Nərgizin "Yersiz cümlələr"i

Türkiyədə yaşayan gənc şairənin ilk kitabı işıq üzü görüb

İstanbulun "İkinci adam yayınları" nəşriyyatı əslən Azərbaycandan olan gənc şairə Nərgiz Qəriblinin şeirlər kitabını bu yaxınlarda çap edib. Sizi əvvəlcə Nərgizlə tanış etmək istəyindəyəm.

Qardaş ölkəyə kövrək addımlarla

Nərgiz Qəribli 1991-ci il aprelin 6-da Sumqayıtda dünyaya gəlib. Sənətçi ailəsində doğulduğundan evdə incəsənətin müxtəlif sahələrini əhatə edən söhbətləri tez-tez dinləyib, yaddaşına köçürüb. Nərgizin atası Şahmar Qəribli istedadlı aktyor kimi kinoda və teatrda maraqlı obrazlar yaradıb, Sumqayıt Dövlət Dram Teatrında həm klassik, həm də müasir əsərlərə quruluş verib. Şahmar bədii yaradıcılıqla da məşğuldu, hekayələr, ssenarilər yazır.

Belə bir mühitdə böyüyən Nərgiz yazmağa lap kiçik vaxtlarından başlayıb, hələ 4 yaşı olanda uydurduğu hekayələri kağıza köçürüb. İlk təhsilini İstanbuldakı liseylərin birində alan Nərgiz dəqiq elmlərə də maraq göstərib. Qardaş ölkənin tanınmış təhsil müəssisələrindən sayılan Balıkesir Universitetinin fizika fakültəsinə daxil olub. III kursdan sonra paralel olaraq hüquq fakültəsində də təhsil alır.

16 yaşından şeirlər yazan Nərgiz Balıkesirdə nəşr olunan "Kartal" qəzeti ilə sıx əməkdaşlıq edir. "Kartal" onun şeir və tərcümələrinə geniş yer ayırır.

Şeir - dünyanın

ən məşəqqətli işi

İndi də Nərgiz Qəriblinin ilk şeirlər kitabı ilə sizi tanış edim. İstanbulda işıq üzü görən "Yersiz cümlələr"i gənc müəllif özü belə tanıdır: "... "Cocukluğumdan bəri" sözləri ilə başlayan cümlələri işlətməkdən heç xoşlanmıram. Amma nə etməli, insan məcbur qalınca bu klişenin də qurbanı olur. 4 yaşından ailəmin yardımı ilə yazı-pozu aləminin içindəyəm. O dönəmlərdə hekayələr yazırdım. 16 yaşımdan isə şeirlə, poeziya aləmi ilə əlləşirəm. "Nədən ədəbiyyata hekayə ilə deyil, şeirlə gəlmək istədin?"- deyə sorsanız "Şeir dünyanın ən məşəqqətli işidir"-deyə bilərəm sizə.

Bəzən oxucu üçün üç sətirlə belə dünyalar yarada bilirsiniz, ya da yaratmağınız gərəkir. Mən də bunu yapmaq istədim. Bu kitab 7 illik bir çalışmamım, əməyimin bəhrəsidir..."

"Yersiz cümlələr" kitabında gənc şairənin "Ayrılığın gecələri zor", "Tanrı və qul", "Cocuk olmaq", "İstanbul", "Özləm", "Melodi", "Sonbahar", "Oyun", "Yalnızlıq peronu" kimi maraqlı şeirləri toplanıb.

Bu da Nərgiz Qəriblinin qələmə aldığı şeirlərdən biri- "Sonbahar"

Sonbahar saçlarını taramağa başlamış yine,

Hüzünlü bir sessizlik, sokaklarda geziniyor,

Ben de emanet ettim acılarımı sonbahara...

Emanetime iyi bakacağına söz verdi...

Sessizligin de, soğukluğun kadar içimi acıtıyor...

Beri sen yalnız bırakma sonbahar!

"Yersiz cümlələr"i çap edən "İkinci adam yayınları" nəşriyyatı İstanbulda müəllifin imza gününü keçirib. Yaxın günlərdə daha bir neçə şəhərdə gənc şairə Nərgiz Qəriblinin oxucularla görüşü planlaşdırılır.

Ədalət.-2015.-2 aprel.-S.5.