Cəlilabad-Vətən bağı al-əlvandır

"...Son illər Cəlilabadda həm iqtisadi, həm də sosial sahədə çox böyük işlər görülüb. Gözəl obyektlər tikilib, parklar, xiyabanlar salınıb".

İlham Əliyev Azərbaycan Respublikasının Prezidenti

Bərəkətli torpağı, zəhmətkeş insanları ilə tanınan Cəlilabad Azərbaycanın son illərdə qazandığı uğurlara öz töhfəsini verməkdədir. Rayonun bütün sahələrdə əldə etdiyi nailiyyətlər belə deməyə əsas verir.

Görülən işlərə yüksək qiymət

Cəlilabadlılar ölkəmizin daha da inkişaf etməsi, iqtisadi cəhətdən qüdrətlənməsi üçün əllərindən gələni əsirgəmirlər. Son illərdə olduğu kimi, bu ilin artıq geridə qalan ayları ərzində rayonda çox böyük həcmli görülüb, abadlıq-quruculuq işləri yeni vüsət alıb. Rayon ictimaiyyəti, ziyalılar tez-tez bir araya gəlir, işgüzar müzakirələr aparır, qarşıda görüləcək tədbirləri planlaşdırırlar.

Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş geniş iclas da bu ruhda keçib. Yığıncaq iştirakçıları xüsusi ilə qeyd ediblər ki, ilin doqquz ayı Cəlilabad rayonunun timsalında da bir çox əlamətdar hadisələrlə zəngin olub. Ölkə başçısının Cəlilabada növbəti səfərini, müxtəlif təyinatlı yeni obyektlərin açılışında iştirak etməsini, sakinlərlə səmimi görüşlərini rayon əhalisi fəxr və sevinc hissi ilə xatırlayır. 2003-cü ildən sonra yeddinci dəfə Cəlilabada səfər edən Azərbaycan Prezidenti İlham Əliyev budəfəki gəlişində "Heydər" parkında və "Heydər Əliyev seyrəngahı"nda yenidənqurma işləri ilə tanış olub, Ümummilli Liderin adını daşıyan Mərkəzə baş çəkib, Heydər Əliyev Fondunun təşəbbüsü ilə inşa edilmiş körpələr evi-uşaq bağçasının, Alar-Təzəkənd-Üçtəpə-Əliqasımlı-Cəfərxanlı avtomobil yolunun və Göytəpə şəhərində Heydər Əliyev adına park-bulvarın açılışında iştirak edib. Dövlət başçısı rayonun qabaqcıl müəssisələrindən sayılan "Avanqard" MMC-nin taxılçılıq təsərrüfatının işi ilə yaxından maraqlanıb. Dövlət başçısının görülən işlərə yüksək qiymət verməsi cəlilabadlıları yeni uğurlar qazanmağa, daha böyük zəfərlər qazanmağa ruhlandırır. Prezidentin etimadını doğrultmaq üçün bütün qüvvələr səfərbərliyə alınaraq "Azərbaycan Respublikası regionlarının sosial-iqtisadi inkişafı Dövlət Proqramı"nda nəzərdə tutulan tədbirlərin icrasına yönəldilib. Yığıncaqda bir daha qeyd edilib ki, ötən dövr ərzində abadlıq və tikinti-quruculuq işləri Cəlilabad Rayon İcra Hakimiyyətinin fəaliyyətində əsas prioritet sahə olub, bir sıra sosial və istehsal təyinatlı obyektlərin tikintisi başa çatdırılıb.

İstifadəyə verilən ən mühüm obyektlərdən biri regionda analoqu olmayan yeni Heydər Əliyev Mərkəzidir. İnşasına 2014-cü ildə başlanan və ümumi sahəsi 8800 kvadratmetr olan Mərkəzdə Ulu Öndərin həyat və fəaliyyətinin müxtəlif dövrlərini əks etdirən kitablar, fotolar, fəxri diplomlar və digər sənədlər sərgilənir. Mərkəzdə həmçinin 110 kvadratmetr sahəsi olan sərgi salonu, 700 yerlik böyük və kiçik konfrans zalları, amfiteatr, nikah salonu, yeni ailə quranlara psixoloji məsləhət, ana və uşaq, geyim, qrim, milli rəqs, gimnastika və aerobika, xalça və tikiş otaqları, məntiqi təfəkkür, kompüter və xarici dil kursları, gənclər, şən və hazırcavablar klubları, rəsm-heykəltəraşlıq studiyası, müasir formatlı 3D kinozalı, fotostudiya, adi və elektron kitabxanalar, internet-kafe də fəaliyyət göstərir. Orijinal üslubda inşa edilən və rayonun ümumi görünüşünə əlavə çalarlar qatan Mərkəz həm Ulu Öndərin zəngin irsini və dərin dövlətçilik ənənələrini öyrənməyə imkan verir.

