TORPAQ BƏRƏKƏTLİ OLANDA...
(əvvəli
ötən sayımızda)
Məhsul verən
sahələr
... Bayaq bərəkətli Qarabağ
torpağından danışdıq.
Dedik ki, bu yerlərin torpağı daha bərəkətlidi. Mer-meyvəsinin, bostan-tərəvəz məhsulunun dadından adam
doymur. Hələ biz quzu ətinin
tamını demirik.
Qarabağın quzusunun kababının
özgə
ləzzəti var. Xüsusən
də
qara quzular daha dadlı olur. Bu sözləri deyəndə özümün də azğı sulanır.
Çünki yolum kəndimizə düşəndə yaxın dostlarım, qohum-əqrəbam hamısı məni evinə
qonaq aparmaq istəyir.
Təbii ki, onların
sözlərindən mən
də
çıxmıram. Yadımda qalan
o olur ki, içdiyim su, yediyim çörək və
udduğum hava tamamilə
fərqlidi.
Hələ mən
gecələr rahat yatmağımı demirəm.
Təzyiqim yüksək
olduğu üçün
Bakıda çox
nadir hallarda rahat yatıram. Amma kəndimizə gələndə nə ağrayıb-acıyıram, nə təzyiqim
olur, nə də sıxıntılarım...
Elə bil mətləbdən bir qədər uzaq düşdük. Xatirələr məni
uzaq keçmişə apardı. Axı biz məhsul
verən
torpaqdan danışırdıq.
O torpaqdan ki, onun hər
qarışı qızıla
bərabərdi...
Sevinən insanlar
Füzulidə insanların necə sevindiyini üz-gözlərindən görmək
olar. Kimin qapısını açsan, kimə qonaq olsan, səni
gülərüzlə qarşılayar. Çünki qonaq üçün hər
bir şərait var. Yatmağa
yeri, qonaq qabağına qoymağa çörəyi
olan insanlar heç də elə-belə adamlar deyillər. Onlar zəhmətkeş, halal
və
əməli saleh adamlardı. Çünki bu insanlar taxıl, günəbaxan, kartof, bostan-tərəvəz, pambıq, meyvə, üzüm
yetişdirirlər.
Hələ biz onların mal-qaralarını
demirik. İlbəil adını sadaladığımız
məhsulların
artımı hiss olunur.
Yəni rayonda elə bir abu-hava yaranıb
ki, insanların işləməsi və
məhsul
əldə etməsi
üçün heç
bir çətinlik yoxdur. Ən azından
ona görə ki, işləyən adam çörəyini daşdan da olsa çıxara bilir. Burdakı insanların çoxunun
çörəyi
torpaqdan, mal-qaradan və
xırda ticarətdən çıxır.
Yəni
əziyyət çəkən insan heç vaxt çətin anlar yaşamır...
"Yaşıl işıq"
yandırılıb
Rayonda sahibkarlığın
inkişafına "yaşıl
işıq" yandırılıb. Belə ki, dövlət və eləcə də
rayon rəhbərliyi səviyyəsində həmin
adamlara böyük dəstək var. Əgər bir sahibkar, bir
fermer çətinə düşürsə
və
çıxış yolu
tapmaq istəyirsə,
təbii
ki, rayon icra hakimiyyətinə müraciət
etsə,
o bu problemi qısa zaman ərzində həll
edə
bilir.
Rayon icra hakimiyyətinin başçısı
Alı Alıyev bizimlə
söhbət
zamanı bildirdi ki, sahibkarlara, fermerlərə və
iş adamlarına hər
cür şərait yaratmışıq. Onlara təsərrüfatlarını inkişaf etdirilməsi üçün həm dövlət
dəstəyi var, həm
də
mənəvi dayaq. Aydındır ki, rayonumuzun
böyük bir hissəsi
ermənilərin işğalı altındadı.
Ancaq biz elə etməliyik
ki, insanlar işğaldan azad olunmuş ərazilərdə məskunlaşarkən bir çox problemlərlə üzləşməsinlər. Mən bu vəzifəyə təyin olunan ilk gündən camaatla söhbətimdə bildirmişəm
ki, sahibkarlara, fermerlərə və
iş adamlarına hər
cür yardım edəcəyik. Təki
onlar rayonda bir iş görə bilsinlər.
Həyata keçirdiyimiz tədbirlər nəticəsində bu gün Füzulidə birmənalı
olaraq deyə bilərəm ki, sahibkarlıq fəaliyyəti geniş vüsət alıb.
Aydındır ki, rayonda gedən quruculuq, abadlıq və
tikinti işlərində füzulilər
özü çox yaxından iştirak edirlər. Bütün bunlar
onu deməyə
əsas
verir ki, ölkə
prezidenti cənab İlham Əliyev Füzulidəki bütün quruculuq və
abadlıq işlərinə böyük diqqət yetirir və
qayğı göstərir. Məhz
buna görə də
biz bütün sahələrdə
böyük irəliləyişlərə nail olmaq
üçün qüvvələrimizi birləşdirməli və
möhtəşəm işlər
görməliyik.
O işlər
ki, Füzuliyə gələn hər
bir qonaq bunu görür, qiymətləndirir və
dəyər verir.
