YAXIN-UZAQ OBALARI QOVUŞDURAN QARAMƏRYƏM

Layihənin istiqaməti: Regionların sosial-iqtisadi inkişafının təşviq edilməsi

"... Kənd təsərrüfatının inkişafı üçün kreditlər, gübrələr, əlavə texnika verilir. Soyuducu anbarlar, taxıl anbarları tikilir. Yəni, biz istəyirik ki, bu inkişafa daha da güclü təkan verək. Çünki hər bir bölgədə, hər bir kənddə yaxşı şərait olsun, rifah artsın, iş yerləri açılsın və gözəl abadlıq işləri görülsün".

Azərbaycan Respublikasının Prezidenti

İlham Əliyev

(əvvəli ötən sayımızda)

Göz önündə olan

həqiqətlər

Cənab Prezidentin Azərbaycanın bütün istiqamətlər üzrə inkişafına göstərdiyi qayğı və diqqət göz önündədir. Biz hər gün yalnız inkişaflardan, yeniliklərdən söhbət açır və haqlı qürur hissi keçiririk. Bax, elə əvvəlcədən inkişafından danışmağa başladığımız Qaraməryəm kəndində də belədir. Bütün bu inkişaf və yenilikləri nümayəndəliyin ərazisini gəzib tanış olduqca bir daha görür və sevinirsən. Burada görülən işlər, yeniliklər, təsərrüfat göstəriciləri və digər məqamlar barədə Göyçay rayon icra hakimiyyəti başçısının Qaraməryəm kənd inzibati ərazi dairəsi üzrə nümayəndəsi Seymur Qasımov daha geniş məlumatlar verir. O, söhbətimiz zamanı deyir:

- İqtisadiyyatda əldə olunan nailiyyətlər dövlət büdcəsinin, əhalinin gəlirlərinin artmasına, sosial, mədəni, idman və digər sahələrdə yüksək inkişafa səbəb olur. Azərbaycan düzgün inkişaf istiqaməti seçib və bu yolla inamla irəliləyir. İqtisadi uğurların davamlı olmasında həyata keçirilən siyasi islahatlar böyük əhəmiyyətə malikdir. Azərbaycan Respublikasının Prezidenti İlham Əliyev cənabları məhz xalqın dəstəyinə arxalanaraq müstəqil siyasət apardığını qeyd etmişdir. Hər bir Azərbaycan vətəndaşı kimi biz də bu yüksəlişi ürəkdən alqışlayır, vətənimizin iqtisadi qüdrətinin artmasına öz töhfəmizi verməyə çalışırıq. Rayonumuzda gedən iqtisadi inkişaf, tikinti abadlıq və quruculuq işləri hamımızı sevindirir və bu işlərin görülməsində az da olsa bizim nümayəndəliyin də əməyi vardır.

Rayon icra hakimiyyəti başçısının Qaraməryəm kənd inzibati ərazi dairəsi üzrə nümayəndəliyi 4 kəndi - Qaraməryəm, Qarayazı, Yekəxana və Şahsoltanlı kəndlərini əhatə edir.

Nümayəndəliyin ərazisi 8830 hektar olmaqla, 1525 fərdi təsərrüfatda 6055 nəfər əhali yaşayır. Fərdi təsərrüfatların uçotunun aparılması məqsədi ilə nümayəndəlikdə 19 ədəd təsərrüfatbaşına kitablar açılmışdır. Təsərrüfatbaşına kitablarda hər bir fərdi təsərrüfatın ailə üzvlərinin əmək fəaliyyəti, təhsili, hesabında olan daşınan və daşınmaz əmlakın uçotu və sair qeydə alınmışdır.

Yaşayış səviyyəsini yüksəldən amillər

Kənd əhalisinin əsəs məşğuliyyəti əkinçilik və heyvandarlıqdır. Xüsusi mülkiyyətdə 37 ədəd müxtəlif markalı traktor və aqreqatların olması kənd təsərrüfatının inkişafına əlverişli zəmin yaradır.

Ötən il 2800 hektar sahədən 5160 ton taxıl istehsal olunmuşdur ki, bunun da 1700 hektardan 3280 tonu buğda, 1100 hektardan isə 1880 tonu arpa olmuşdur. Bundan əlavə 53 hektardan 121 ton tərəvəz, 7 hektardan 78,8 ton kartof, 5 hektardan 17,6 ton qarğıdalı, 31 ton üzüm və 6 hektardan 13 ton bostan məhsulları əldə edilmişdir.