Bir məqamı da vurğulamaq yerinə düşər, uşaqların sosial müdafiəsinin gücləndirilməsi, asudə vaxtlarının səmərəli təşkili və gələcəkdə intellektual qüvvə kimi yetişmələri üçün dövlətimiz tərəfindən mühüm tədbirlər görülür. Azərbaycanın birinci xanımı Mehriban Əliyevanın rəhbərlik etdiyi Heydər Əliyev Fondu bu sahədə çoxlu layihələr reallaşdırıb. Həmin işlərin ardıcıl xarakter aldığını nümayiş etdirən faktlardan biri də Cəlilabad şəhərində hər biri 100 yerlik 2 körpələr evi-uşaq bağçasının istifadəyə verilməsidir. Həmin ikimərtəbəli məktəbəqədər müəssisələr müasir mebel dəstləri ilə təchiz olunub, yataq və oyun otaqları balacaların zövqünə uyğun hazırlanıb, balacaların normal qidalanması üçün bütün tədbirlər görülüb.

Göz oxşayan abadlıq

Azərbaycanda yol-nəqliyyat infrastrukturunun yenidən qurulması, yeni yolların salınması, digərlərinin isə əsaslı şəkildə yenidən qurulması ilə bağlı layihələr uğurla davam etdirilir. Beynəlxalq və respublika əhəmiyyətli magistral yolların salınması ilə yanaşı yeni əhəmiyyətli, rayon və kənddaxili yolların müasir səviyyəyə çatdırılmasına xüsusi diqqət yetirilir. Dövlət başçısının tapşırığına uyğun olaraq mövcud avtomobil yollarının əsaslı təmiri və ya yenidən qurulması ümumilikdə regionların sosial-iqtisadi inkişafına mühüm töhfələr verir.

Rayonun Alar-Təzəkənd-Üçtəpə-Əliqasımlı-Cəfərxanlı avtomobil yolu da bu baxımdan mühüm əhəmiyyət daşıyır. Prezident İlham Əliyevin sərəncamlarına əsasən ayrılmış maliyyə vəsaiti hesabına tikintisinə 2014-cü ilin mayında başlanan bu yolun inşası yüksək səviyyədə və keyfiyyətlə aparılıb. Yolun ümumi uzunluğu 21 kilometr, eni isə 8 metrdir. Yola 130 min kvadratmetrlik ikiqat asfalt döşənib. Altı yaşayış məntəqəsini əhatə edən yol 23 mindən çox əhaliyə xidmət göstərəcək. Yolun istifadəyə verilməsi sakinlərin rahat və təhlükəsiz hərəkətini təmin etməklə yanaşı həmin kəndlərin inkişafında da mühüm rol oynayacaq.

Cəlilabadda rayon mərkəzi ilə yanaşı digər yaşayış məntəqələrinin də abadlaşdırılmasını diqqət mərkəzindədir. Göytəpə şəhərində salınan 30 min kvadratmetrlik Heydər Əliyev adına park-bulvar bu diqqətin təzahürlərindən biridir. Park-bulvarda Ümummilli Lider Heydər Əliyevin abidəsi ucaldılıb, 2 artezian quyusu qazılıb, musiqili fəvvarə, müasir işıq dirəkləri və rahat oturacaqlar quraşdırılıb, 15 min kvadratmetr sahədə isə yaşıllıq zolağı var. Parkın ətrafına 5 min kvadratmetrlik asfalt döşənib, yeni elektrik xətləri çəkilib, yaxınlıqdakı evlər və ictimai obyektlər abadlaşdırılıb. Burada sakinlərin istirahətini dolğun və mənalı təşkil etmək məqsədilə bütün zəruri işlər görülüb.

Eyni zamanda, daxili imkanlar hesabına Ələt-Astara magistral yolunun Göytəpə şəhər, Alar, Qarazəncir və Muğan kəndlərinin ərazisindən keçən hissəsində uzunluğu 23 kilometr olan 55,2 min kvadratmetrlik dekorativ hasarlar yenidən qurulub, vətəndaşlara məxsus 500-dən çox darvazalar eyni formalı və müasir görkəmli darvazalarla əvəz edilib, xaricdən gətirilən 300-ə qədər işıqlandırma dirəkləri quraşdırılıb.

Sentyabrda rayon prokurorluğunun binası, habelə Göytəpə şəhərində 69 saylı Cəlilabad-Masallı-Biləsuvar dairə seçki komissiyası üçün yeni inzibati bina və parkın tikintisi ilə əlaqədar sökülən ikimərtəbəli mənzilin əvəzinə tikilən yeni yaşayış binası istifadəyə verilib. Göytəpə şəhərində mədəniyyət mərkəzinin və idman kompleksinin tikintisinə başlanılıb.

(Ardı var)

E. CƏBRAYILOĞLU

Ədalət.-2015.-8 dekabr.-S.7.