"Gülüstan" ədəbi məclisi 180

Mütəfəkkir, tarixçi, şair A.Bakıxanov Qüdsi tərəfindən yaradılan "Gülüstan" ədəbi məclisinin bu yaxınlarda 180 illiyi qeyd edilib. Quba rayonunda fəaliyyət göstərən məclisin sədri pedaqoq-jurnalist Şıxəmməd Seyidməmmədovdur. Eyni zamanda, bu günlərdə "Gülüstan" ədəbi məclisinin 40-a yaxın üzvünün yazılarını əhatə edən 7-ci toplusu çapdan çıxmışdır. 258 səhifəlik bu kitabda 47 müəllifin şeiri yer alıb. Kitabdan bəzi nümunələri təqdim edirik.

Tahir Saleh

Dərband "Gülüstan" ədəbi məclisinin sədri, "Dərbənd" qəzetinin şöbə redaktoru, Azərbaycan Yazıçılar Birliyinin üzvü

Bərkiyəndir

Dəmir odda əriyənsə,

Dost ürəkdə bərkiyəndir.

Dost mənliyi arayansa,

Duz-çörəkdə bərkiyəndir.

İmtahana çəkmə dostu,

Hər gümana çəkmə dostu,

Divar kimi sökmə dostu,

O, diləkdə bərkiyəndir...

Qəlbi daim bahar qalsa,

Çiçək-çiçək gözə dolsa,

Qoyduğu iz məhrəm olsa,

Qar-küləkdə bərkiyəndir.

Əyilməzdir yağı-yada,

Bənzəri var alov-oda,

Tahir özü də dünyada,

Xoş istəkdə bərkiyəndir.

Qafar Süleyman

"Şabran" ədəbi məclisinin sədri,

AYB üzvü

Ağlayır

Ağlayıram öz içimdə,

Bilən yoxdur kim ağlayır.

Çalınır "Yanıq Kərəmi",

Mizrab altda sim ağlayır.

Dərd var qalıb ötən çağdan,

Dərd var böyük Tufandağdan,

Uzaq düşdüm Qarabağdan,

Boş qalan yerim ağlayır...

Əzilsəm də maraq üstə,

Gəzdirmədim yaraq üstdə...

Qələm gəzən varaq üstə

Xəlvətcə şeirim ağlayır...

Qələmşah İdrisov

Filologiya uzrə fəlsəfə doktoru,

şair-rəssam

Çəkim hicranını...

Tökdü leysan kimi hicran yağışı,

Döndü ümidlərim ömrün qışına.

Yenə ləpirçi tək çıxıb gözlərim,

İtkin xatirələr axtarışına...

Məhəbbət böyüməz hicran olmasa,

Hicransız məhəbbət sevişə bilməz.

Hicran dənizində üzməyən aşiq,

Könül həmdəminə qovuşa bilməz.

Hicranla bərkiyir sevgi-məhəbbət,

Qeysi məcnun etdi hicran yarası.

Hicranın içinda gizlənib, fəqət

Ülvü məhəbbətin, eşqin yarısı.

Hicran məhəbbətin yaraşıqıdır,

Bir damla göz yaşı tökən deyiləm.

Çəkim hiçranını nə qədər desən,

Onsuz da siqaret çəkən deyiləm...

Abdulla Məmməd

Filoloq-şair

Dəymə

Köz-köz közərdim söz üstə,

Közərən közümə dəymə.

Mən sənin yemin deyiləm,

Yeri get-gözümə dəymə!

Güzgüdə gördüyün üzü,

Gözlərdə hördüyün üzü,

Astara sırıdığın üzü

Gözəyib, gözünü döymə!

Tay-tayın tapar, su çala...

Qeybətlə dolmaz bu çala.

Az onu-bunu suçula

Söz atıb, dözümə dəymə!

At çəkəni yüyən bilər,

İt çəkəni söyən bilər,

Önündən söz yeyən bilər...

Haqq deyən sözümə dəymə!

Dağa dirənən ahdan qorx,

İşlədiyin günahdan qorx,

Barı, bir yol Allahdan qorx,

Diz çöküb özünü öymə...

Yeri get, gözümə dəymə!

Nazif Tağı

Qarabağ qazisi, "Vətən uğrunda"

medalıyla təltif olunmuş zabit

Susay çayı - Alpançay

(yarızarafat-yarıgerçək)

Üzükdür qalın meşəsi,

Üzüyün qaşıdır dağın zirvəsi,

Sən ordan alırsan gücü-nəfəsi,

Bəs niyə Alpançay deyirlər sənə?

Kəndimi ortadan bölüb gedirsən,

Şaqqanaq çəkərək gülüb gedirsən,

Alpana çatmamış ölüb gedirsən,

Bəs niyə Alpançay deyirlər sənə?

Biz balıq tutardıq, səndə çimərdik,

Böyüklər gələndə gendə çimərdik,

Üç-dörd ay, az qala gündə çimərdik...

Bəs niyə Alpançay deyirlər sənə?

Damarda dövr edən qanım sən oldun,

Altı şəhidimlə canım sən oldun,

Susayda göllərim, sonam sən oldun,

Bəs niyə Alpançay deyirlər sənə?

Hövzəndə yad yellər əsməsin deyə,

Zarafat, xoş söhbət kəsməsin deyə,

Şahbaba müəllim küsməsin deyə -

(Alpanda Quruçay söyləsələr də) -

Müşkürdə Alpançay deyirlər sənə...

