ŞƏHİDLƏR XİYABANI

Dağüstü park...

Bakının dağ ucalığı,

Bakının ən uca yeri.

Sıra ilə düzülərək

Baxır bizə

Qanlı yanvar şəhidləri.

Baxışlarda bir sual var,

Bir heyrət var.

Burda ancaq

Bir lal sükut,

Bir də, bir də

Bir işıqlı məhəbbət var.

Nə danışan... nə bir gülən...

Arzu şikəst, fikir darda...

zaman sükut içindədir

Əsmir külək,

Susub durmuş ağaclar da.

Məzarların o başında

Bir əbədi məşəl yanır.

Tərpənmədən dayanmışam...

Elə bil ki, bir məşəl də

İçimdə alvolanır.

Kədərlidir burda gənclər

Kədərlidir burda güllər

Məzarların üzərində

Qan rəngində qızılgüllər

Qan rəngində qərənfillər...

Yox, yox onlar dik baxıblar

ölümə də

əyilməyib, alçalmayıb

24 il keçibsə də

Heç biri də qocalmayıb.

Məzarlığın o başında

Çıxıb yerin sinəsinlən

Bir əbədi məşəl yanır.

Mən susuram, dinməyirəm

Elə bil ki, bir məşəl də içərimdə

alovlanır.

Bu yer mənim

ağrı yerim, qürur yerim,

inam yerim.

Xəyalımda intiqamı alınmayan

Zəfər marşı çalınmayan -

şəhidlərim, igidlərim.

Ürəyimin lap dibindən

bir səs qopur

Az qalır ki, qulaq batsın.

Dəli olam harayından...

Sual dolu yüzlərlə göz

Sıra ilə düzülərək baxır bizə

Qaranlığın o tayından.

Zəbi Mərdanlı

Xaçmaz rayonu, Tel kəndi

Ədalət.-2014.-18 yanvar.-s.14.