləri quraşdırılmışdır. Küçə divarları, səkilər milli ornamentlərlə işlənmiş və sakinlərin ixtiyarına verilmişdir. Hər tərəfi yaşıl dağlarla əhatə olunmuş Lerik qəsəbəsinin özündə yaşıllığın salınması işləri bir an belə dayandırılmır. Bu isə Lerik qəsəbəsinin görkəmini bir az da gözəlləşdirir və Lerik qəsəbəsinə təşrif gətirən hər bir müsafir burdan xüsusi zövq alır.

Rəsmilərin beynəlmiləl döyüşçülərlə görüşü

Mən rayonda olarkən məlum oldu ki, 25 il bundan əvvəl Əfqanıstanda öz beynəlmiləl borcunu yerinə yetirən döyüşçülərlə görüş keçiriləcək. Qeyd edim ki, bu döyüşlərdə 40 nəfər lerikli iştirak edib. Bunlardan 15 nəfəri müxtəlif orden və medallara layiq görülüb. Onların hamısı bu görüşdə iştirak etməsə də iştirakçılar döyüş yolu haqqında öz təəssüratlarını bölüşdülər. Şeir, söz həvəskarı Əkrəm Abdullayev vaxtilə döyüş səngərində yazdığı "Quşcuğaz" şeirini deməyi unutmadı. Digər müharibə veteranları Umudvar Kəlbiyev, Məmməd İbrahimov və başqaları Əfqanıstanda apardıqları amansız döyüşlərdən danışdılar. Qeyd etdilər ki, bu gün burda iştirak edən Əfqanıstan Müharibəsi Veteranları öz borclarını ləyaqətlə yerinə yetirmişlər.

Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin rəisi Elməddin Cəfərov beynəlmiləl döyüşçülərlə görüşdə çıxış edərək bildirdi ki, Əfqanıstanda aparılan döyüşlərdə 620 min iştirakçı arasında azərbaycanlıların, xüsusən leriklilərin göstərdikləri qəhrəmanlıqlar ən yüksək sözlərə layiqdir. Burda aparılan 452 əməliyyatın əksəriyyəriyyətində azərbaycanlılar fəal iştirak etmişdir. İndi həmin döyüşlərin 25 illiyinə həsr edilmiş bu görüşdə iştirak edənlər onların bariz nümunələridir.

Daha sonra yığıncaqda iştirak edən Lerik rayon İcra Hakimiyyətinin başçısı Rövşən Bağırov beynəlmiləlçi döyüşçüləri səmimi salamladı. Rövşən müəllim bildirdi ki, daim diqqətdə olan və qayğı ilə əhatə edilən müharibə iştirakçılarına xüsusi vaxt ayırmaq həmişə vacibdir. Çünki onlar ərazi bütövlüyümüzü təmin etməklə bərabər onlar beynəlmiləlçi döyüşçülər kimi də öz borclarını ləyaqətlə yerinə yetirmişlər. Bu gün burda iştirak edən Əfqanıstan müharibəsi iştirakçıları da eyni həyat yolu keçmişlər və onları layiqincə dəyərləndirmişlər. Rövşən müəllim bildirdi ki, bu döyüşlərdə 7500 nəfər azərbaycanlı iştirak edib. Onlardan 219 nəfəri vuruşaraq qəhrəmancasına həlak olub, 17 nəfər soydaşımız isə həmin müharibələrdə itkin düşüb. Keçmiş əfqan döyüşçüləri öz döyüş təcrübələrindən burda da məharətlə istifadə ediblər. Onlar Qarabağ Müharibəsində fəal iştirak ediblər, döyüşüblər. Nəticədə 7 nəfəri Azərbaycanın Milli Qəhrəmanı adına layiq görülüblər. Əfqanıstan müharibəsinin bitməsinin 25 illiyinə həsr olunmuş yığıncağın sonunda icra başçısı iştirakçılara müharibənin bitməsinin 25 illiyinə həsr edilmiş medallar təqdim etdi və onlara bir daha bildirdi ki, Lerik rayon İcra Hakimiyyətinin başçısının otağının qapısı onların üzünə həmişə açıqdır. Vaxtından, zamanından asılı olmayaraq hər bir müharibə iştirakçısı ona müraciət edə bilər.

"Uzunömürlülər muzeyi" bayrama hazırlaşır

İyun ayında nəzərdə tutulan bu bayrama qədər isə Lerik rayonunun "Uzunömürlülər muzeyi" xeyli yol keçib. 1991-ci ildə təşkil edilən bu muzeydə ilk əvvəllər yaşı 100-dən çox olan 100 nəfər insan vardısa, indi onların sayı cəmi 6 nəfərdir. İlk gündən burda çalışan muzeyin direktoru Dilarə Fətullayeva bildirdi ki, bu muzeyin yeni binasının açılışında 2010-cu ilin 25 iyununda Azərbaycan Respublikasının Prezidenti İlham Əliyev şəxsən özü iştirak edib. Lerik rayon İcra Hakimiyyətinin başçısı Rövşən Bağırovun xüsusi təşəbbüsü ilə inşa edilən bu muzeyin indiki görkəmini almasında Dövlət Neft Şirkətinin də öz payı var. Dilarə xanım onu da bildirdi ki, yaz və yay aylarında buranın müsafirləri daha çox olur. Ən çox qonaqlar da xarici ölkələrdən gələnlərdir. Rusiyadan, Ukraynadan, Belarusiyadan, hətta İordaniya və Belçikadan da bura təşrif gətirənlər olur. Çalışırıq ki, eksponatlarımızın dili ilə onlarda Azərbaycan və Lerik haqqında daha dolğun təəssürat yaradaq. Beləcə, yaşıllıqlar qoynunda uyuyan Lerikin "Uzunömürlülər muzeyi" indi uzunömürlülər bayramına hazırlaşır. Ömrünüz uzun olsun, leriklilər!

Səxavət Məmmədli

Ədalət.-2014.-28 may.-S.7.