İzmirağa Töhmərli

Şair-jurnalist

Məni kəndə apar...g

Qaytar məni o dağlara,

Ordan baxım uzaqlara,

Yazda məndən uzaqlaşar,

Qışda məni tapar ölüm -

Məni kəndə apar, ölüm!

Qırx il ömür sürdüm, bəsdir,

Gördüyümü gördüm, bəsdir,

Mən it ömrü yaşamışam,

Haqsızlığa hürdüm, bəsdir! -

Məni kəndə apar, ölüm!

Hər el, hər ölkə yaxşıdır,

İstidə kölgə yaxşıdır.

Bu dünyanı bəyənmədim,

O dünya bəlkə yaxşıdır

Məni kəndə apar, ölüm!

Yaddan günüm, anım çıxmaz,

Kəssən, damla qanım çıxmaz,

Torpaq üçün darıxmışam -

Bu asvaltda canım çıxmaz:

Məni kəndə apar, ölüm...

Pirəli Rüklü

Şair, teleaparıcı

Bəyənmir

Kimliyini danaraq lovqalanıb gəzir o,

Yerli-yersiz ətrafa boylanaraq süzür o,

Özünü yüksək tutub, kimlərisə əzir o,

Yanında olanların heç birinə güvənmir,

"Bağa çanaqdan çıxıb, çanağını bəyənmir"

Kökünə bələd olan yaxşı tanıyır onu,

Düşməni tərifləyir, dostu qınayır onu,

Zatınımı unudub, göyə tutur burnunu,

Torpaqdan yaransa da, göylərdən yerə enmir,

"Bağa çanaqdan çıxıb, çanağını bəyənmir"

Daş-torpağın içindən gəlib çıxıbdır düzə,

Elə yeriyir, guya yaradacaq möcüzə...

Mat-məəttəl qalmışam, adamda qaşa-gözə,

Beləsinin başına göydən kül də ələnmir,

"Bağa çanaqdan çıxıb, çanağını bəyənmir".

Elnarə Əskərova

Qürbət eldə...

...Çox şey istəməzdim, bir yağış yağsın,

Çəkim ciyərimə torpağın ətrin.

Mavi göy belinə qurşağın taxsın,

Yetmiş dəfə sayım, yeddi rəng sətrin...

Günəş şəfəqini damlara sərsin,

Ərisin Şahdağın zirvəsində qar.

Quruçay hayqırsın, bir sel gətirsin,

Yusun sahilini bulanıq sular...

Ən gözəl paltarı geyim əynimə,

Toplayım başıma qonşu qızları,

Hanı mis səhəngim, salım çiynimə,

Düşək Qarabulaq yoluna sarı...

Sübh tezdən oyanım xoruz səsilə,

Anamın ocaqda südü qaynasın.

Qızlar könül açsın zümzüməsilə,

Lalə ləçəyində şehlər oynasın...

Bibimiz sac salsın-ocaq qalayıb,

Naxışlı çörəklər yapsın təndirə.

İsti qutabları özüm yağlayım,

Bacım stəkanda ayran gətirə...

Geyək əynimizə qardaş şalvarın,

Bir az ip bağlayaq qazan qulpuna,

İynəli-tikanlı qəddar kölların

Böyürtkən yığmağa girək qoynuna...

Çaytikanı yığaq, ziriş toplayaq,

Cırsın əllərimi tikanlı kollar.

Gicitkən yandırsın ayaqlarımı,

İçimdə onun da bir həsrəti var...

Böyükağa Ağa

"Gülüstan" və "Ulduzlar"

ədəbi məclislərinin üzvü

Ləl kimiyəm

Sacı qızdır dedim sənə,

Dərdi qovur, qat çətənə.

Xırmanımda qalıb yenə -

Döyəcəyəm, vəl kimiyəm.

Çulum olub para-para,

Dərd çiynimə salıb yara.

Əcəl qalıb üzüqara,

Öldürəmmir, kəl kimiyəm.

Hər kimin var fərd içində,

Dərdi çəkər mərd, içində.

Ərimədim dərd içində,

Dərd sədəfdi, ləl kimiyəm...

Sabir Şeyda

Pedaqoq, şair

Oxu ömür kitabını.

Damlasıyıq yanan şamın,

Çağlama canım, çağlama.

Gözdə qaldı arzu-kamın,

Ağlama canım, ağlama...

Haqsa yazan bir yazını,

Kim gördü onda pozunu?!

Söndür, qəlbdə dərd közünü,

Saxlama canım, saxlama.

Qəmlə sevinc arasını

Ölç, tökmə göz qorasını.

Açma yaddaş yarasını,

Dağlama canım, dağlama.

Topla qüvvəni, tabını,

Oxu ömür kitabını...

Sevinc dadlı bir qapını,

Bağlama canım, bağlama...

Cabir Alpoğlu Albantürk

Şair-publisist

Gümüş onluq və bir bənd sonluq

Şeiri şüara çevirənlər

Şüarı şirə çevirməkdə,

Şiri şara çevirənlər

Şarı şüura çevirməkdə,

Pulu kefə sovuranlar

Yağı şora çevirməkdə...

Şoru şərə çevirənlər

Şəri tora çevirməkdə...

Köz altında manqal ağlar,

Köz üstdəki çevrilməkdə...

Ara qatan qanqalaqlar

Çöpü tirə çevirməkdə,

Bəzi nadan danqalaqlar

Kiri pirə çevirməkdə...

Ədalət.-2015.-24 dekabr.-S.6.