ZAQATALA: TƏBİƏTİN FÜSUNKARLIĞI VƏ MODERNLƏŞMƏ

Layihənin istiqaməti: Regionların sosial-iqtisadi inkişafının təşviq edilməsi

Sanki bir ilğımdır,

şirin röyadır

İlk baharda bu yerlərin gözəlliyi daha doyulmaz , daha füsünkar olur. Heç ayrılmaq istəmirsən bu dağlardan, bu düzlərdən, bu meşələrdən... Cünki hardan baxsan, hara baxsan gözlərin sevinir, qəlbin xoş duyğulara qoşulub sərməst qalır. Bir də çiçəklərin, çəmənlərin, meşələrin yaz qoxusu, yaz nəfəsi...

Və bir də aşıb-daşan bu ilk bahar sevdasının ən şirin nəğməsi... Cazibədar, bəlkə də sehrli görkəmi, duruşu ilə təbiət gözəlliklərinə "Mən burdayam!" deyən həmişəbahar Zaqatala şəhəri... Qədimliklə müasirliyin bütünləşdiyi Vətən torpağı, Vətən şərqisi.

Gedib gəzənlər bilir, Zaqatala uzaq bir yolun dağlara qovuşan yerində qəfil görünüb bərq vuran nəhəng xəyala bənzəyir. Hərdən sənə elə gəlir ki, bütün bunlar şirin bir yuxudur, ya bəlkə də ilğımdır, ruhsal aldanışdır. Ancaq elə ki, uca dağların, qədim meşələrin qoynuna alıb sanki pis gözlərdən, pis niyyətlərdən qoruduğu bu doğma şəhərin yaşamına, axınına qovuşursan, hər şeyin gerçək olduğuna arxayınlaşırsan.

Prezident qayğısına yüksək fəallıq

nümunəsi

İlk baharın bu çağlayan günlərində doğrudan da Zaqatala rayonu daha gözəl, daha cazibədar görünür, O da məlumdur ki, son illər daha cox işlər görülən Zaqatala respublikanın bütün istiqamətlərdə inkişaf etmiş ən böyük rayonlarından biridir. Ölkənin hər yerində olduğu kimi 2014-cü ili uğurlarla yola salan Zaqatala rayonu 2015-ci ilin də ilk aylarından Dövlət Proqramının icrasında və digər istiqamətlərdə əvvəllərdəki kimi nümunə göstərir. Rayon rəhbərliyi və sakinlər Zaqatalanın daha da inkişafı üçün bütün imkanlardan maksimum istifadə etməyə çalışır və göstərilən qayğı və diqqətə görə Azərbaycan Respublikasının Prezidenti cənab İlham Əliyevə daim minnətdar olduqlarını bildirirlər.

Bütün bunlar barədə 2015- ci ilin birinci rübünün sosial-iqtisadi inkişafının yekunları və qarşıda duran vəzifələrə həsr olunmuş iclasda Zaqatala Rayon İcra Hakimiyyətinin başçısı Mübariz Əhmədzadə məruzə ilə çıxşında geniş məlumat vermişdir.

Dövlət Proqramının uğurlu icrası

Regionların inkişafı sahəsində qəbul edilmiş və uğurla həyata keçirilmiş dövlət proqramlarında, habelə regionların sosial-iqtisadi inkişafına dair əlavə tədbirlərlə bağlı sərəncamlarda nəzərdə tutulmuş vəzifələrin icrası ölkədə qeyri-neft sektorunun davamlı inkişafına, regionlarda kommunal xidmətlərin və sosial infrastruktur təminatının keyfiyyətinin yüksəldilməsinə, sahibkarlıq mühitinin daha da yaxşılaşdırılmasına, investisiya qoyuluşunun artmasına, yeni müəssisələrin və iş yerlərinin açılmasına, nəticədə əhalinin məşğulluğunun artırılmasına və yoxsulluq səviyyəsinin azaldılmasına təkan vermişdir.

