VƏTƏNİN BALAKƏN ADLI İNCİSİ

Layihənin istiqaməti: Regionların sosial-iqtisadi inkişafının təşviq edilməsi

"Mən Azərbaycanın hər bir vətəndaşının prezidentiyəm. Bizim məqsəd və məramımız da hər bir vətəndaşımızın daha yaxşı yaşaması və daha yaxşı təmin olunmasıdır".

Azərbaycan Respublikasının Prezidenti

İlham Əliyev

(əvvəli ötən saylarımızda)

Məktəbdənkənar təhsil müəssisələrinin fəaliyyəti də ətraflı təhlil edilməli, gələcək idmançıların yetişdirilməsi üçün şahmat və idman məktəblərinin qruplarının düzgün təşkil edilməsi və fəaliyyətlərinin günün tələbləri səviyyəsində qurulması, məşqçi-müəllimlərin peşəkarlıq səviyyəsinin artırılması diqqət mərkəzində saxlanılmalıdır.

Rayon təhsil şöbəsi məktəbdənkənar təhsil müəssisələrinin fəaliyyətinə nəzarəti gücləndirməli , bu sahədə dönüş yaradılmasına nail olmalıdır.

RİH-nin bu sahəyə nəzarət edən aidiyyəti şöbəsi isə öz növbəsində məktəbdənkənar müəssisələrin fəaliyyətini ətraflı təhlil etməklə məsələni RİHB yanında Şuranın müzakirəsinə çıxarmalıdır.

Heydər Əliyev Mərkəzində müasir Azərbaycan tarixinin ümumtəhsil məktəblərində daha səmərəli öyrənilməsi məqsədi ilə Təhsil Nazirliyi tərəfindən müəyyən edilmiş mövzulara uyğun dərslərin XI sinif şagirdlərinə tədrisi təşkil olunmuşdur. 2015-ci ilin I yarısında 35 ümumtəhsil məktəbindən 761 nəfər şagird dərslərdə iştirak etmişdir.

Əhaliyə tibbi xidmətlərin göstərilməsi sahəsində müxtəlif ixtisaslı həkimlərdən ibarət briqadalar mütəmadi ucqar kəndlərdə olmuş, əhali arasında həm müayinə, həm də tibbi maarifləndirmə işləri aparmışlar. Ötən müddət ərzində rayon üzrə xüsusi təhlükəli infeksiyalar qeydə alınmamışdır.

İlin birinci yarısında rayonun bütün mədəniyyət müəssisələrində dövlət bayramlarının, tarixi və əlamətdar günlərin, ulu öndər Heydər Əliyevin anadan olmasının 92 illiyinə həsr olunmuş müxtəlif tədbirlərin keçirilməsi təmin edilmişdir. Heydər Əliyev Mərkəzində 79 nikah bağlanaraq yeni ailələrin təməli qoyulmuş, Mərkəzə gələnlərin sayı 4712 nəfər (2014-cü ilin müvafiq dövründə 3771 nəfər) olmuşdur.

Birinci Avropa Oyunları

və rayon idmançılarının

böyük uğurları

Hesabat dövrünün ən yaddaqalan hadisəsi tarixdə ilk dəfə keçirilən Birinci Avropa Oyunlarının məşəlinin ölkəmizin şəhər və rayonlarını qarış-qarış dolaşaraq Balakən rayonunda da alovlanması olmuşdur.

Dünya arenasında artıq özünə layiqli yer tutan ölkəmizin 2015-ci ilin iyun ayında Bakıda keçirilən ilk Avropa Oyunlarına ev sahibliyi etməsi ölkəmizin hər yerində olduğu kimi, Balakən rayonunda da böyük bir idman hadisəsinə, bayram sevincinə səbəb olmuşdur.