Keçən il nümayəndəlik ərazisindəki kəndlərin fərdi təsərrüfatlarında 3650 ton meyvə istehsal olunmuşdur ki, bu da əvvəlki ilə nisbətən 141,9 ton çoxdur. Əldə edilmiş məhsullar rayonumuzda fəaliyyət göstərən emal müəssisələrinə, respublikanın digər rayonlarına və MDB ölkələrinin müxtəlif şəhərlərinin bazarlarına satışa göndərilmişdir ki, bu da nümayəndəlik ərazisində yaşayan əhalinin gəlirlərinin yüksəlməsinə müsbət təsir göstərmişdir.

Azərbaycan Respublikası Prezidentinin "Kənd təsərrüfatı məhsullarının istehsalçılarına Dövlət dəstəyi haqqında" 23 yanvar 2007-ci il tarixli 1907 saylı sərəncamın icrası ilə əlaqədar Azərbaycan Respublikası Nazirlər Kabinetinin 15 fevral 2007-ci il tarixli 32 saylı qərarı ilə kənd təsərrüfatı məhsulları istehsalçılarına müəyyən yardımların verilməsi nəzərdə tutulmuşdur. Bu məqsədlə ötən il 858 nəfər mülkiyyətçiyə 99556 manat yardım verilmişdir.

Buğda istehsalçılarının maddi marağının artırılması və buğda istehsalının stimullaşdırılması məqsədi ilə dövlət büdcəsinin vəsaiti hesabına Nazirlər Kabinetinin 16 noyabr 2007-ci il tarixli 181 saylı qərarı ilə daha 518 nəfər mülkiyyətçiyə 53478 manat yardım hesablanaraq sənədlər rayon komissiyasına təqdim edilmiş və yaxın günlərdə bu vəsait mülkiyyətçilərə ödəniləcəkdir.

Kənd əhalisinin əsas məşğuliyyətindən biri də maldarlıqdır. 01 yanvar 2015-ci il tarixə ərazidə 3089 baş iribuynuzlu mal-qara, 6855 baş qoyun-keçi, 33050 quş saxlanılır ki, bu da ötən ilə nisbətən müvafiq olaraq 21, 90, 450 baş artıqdır.

Ərazidə fəaliyyət göstərən baytar həkimlər tərəfindən mal-qara və digər ev heyvanları arasında vaxtlı-vaxtında epizodik tədbirlərin aparılması təmin edilmişdir. Ötən il ərazidəki ev heyvanlarında yolxucu xəstəlik və kütləvi ölüm halları olmamışdır.

Son illərin yenilikləri

Nümayəndəlik ərazisində 1 bələdiyyə, 2 tam orta məktəb, 1 ümumi orta məktəb, 2 uşaq bağçası, bir 25 çarpayılıq xəstəxana, 1 həkim məntəqəsi, 2 tibb məntəqəsi, 2 baytar həkim məntəqəsi, 3 kitabxana, 2 klub, 2 poçt şöbəsi, 2 ATS fəaliyyət göstərir.

Dörd kəndi əhatə edən Qaraməryəm bələdiyyəsi 2014-cü ildə öz fəaliyyətini nümayəndəliklə qarşılıqlı iş şəraitində səmərəli qurmağa çalışmış və kəndlərin sosial-iqtisadi problemlərinin həllində müəyyən işlər görmüşdür. Belə ki, hesabat dövründə bələdiyyə vəsaiti hesabına kəndarası yollar 2 km məsafədə cari təmir edilmiş, kəndarası arxlar 2 km məsafədə qazılaraq lil və çöküntülərdən təmizlənmiş, imkansız ailələrə maddi yardımlar edilmişdir.

Ərazidə fəaliyyət göstərən Sudan İstifadəedənlər Birliyi hesabat dövründə əhaliyə verilmiş suyun dəyərini tam toplayaraq 2014-cü il üçün rayon Suvarma Sistemləri İdarəsi ilə bağlanmış müqaviləyə 100% əməl etmişdir. Hesabat ilində əhalinin suvarma suyuna olan tələbatının ödənilməsi sahəsində SİB bir sıra işlər görmüşdür.

Belə ki, Şahsoltanlı kəndini süvarma suyu ilə təmin edən suvarma arxında 500 metr məsafədə, Yekəxana kəndində uzun illərdən bəri problem kimi qalmış 850 metr məsafədə suvarma arxı qazılaraq lil və çöküntülərdən təmizlənmişdir. Bütün bunlara baxmayaraq ərazidə yay aylarında hava şəraitinin quraq keçməsi ilə əlaqədar əhalinin suvarma suyuna olan tələbatını 100 % ödəmək mümkün olmamış və nəticədə suvarma suyunun tələbatında fasilələr yaranmışdır.

(ardı gələn sayımızda)

Məzahir ƏHMƏDOĞLU

Ədalət.-2015.-7 fevral.-S.4.