Respublikada aparılan uğurlu iqtisadi siyasətin nəticəsi olaraq 2015-ci ilin birinci rübündə Zaqatalada da iqtisadiyyatın dinamik inkişafına nail olunmuş, "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramının icrası istiqamətində işlər davam etdirilmiş, ümumi məhsul istehsalında müəyyən irəliləyişlər olmuş, 401-i daimi olmaqla 418 yeni iş yeri açılmışdır.

2015-ci ilin birinci rübündə büdcəyə vergi və tədiyyələr üzrə 1,8 milyon manat vəsait daxil olmuş, proqnoz tapşırıqlar 118,5 faiz icra edilmişdir. Gəlirlərin 6,7 faizi dövlət sektorunun, 93,3 faizi qeyri-dövlət sektorunun payına düşmüş, vergi qanunvericiliyini pozan 369 vergi ödəyicisinə 193,8 min manat həcmində maliyyə sanksiyası tətbiq edilmişdir.

Hesabat ilində mərkəzləşdirilmiş xərclərdən 4,1 milyon manat subsidiya alınmış, büdcə xərcləri 5,0 milyon manat və ya 90,0 faiz icra olunmuşdur.

Ölkəmizin hər yerində olduğu kimi, Zaqatalada da əhalinin rifah halının, onun maddi təminatının yaxşılaşdırılması, sosial müdafiənin gücləndirilməsi, ünvanlı sosial yardımların, pensiyaların, əməkhaqlarının vaxtında verilməsi, aztəminatlı ailələrə qayğının artırılması daim diqqət mərkəzində saxlanılmışdır.

2015-ci ilin birinci rübündə rayonda orta aylıq əməkhaqqı və orta aylıq pensiyanın məbləğində artım müşahidə edilmiş, 133 pensiya işi təyin edilmiş, 16625 pensiyaçıya xidmət göstərilmiş, 1,4 milyon manat məcburi dövlət sosial sığorta haqları yığılmış, proqnoz tapşırıqlar 87,0 faiz icra olunmuş, 30 hüquqi və fiziki şəxsə qarşı maliyyə sanksiyaları tətbiq edilmişdir.

2015-ci ilin birinci rübündə rayonda 4280 nəfərə sosial müavinət, 371 nəfərə prezident təqaüdü, 2027 ailənin 8651 üzvünə (hər ailəyə orta hesabla 160,0 manat) ünvanlı sosial yardım verilmiş, 216 nəfər tək-kimsəsiz qocalara xidmət göstərilmişdir.

İl ərzində məşğulluq xidməti orqanları tərəfindən 184 nəfər işaxtaran kimi qeydiyyata alınmış, 77 nəfər münasib işlə təmin olunmuş, 4 nəfərə işsiz statusu verilərək işsizlik müavinəti təyin edilmişdir.

Rayonda işəgötürənlər tərəfindən əmək qanunvericiliyinə əməl olunmasına dövlət nəzarəti gücləndirilmiş, işverənlər tərəfindən 15-dən çox qanun pozuntusu aşkar edilərək müvafiq tədbirlər görülmüşdür.

Aqrar sektorda yeni tendensiyalar

Son illərdə aqrar sektorda həyata keçirilmiş məqsədyönlü tədbirlər sayəsində rayonda 2015-ci ilin I rübündə kənd təsərrüfatı məhsulları istehsalı 10,0 faiz artaraq 10,9 milyon manata çatmışdır. Rayonda 2015-ci ilin məhsulu üçün 12148 ha (+66 ha) sahədə payızlıq taxıl, o cümlədən 8417 ha (+2 ha) sahədə buğda sahələrinə aqrotexniki xidmət göstərilmiş, 3642 ha (+128 ha) sahədə yazlıq bitkilər olmaqla, 1383 ha (+61 ha) sahədə yonca, 1100 ha (+27 ha) sahədə kartof, 836 ha (+25 ha) sahədə tərəvəz, 308 ha (+13 ha) sahədə qarğıdalı, 15 ha (+2 ha) sahədə bostan bitkiləri əkilmişdir.

(ardı gələn sayımızda)

Məzahir ƏHMƏDOĞLU

Ədalət.-2015.-25 aprel.-S.4.