Uzanan yollar...
Bu gün demək olar ki, Füzulinin
işğaldan azad olunan elə
bir yaşayış məntəqəsi yoxdur ki, oralara yeni
asfalt yollar çəkilməsin. Hətta Sovet dönəmində yolları bərbad, çala-çuxur
olan kəndlərə belə
asfalt yollar çəkilib.
Eyni zamanda, Füzulinin əksər kəndləri təbii
qazla təchiz edilib.
Artıq
böyük abadlıq,
quruculuq işləri Horadiz şəhərindən qəsəbələrə, kəndlərə və yaşayış məntəqələrinə doğru addımlayır.
Əlbəttə, bu abad, bu
gözəl
və
yeni salınan yaşayış məntəqələrini görəndə adamın ürəyi dağa dönür. Heç uzağa
getməyək, Qayıdış və Zobucuq qəsəbələrinə baş çəksəniz,
hər
şeyin şahidi olarsınız. Yeni salınmış
bu qəsəbələrdə on minlərlə insan məskunlaşıb.
Onların yaşayışı, dolanışığı, sağlamlığı
və
təhsili
üçün hər bir şərait
yaradılıb. Təkcə insana o qalır
ki, bu şəraitdən istifadə
eləsin.
Uzanan yollardan biri bizi Alxanlı
kəndinə aparır...
Ermənilər güllə
atar...
Ötən əsrin
90-cı illərindən bəri
bu sətirlərin müəllifi
həmişə döyüş bölgəsinə can atıb. Qubadlıda, Cəbrayılda,
Zəngilanda,
Laçında, Kəlbəcərdə, Şuşada, Ağdamda döyüşün ən ağır anlarının şahidi olmuşam. Və həmişə də
döyüş bölgəsinə getməyimlə qürur duymuşam.
Bu dəfə də
yaxın dostum Ariflə
və
oğlum Eminlə Füzulidə
olanda birbaşa qaynar nöqtəyə
getdik. Təbii ki, ermənilərlə üzbəüz olan yaxın məsafəni görmək
və
həmin
anları yaşamaq insanda böyük vətənpərvərlik
duyğuları yaradır.
Elə ki, Yuxarı Kürdmahmudludan Alxanlıya
doğru hərəkət
elədik,
onda oğlum bir qədər qorxdu. Dedi ki, ata, bəlkə qabağa getməyək.
Onun qorxduğunu hiss edib bildirdim ki, cəbhə nöqtəsinə az qalıb.
Alxanlını keçib sonuncu
məntəqədə
dayandıq. Ordan
o yana əsgərlər təbii
ki, bizi buraxmadılar.
Çünki qarşıda işğal olunmuş kəndlərimiz və Füzuli şəhəri var idi. Hündür yerə çıxanda Füzuli şəhəri uzaqdan görünür. Ancaq burda da ehtiyatlı olmaq lazımdı. Bu sözləri oğluma deyirəm və o çəkilib durur kənarda. Deyəsən, o, daha qorxmur. Çünki ermənilər də "ağıllanıblar".
Atəşkəsi həmin an pozmurlar. Amma ürəyimdə ermənilərə qarşı sonsuz bir güllə yağışı baş qaldırır. Fikirləşirəm ki, əgər bu güllə yağışı ilə ermənilərin üstünə yerisəm, nə olur?
Hər halda, bir qədər fikirləşib sakitləşirəm. Məni də sakitləşdirən o olur ki, ölkə prezidenti cənab İlham Əliyev tezliklə torpaqlarımızın işğaldan azad olunması üçün lazımi addımlar atacaq. Bax, onda bütün döyüşənlər kimi biz də əlimizə silah götürüb güllələri erməni mövqelərinə tərəf yağış kimi yağdıracağıq.
... Geri qayıdırıq. Alxanlı kəndinin ortasından keçən asfalt yolun sağında və solunda taxıl zəmiləri göyərir. Burda bir çox dəmyə torpaqlarda əkin işləri aparılıb. Maşallah, zəmilər göz oxşayır.
Qışın oğlan çağı olmasına baxmayaraq, əkilən taxıl sanki qar altından boylanaraq zəif-zəif üfüqdən görünən günəşə salam vermək istəyir. Hava tər-təmizdi. Maşından yerə düşürük və bu tər-təmiz havadan doyunca ciyərlərimizə çəkirik. Dostumuz Arif və oğlum Emin maşına qayıdıb minmək istəmirlər. Arif deyir ki, Faiq müəllim, qoy bir az təmiz havadan ciyərlərimizə çəkək. Onsuz da Bakının zəhərli havası bizim axırımıza çıxıb.
...Qaranlıq düşür.
Yavaş-yavaş maşınımızla
üzü geriyə
- Bəhmənliyə qaydırıq. Amma inanırıq ki,
günlərin birində biz
hamımız uzaqdan görünən işğal
altında olan başı qarlı
torpaqlarımıza qayıdacağıq. Buna
günün çıxması və səhərin
açılması qədər inanırıq!..
Faiq QİSMƏTOĞLU
Ədalət.-2014.-16
yanvar.-S.7.