Könül istər ki...

Tanınmış teleaparıcı: "Bu, bir az riskli işdir"

"Özüm Murad Dadaşovdan xahiş etdim ki, ifaya bir az duz-istiot qatsın"

Bir həftədən də çox çəkən Novruz tətili telekanallarımızı təftiş etmək üçün əlverişli şərait yaratdı. Sonda rastlaşdığımız mənzərə əvvəlkilərdən heç nə ilə fərqlənmədi. Telekanallar "O olmasın, bu olsun", "Arşın mal alan", "Görüş", "Ulduz", "Yol əhvalatı", "Bəxt üzüyü", "Bəyin oğurlanması", "Papaq" kimi milli filmlərimizi təkrar-təkrar göstərməklə bu bayramı da belə yola verdilər. Uzun illər öncə hazırlanmış uğurlu televiziya tamaşalarına baxmaqdan özgə əlacımız olmadı. Efirimiz yenə "Evləri köndələn yar"ın, "Yaşıl eynəkli adam"ın ümidə qaldı.

Tamaşaçıları təəccübləndirən, maraq oyada bilən verilişlər isə nadir halda rastımıza çıxdı. Onlar barədə söhbət açası olsaq, İctimai Televiziyada Könül Arifqızının "Ötən əsrin nəğmələri"ni qeyd etməliyik. "Bir mahnının tarixçəsi", "Ötən əsrin nəğmələri" layihəsi ilə tamaşaçı rəğbətini qazanan Könül xanım bayram günlərində etdiyi daha bir yeniliklə efir məkanında fərqləndi. Bu dəfə populyar estrada aktyorları xalq və bəstəkar mahnılarını "Ötən əsrin nəğmələri"ndə təqdim etdilər. Üstəlik aktyorların milli geyimləri, dekorlar verilişdə əsl bahar və bayram ovqatı yaratdı. Könül istər ki, belə verilişlər daha çox olsun.

Baxımlı telelayihələrin müəllifi kimi tanınan Könül Arifqızı "Ötən əsrin nəğmələri"ndə etdiyi yenilik barədə danışır.

- Könül xanım, müəllifi və aparıcısı olduğunuz "Bir mahnının tarixçəsi" telelayihəsi barədə düşüncələrinizi, gələcək işlərinizlə bağlı planları bir neçə il öncə "Ədalət"in oxucuları ilə bölüşmüşdüz. İndi isə istərdim "Ötən əsrin nəğmələri"ndən danışaq...

- "Bir mahnının tarixçəsi" bizim efir məkanında böyük maraqla qarşılandı. Qazanılan uğur məni layihənin müəllifi kimi məni hədsiz sevindirir. Deməli, çəkilən zəhmət, bu işdə mənə güvənən insanların dəstəyi boşuna getmədi. Yaradıcı iş zaman-zaman yenilik istəyir, televiziyanın dinamikliyi bunu daha çox zəruri edir. "Bir mahnının tarixçəsi"nin də belə bir yeniliyə ehtiyacı var idi. 3 il öncə layihənin formatında dəyişiklik etmək qərarına gəldim. Çünki "Bir mahnının tarixçəsi"nin hər bir buraxılışı bir sənədli film kimi hazırlanırdı və bu çox ağır zəhmət tələb edən bir iş idi. Etiraf edək ki, araşdırma, tədqiqat xarakterli verilişlərin tamaşaçıları bu gün bizdə o qədər də çox deyil. Bu üzdən də sadə, tamaşaçının daha asan qavraya biləcəyi bir formata üstünlük vermək istədim.

"Ötən əsrin nəğmələri" belə yarandı. İzləyicilərin də gördüyü kimi, indi verilişdə haqqında söhbət açdığım mahnını bu gün üzdə olan şou-biznes nümayəndələrindən biri ifa edir.

- "Ötən əsrin nəğmələri"nin bayram buraxılışları da maraqla qarşılanır...

- Müğənnilərlə teleaparıcıların retro mahnılardan ibarət duetləri uğurlu alınırdı. Bu Novruz bayramı ilə bağlı buraxılışda isə duetləri trio ilə əvəz etmək qərarına gəldim və həm xalq, həm də bəstəkar mahnılarını gənc nəslə mənsub, lakin tanınmış estrada aktyorlarının ifasında, peşəkar tarzən və kaman ustasının müşayiəti ilə lentə aldırdım. Layihənin daimi izləyiciləri bu gün yetərincə populyarlıq qazanmış aktyorları xanəndə kimi də tanıdılar.

- Aktyorların seçimi necə aparıldı?

- Müəllifi olduğum layihələrdə həmişə işin ən yaxşısını görməyə, imkanlar çərçivəsində maksimum effekt yaratmağa çalışmışam. İctimai Televiziyanın rəhbərliyi zövqümə və bacarığıma bələd olduqlarından seçim məsələsini mənim ixtiyarıma buraxır. Sağ olsunlar, bu dəfə də mənə inandılar, mən də onların etibarını doğrultmağa çalışdım.

- Və layihənin daimi tamaşaçıları Tahir və Cabir İmanov qardaşlarını, Murad Dadaşovu, Tünzalə Əliyevanı, Əkbər Əlizadəni, Ülviyə Əliyevanı, Müşfiq Şahverdiyevi və Fərda Xudaverdiyevi xanəndə kimi də gördülər...

