ÜRƏKLƏRDƏ İZİN QALSA...

(Əvvəli ötən sayımızda)

Yandırılmış məktəb yenidən bərpa edildi

...1993-cü lin avqustun 23-də Füzuli rayonu ermənilər tərəfindən işğal olunarkən digər yerlər kimi, Allahyar Əliyev adına Böyük Bəhmənli kənd 2 saylı tam orta məktəbini od vurub yandırmışdılar. Aydındır ki, erməni işğalçıları heç nəyə məhəl qoymadan bütün yaşayış binalarını, səhiyyə ocaqlarını və eləcə də digər yerləri yandırmaqla sanki bizdən qisas almaq istəyirdilər. Nə yaxşı ki, Füzulinin böyük bir hissəsi erməni işğalından 1994-cü ilin yanvarında azad edildi. Horadiz şəhəri daxil olmaqla 22 yaşayış məntəqəsində yaşayış binaları, təhsil və səhiyyə ocaqları yenidən bərpa edildi. Allahyar Əliyev adına 2 saylı orta məktəb də əsaslı surətdə tikilib istifadəyə verilən təhsil ocaqlarındandır. İndi bu məktəbdə hər cür şərait yaradılıb, sinif otaqları, fənn kabinələri müasir texnika və texnologiya ilə təchiz edilib.

Müəllimlərin əziyyəti hədər getmir

Allahyar Əliyev adına Böyük Bəhmənli kənd 2 saylı tam orta məktəbində bu gün 403 şagird təhsil alır. Onların təlim-tərbiyəsi ilə 49 nəfər müəllim məşğuldur. Yəni məktəbin müəllimləri öz bilik və bacarıqlarını sevimli şagirdlərindən heç vaxt əsirgəməyiblər. Ən azından ona görə ki, bu müəllimlərin çoxu saçlarını şagirdlərin elmi biliklərə yiyələnməsi yolunda ağardıblar. Elə ki, onlar çəkdikləri zəhmətlərinin bəhrə verdiyini görürlər, bax onda "xərclədikləri" ömür-gün barəsində peşmançılıq hissi keçirmirlər. Əksinə, şagirdlərinin uğurlarını və qeyri-adi istedadlarını görüb qürur duyurlar. Məktəbin müəllimlərindən Fəxrəddin Yusifov, Gültəkin Abdullayeva, Rəsmiyyə Rzayeva, Hətəm Rzayev, Filyar Məmmədova sözün həqiq mənasında müəllim adını və şərəfini həmişə uca tutur, şagirdlərin qəlbində özlərinə əbədi iz qoyublar. Təbii ki, ömrünü şam kimi şagirdləri yolunda əridən ziyalı müəllimlər heç vaxt unudulan deyil!

Məzunların xoş sorağı

Məktəbin direktoru Həsən Rzayev bizimlə söhbət zamanı deyir ki, bizim təhsil ocağını bitirən yüzlərlə məzun müxtəlif yüksək vəzifələrdə çalışırlar. Onların arasında həkim də var, siyasətçi də, hüquqşünas da. Biz belə məzunlarımızla fəxr edirik. Ötən il bizim məktəbi bitirmiş 10 məzun müxtəlif ali məktəblərin tələbəsi adını qazanıb. Bir daha onların adını, soyadını və qəbul olduqları ali məktəbin ünvanlarını xatırladıram:

Azad Azər oğlu İlqarlı - Azərbaycan Neft Akademiyası; Səmayə Bəhruz qızı İsmayılova - Azərbaycan Pedaqoji Universiteti; Firəngiz Əhliman qızı Əliyeva - Bakı Dövlət Universiteti; Murad Həmid oğlu Abdullayev - Azərbaycan Neft Akademiyası; Güldanə Xanolğan qızı Səfərova - Sumqayıt Dövlət Universiteti; Mürsəl Elsəvər oğlu Mürsəlzadə - Mingəçevir Dövlət Universiteti; Fəridə Qasım qızı İsmayılova - Sumqayıt Dövlət Universiteti; Nurşən Rəhman oğlu Əliyev - Azərbaycan Texniki Universiteti; Nicat Cəlil oğlu Əlizadə - Azərbaycan Neft Akademiyası. Bayaq dediyimiz kimi, biz belə məzunlarımızla qürur duyuruq. Çünki onlar bizim və valideynlərinin başını uca ediblər. Bununla yanaşı, 11 məzunumuz ölkənin müxtəlif orta ixtisas məktəblərinə daxil olublar. Deməli, müəllimlərimizin çəkdiyi əziyyət öz bəhrəsini verir.

Ağır itki

"Hürzad kimi istedadlı, savadlı və tərbiyəli şagirdi itirməkdən ağır dərd ola bilməz". Bu sözləri Həsən müəllim deyir və kövrəlir. Sonra cibindən dəsmalını çıxarır və göz yaşını silir. O, bir il bundan əvvəl dünyasını dəyişmiş 15 yaşlı Hürzad Süleyman qızı İsmayılova barəsində danışır. Fikrini davam etdirərək deyir ki, Hürzadın yeri hər an görünür. Uşaqlar və sinif yoldaşları o, dünyasını dəyişəndən sonra xüsusi guşə də düzəldiblər. Həmin guşəyə onun barəsində yazılan məqalələr və ona aid digər əşyalar qoyulub. Yaşasaydı, 10-cu sinifdə oxuyardı. Yanvarın 26-da Hürzad İsmayılovanın dünyasını dəyişməsinin il dönümü tamam olur. Valideynləri üçün nə qədər ağır itkidisə, bizim üçün də bir o qədər hüznlüdür. Amma bizə təsəlli olan odur ki, bu 15 yaşında qız sanki 70 illik bir ömür yaşadı, kəndimizin tarixində və eləcə də bizim yaddaşımızda silinməz izlər qoydu. Allah ona rəhmət eləsin! Qəbri nurla dolsun! Bu gün də o, məktəbimiz və sinif yoldaşları tərəfindən yad edilir. Yanvarın 26-da hamımız onun məzarını ziyarət edəcəyik. Bəlkə bununla bir təsəlli tapdıq!..

Müsabiqə qalibləri

Bayaq dediyimiz kimi, məktəbdə savadlı və istedadlı şagirdlər kifayət qədərdir. Onlar həm respublika, həm də rayon fənn olimpiadalarında iştirak edərək mükafata layiq görülüblər. Ötən tədris ilində məktəbin iki şagirdi - 9-cu sinif şagirdi İlqar Azər oğlu İlqarlı biologiya fənni üzrə respublika turnirində iştirak etmiş və fəxri yer tutmuşdur. Digər bir şagirdimiz - Zöhrə Bahadur qızı Həsənli "Heydər Əliyev məktəblilərin gözü ilə" inşa müsabiqəsinin qalibi olmuşdur. Təbii ki, bütün bunlar müəllimləri və valideynləri çox sevindirir.

Məktəbin uğurları tək bununla bitmir. Çünki direktor Həsən Rzayev dedi ki, bizim gənclər həm də vətənpərvərlik ruhunda tərbiyə olunub və sabahın döyüşçüləridir. Elə şagirdlərimiz var ki, hər an vətənin müdafiəsinə qalxmağa hazırdır.

Faiq QİSMƏTOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2014.-25 yanvar.-S.17.