Yazıçılar Birliyinin yeni layihəsi təqdim olundu

Bu gün Azərbaycan Yazıçılar Birliyində (AYB) "Aybkitab.az” saytının təqdimat mərasimi keçirildi. AYB-nin mətbuat xidmətinin rəhbəri Xəyal Rza qeyd etdi ki, "Aybkitab.az” saytı Yazıçılar Birliyinin yeni layihəsidir. Layihə çərçivəsində bu loqo altında kitabların nəşri, online satışı, təbliği, çap olunmuş kitabların müəllifləri ilə imza günlərinin keçirilməsi, yeni müəlliflərin oxuculara tanıdılması, bölgələrdə onlarla görüşünün təşkili həyata keçiriləcək. Eləcə də satışdan cəmlənən vəsaitlə müəlliflərə qonorar ödəniləcək.

Mətbuat xidmətinin rəhbəri vurğuladı ki, bu, xəbər saytı deyil, sırf layihəni dəstəkləyən saytdır. Bununla belə, saytın xəbər bölməsində nəşr olunacaq kitablar və onların müəllifləri qabaqcadan elan olunacaq. Artıq ilkin olaraq nəşr olunacaq 3 kitabın elanı yerləşdirilib. Bunlar şair Elşad Ərşadoğlunun şeirlər kitabı, Sahilə İbrahimovanın "Çevriliş” romanı və İlqar Fəhminin "12 cildlik kitab”larıdır.

X.Rza onu da diqqətə çatdırdı ki, yaxın günlərdə hekayə müsabiqəsi də keçiriləcək.

Mətbuat xidmətinin rəhbəri əlavə etdi ki, "Aybkitab” layihəsinə "Vektor” nəşriyyatı, "Yazıçı” nəşriyyatı, "Yayım Assosiasiyası” və "Kitabevim.az”kimi müstəqil təşkilat və nəşriyyatlar da dəstək verəcəklər.

X. Rza həmçinin bildirdi ki, yeni layihəyə əsasən, "Aybkitab.az” saytından başqa "Ayb.tv” internet televiziyası, habelə rusdilli yazarlar və oxucular üçün "Aybru.az” saytı yaradılacaq: "Hazırda bu istiqamətdə işlər gedir. Bütün bu saytlar və televiziya vahid "Ayb.az” saytında birləşəcək. Hazırki "Ayb.az" saytı isə "Ayb.media" adı ilə əvəzlənəcək”.

Mərasimdə çıxış edən Yazıçılar Birliyinin katibi İlqar Fəhmi vahid loqo altında kitabların çap olunmasının əhəmiyyətindən danışaraq yazıçıları birlik nümayiş etdirməyə səslədi. O qeyd etdi ki, bu addımla kitabların pərakəndə çapına son qoyulacaq: "Artıq o dönəmdir ki, qələm adamı yalnız əsər yazmaq haqqında düşünməlidi, kitabın nəşri, reklamı haqqında yox. Səpələnmək bizi aciz göstərir. Yeni ədəbiyyat, yeni nəsil qələm sahibləri formalaşır ki, onları bir araya toplamaq borcumuzdur. Xırda axınlar birləşib böyük sel yaratmalıdır ki, gücümüz hiss olunsun və ümumi dəyərlərə xidmət etsin”.

Tədbirdə çıxış edən şairə Gülxanı Pənah isə təklif etdi ki, istər yeni Ayb.tv-də, istərsə də saytda ədəbi tənqidə daha çox yer ayrılmalıdır ki, oxucular yeni əsərlərin zəif və güclü tərəflərini görə bilsinlər. Xanım şairə vurğuladı ki, qərəzsiz, sağlam tənqid daha peşəkar, səviyyəli ədəbi nümunələrin ərsəyə gəlməsinə kömək edəcək.

Ədalət. - 2014.- 11 sentyabr.- S. 3.