Aprelin 26-da cənab Prezident İlham Əliyev tərəfindən Bakı şəhərindəki Atəşgah məbədində alovlandırılan və ölkəmizin bütün şəhər və rayonundan keçən məşəl estafeti mayın 23-də respublikanın şimal-qərb qapısı olan Balakən rayonunda da davam etdirilmişdir. Məşəl estafeti zamanı 10 məşəlçi Heydər Əliyev prospekti ilə hərəkət edərək məşəli növbə ilə bir-birinə ötürməklə 2700 metrdən artıq məsafə qət etmişlər. Avropa oyunlarının məşəli ulu öndərin adını daşıyan parkın mərkəzində quraşdırılmış səhnədə alovlandırılmışdır.

2015-ci ilin I yarımili ərzində 21 respublika səviyyəli birincilik, çempionat və turnirlərdə Balakən rayonundan 170 idmançının iştirakı təmin edilmişdir.

Həmin yarışlarda idmançılar 11 dəfə I yeri, 6 dəfə II yeri və 15 dəfə III yeri tutmuşlar.

12-28 iyun tarixlərində Bakıda keçirilən Birinci Avropa Oyunlarında yunan-roma güləşi üzrə Rəsul Çunayev, güllə atıcılığı üzrə Rəsul Məmmədov, diskatma üzrə isə İsmayıl Əliyev iştirak etmişdir. Çox sevindirici haldır ki, Azərbaycanın I Avropa Oyunlarında uğurla iştirak edən idmançıları sırasında balakənli, yunan-roma güləşi üzrə Oyunların qızıl mükafatçısı Rəsul Çunayev də var.

O, I Avropa Oyunlarında qazandığı yüksək nailiyyətə və Azərbaycan idmanının inkişafında böyük xidmətlərinə görə dövlət başçısının 29 iyun 2015-ci il tarixli Sərəncamı ilə "Şöhrət" ordeninə layiq görülmüşdür. Rəsul Çunayevin əldə etdiyi yüksək nəticələr Balakəndə idmanın kütləviliyinə və gənclərin bu sahəyə cəlb olunmasına müsbət təsir göstərir.

Cinayətkarlığa qarşı

mübarizədə uğurlu nəticələr

2015-ci ilin birinci yarısında rayon polis şöbəsi tərəfindən 115 cinayət hadisəsi qeydə alınmış, onlardan 93,3 faizinin üstü açılmışdır. Əvvəlki ilin müvafiq dövrü ilə müqayisədə ümumi cinayətlərin sayı 52 fakt artmışdır ki, bu da əsasən narkotiklərin qanunsuz dövriyyəsi ilə bağlı və mülkiyyət əleyhinə baş vermiş cinayətlərin hesabına olmuşdur.

Narkotiklərlə bağlı 40 cinayət faktı aşkar olunmuş, keçirilən əməliyyat tədbirləri nəticəsində 16 kq 311 qr narkotik vasitə dövriyyədən çıxarılmışdır.

Onlardan 7 fakt narkotik vasitələrin satışı, 16 fakt qanunsuz əldə edilib saxlanılması, 17 fakt əkib-becərmə ilə bağlı olmuşdur.

Aşkar edilmiş cinayətlərin sayı ötən ilin müvafiq dövrü ilə müqayisədə 23 fakt çox olmuşdur.

Qeyd olunmalıdır ki, hesabat dövründə cinayətkarlığa qarşı mübarizə və ictimai asayişin təmin olunması sahəsində, həmçinin, narkotik vasitələrin və psixotrop maddələrin qanunsuz dövriyyəsinə qarşı rayon polis şöbəsi tərəfindən effektli mübarizə təşkil olunmuşdur. Narkotik vasitələrin və psixotrop maddələrin qanunsuz dövriyyəsinə qarşı aparılan mübarizə işinin təkmilləşdirilməsi mədsədilə bu tədbirlərdə əhalidən də vətəndaş mövqeyi və fəallıq tələb olunur.

Məzahir ƏHMƏDOĞLU

Ədalət.-2015.-28 avqust.-S.3.