- Bayaq qeyd etdiyim kimi, bəzən ənənəni pozmaq, yenilik etmək lazım gəlir. Müğənni və teleaparıcılarla hazırladığım duetlərin pis oxşarı artıq qonşu kanallarda da görünməyə başlamışdı və sözün açığı, bu mənim heç xoşuma gəlmirdi. Ona görə də estrada aktyorları ilə variantı seçdim, sevinərəm ki, bu dəfə də uğur əldə etmək mümkün oldu. Seçdiyim aktyorlar da sağ olsunlar ki, təklifimi qəbul edib bu layihədə canla-başla iştirak etdilər. Peşəkar musiqiçilərlə əl-ələ verib tamaşaçılara bayram sevinci yaşatdılar.

- Aktyorlardan təklifinizi geri çevirən oldumu?

- ATV kanalında yayımlanan "Bozbaş Pictures" və "Şirin çay"dan tanınan gənc aktyor Nicat Rəhimovu da trioda görmək istəyirdim, lakin alınmadı.

- Ciddi bir səbəb oldu, yoxsa...

- Nicat razılıq vermişdi və həvəslə gəlib çəkilmək istəyirdi, sadəcə rol aldığı yeni filmin Naxçıvanda keçirilən təqdimat mərasimində iştirak etdiyi üçün bizimlə birgə ola bilmədi.

- Verilişdə səsyazma prosesindən də görüntülər yayımlandı və belə məlum oldu ki, iş prosesində aktyorlar həm gərgin, həm də məzəli anlar yaşayıblar...

- Səsyazma özü çox ciddi bir prosesdir, orada zarafat eləmək mümkün deyil. Mən pultun arxasında oturan mütəxəssislərin və dəvət etdiyim aktyorları müşayiət edən peşəkar musiqiçilərin vaxtına dəyər verdiyimdən məsələyə olduqca ciddi və həssas yanaşırdım. Sadəcə, "Ötən əsrin nəğmələri"nin əvvəlki bayram buraxılışlarında olduğu kimi, bu dəfə də səsyazma bitəndən sonra operatorların içəri girməsinə icazə verdim və tamaşaçıların da gördüyü həmin epizodları quraşdırdıq. Əslində layihənin mətbəxinə aid sirlər olduğu üçün bütün bu detalları açıqlamamaq da olardı. "Ədalət"in oxucularına istisna etmək olar...

- Sadə tamaşaçı kimi bir detalla bağlı fikrimi bildirə bilərəm?

- Əlbəttə, buyurun.

- Layihənin budəfəki bayram buraxılışını izləyənlər bilirdi ki, trio ilə mahı ifa edənlər aktyorlardı, onlardan peşəkar xanəndələrə məxsus səviyyəni tələb etmək də mümkün deyil. Amma mənə elə gəldi ki, istedadlı şoumen Murad Dadaşovun aktyorluq bacarığı "Meyvələrdən üç meyvə var..." xalq mahnısını ifa etməyə bir balaca mane oldu.

- Amma mən tam əksini düşünürəm, əslində Murad bəydən mən özüm xahiş elədim ki, ifaya bir az necə deyərlər, duz-istiot qatsın. Çünki layihəm özü bunu tələb edirdi, iştirakçı aktyorlar xanəndəliyi oynamalı idilər. Murad Dadaşov da istedadlı bir aktyor kimi bunu gözəl bacardı. Zövqlər müxtəlif olduğu üçün bu məsələdə mübahisə etməmək də olar.

Layihədə Tahir İmanov babası Süleyman Ələsgərovun "Sevimli Şuşam", Cabir İmanov Ələkbər Tağıyevin "Sənsən", Murad Dadaşov "Meyvələrdən üç meyvə var...", Tünzalə Əliyeva "Qoy yarım gəlsin, ay nənə", Fərda Xudaverdiyev "Aman Tello" xalq mahnılarını, Müşfiq Şahverdiyev Qulu Əsgərovun "Dolanaram başına", Əkbər Əlizadə Qara Qarayevin "Səni arzularam", Ülviyyə Əliyeva isə üç xalq mahnısının popurisini oxudular. Bir daha onların hər birinə təşəkkür edirəm.

- Belə bir telelayihəni qəzetlərdə və elektron mediada çalışan jurnalistlərlə də reallaşdırmaq istəyiniz varmı?

- Belə bir planım yoxdur. Çünki bayram buraxılışları ildə cəmi bir-iki dəfə olur, onları da daha çox televiziya aparıcılarının iştirakı ilə hazırlamağa çalışıram. Qəzetdə çalışan jurnalistlərlə belə bir layihə eləmək çox riskli işdir.

- Niyə?

- Çünki qəzet jurnalistlərini geniş tamaşaçı kütləsi o qədər də yaxşı tanımır, amma televiziyada çalışanlar, aparıcılar onlara nisbətən daha populyardı. Ola bilsin ki, bu fikirlərim qəzetlərdə, portallarda çalışan həmkarlarımın xoşuna gəlməsin və məndən incisinlər.

- Bütün həmkarlarımın əvəzinə danışa bilmərəm, amma şəxsən mən bu sözlərdən incimirəm. Layihəyə dəvət etsəniz də gəlmərəm.

- Niyə?

- Səsim yoxdur axı...

Ədalət.-2015.-4 aprel.-S.11.