ŞƏKİNİN FƏRƏHLİ GÜNLƏRİ

Layihənin istiqaməti: Regionların sosial-iqtisadi inkişafının təşviq edilməsi

Haqlı sualların

gerçək cavabları

Ölkəmizin şimal-qərb bölgəsində yerləşən və 2700 illik tarixə malik olan qədim Şəkinin son illərdəki uğurlu inkişaf yolu göz önündədir.

Şəki nəinki bölgənin, bütövlükdə respublikamızın ən böyük yaşayış məskənlərindən biridir. Bu mənada burada aparılan tikinti-quruculuq işlərinin, sosial-iqtisadi inkişafın arzuolunan səviyyədə davam etdirilməsi heç də asan məsələ deyildir. Üstəlik rayonun əvvəlki rəhbərləri də nəzərdə tutulan işləri normal həyata keçirməmiş, göstərilən etimadı doğrulda bilməmişlər. Bu səbəbdən də indi Şəki sakinləri gündəmi real müqayisələrlə ələşdirirlər. Və mövcud vəziyyətlə bağlı haqlı suallar da doğur. Necə oldu ki, cənab Prezident Elxan Usubovu Şəki rayonuna başçı təyin etdikdən sonra bütün istiqamətlərdə irəliləyişlər baş verdi, bir çox layihələr uğurla həyata keçirildi, kəndlər, qəsəbələr, ayrıca olaraq Şəki şəhəri bu qədər inkişaf edib müasirləşdi? Təbii ki, səmimi və işgüzar məmur üçün şəraitin, vəziyyətin necəliyindən çox, bu şəraiti düzgün qiymətləndirməyi bacarmaq əsas şərtdir. Cənab Prezidentin yüksək etimadını məhz görülən işlər və yüksələn traektoriyalı inkişafla doğrultmağa çalışan E.Usubov nə qədər təvazökarlıq etsə də, uğurlara məhz bütün işləri nümunəvi qurmaqla bacarıb. Burada şübhəsiz, xalqa, dövlətçiliyə və prezidentə sədaqətlilik prinsipləri ilə yanaşı, təcrübəli bir məmur etikası, ziyalılığı da böyük rol oynayır.

Son 4-5 ildə cənab Prezidentin qayğı və diqqəti sayəsində Şəkidə çox işlər görülüb və davam etməkdədir. Bütün bunlar Böyük Şəhər adlandırdığımız qədim Şəkini daha da şöhrətləndirir. Eyni zamanda Şəki camaatını daha yaxşı çalışmağa, daha yaxşı yaşamağa ruhlandırır. Bütün bunların davamlı nəticələri məhz 2014-cü ildə də diqqəti cəlb etmiş, gələcəyə inamı artırmışdır.

Prezident: "Tutduğumuz yol düzgün yoldur..."

Cənab Prezident Nazirlər Kabinetində keçirilən 2014-cü ilin yekunlarına həsr edilmiş iclasdakı nitqində hər bir dövlət qurumunda idarəetmə prinsiplərinin təkmilləşdirilməsinin, israfçılıq hallarının qarşısının alınmasının vacibliyini vurğulamış, ölkə üçün zəruri olan, iqtisadi və sosial əhəmiyyətli layihələrin icrasının davam etdiriləcəyini bildirmiş, hər bir rayonda sənaye mərkəzlərinin yaradılması ilə bağlı tapşırıqların icrasını tələb etmişdir. Bütün sosial proqram və layihələrin həyata keçirilməsində heç bir problemin olmadığını vurğulayan cənab Prezidentimiz demişdir: "Keçən il dünyada və bölgədə müxtəlif proseslər gedirdi. Gərginlik, demək olar ki, böyük dərəcədə artmışdır. Ancaq Azərbaycan öz sürətli inkişaf tempini saxlaya bilmişdir. Ölkəmizin təhlükəsizliyi təmin edilmişdir, iqtisadi və sosial proqramlar icra olunmuşdur. Azərbaycan xalqı 2014-cü ildə də təhlükəsizlik şəraitində yaşamışdır. Bu, bir daha onu göstərir ki, bizim tutduğumuz yol düzgün yoldur ".

Rəqəmlər yüksəlişdən xəbər verir

Şəki rayonunda keçirilən hesabat yığıncağında geniş məruzə ilə çıxış edən icra başçısı Elxan Usubov bir sıra vacib məsələləri diqqətə çatdırmışdır. Cənab Usubov demişdir:

- Rayonumuzun sosial-iqtisadi inkişafının yekunları ilə tanış olmaq üçün konkret faktlara nəzər salaq. 2014-cü ildə istehsalın əsas sahələrində ilkin hesablamalara görə faktiki qiymətlərlə 274 milyon 227 min manatlıq məhsul buraxılmışdır.

Adambaşına faktiki qiymətlərlə 1515 manatlıq məhsul istehsal olunmuşdur. 2014-cü ildə pərakəndə əmtəə dövriyyəsi 266 milyon 176 min manat olmuşdur ki, bu da 2013-cü ilin müvafiq dövrünə nisbətən 8 faiz çoxdur.

Əhaliyə göstərilən pullu xidmətlərin həcmi isə 64 milyon 5 min manat olmuşdur ki, bu da 2013-cü illə müqayisədə 5 faiz çoxdur. Rayonda 2014-cü ildə 2090 yeni iş yeri açılmışdır ki, bunun da 4,4 faizi yeni yaradılmış müəssisə və təşkilatların, 7,7 faizi mövcud müəssisə və təşkilatların, 87, 9 faizi isə fiziki şəxslərin payına düşür.

Ümumiyyətlə 01 oktyabr 2003-cü il tarixdən 01 yanvar 2015-ci il tarixədək rayonda 14287 yeni iş yeri açılmışdır ki, bunun da 96,6 faizi daimi iş yerləridir. Daimi iş yerlərindən 18,6 faizi yeni yaradılmış müəssisə və təşkilatların, 23,4 faizi mövcud müəssisə və təşkilatların, 58 faizi fiziki şəxslərin payına düşür. Rayon üzrə orta aylıq əməkhaqqı 253 manat olmuşdur ki, bu da əvvəlki illə müqayisədə 6 faiz çoxdur.

Hazırda rayonda 18 sənaye müəssisəsi fəaliyyət göstərir ki, bunların da 12-si kiçik müəssisədir. 2014-cü il ərzində rayonun sənaye sahəsində 21262 min manatlıq məhsul istehsal edilmiş və xidmətlər göstərilmişdir ki, bu da 2013- cü illə müqayisədə 885 min manat çoxdur.

2014-cü ildə rayonumuzda iqtisadi və sosial sahələrin inkişafına bütün maliyyə mənbələri hesabına yönəldilmiş investisiyanın həcmi 38 milyon 965 min manat olmuşdur. İstifadə edilmiş investisiyanın 84,6 faizi dövlət mülkiyyətinin, 15,4 faizi qeyri-dövlət mülkiyyətinin payına düşür. Əsas kapitala yönəldilmiş investisiyanın 28 milyon 780 min manatı və ya 87,3 faizi tikinti-quraşdırma işlərinə sərf edilmişdir.

Azərbaycan Respublikasının Prezidenti cənab İlham Əliyevin daxili siyasətinin əsas istiqamətlərindən biri də sahibkarlığın inkişaf etdirilməsidir. Ölkəmizin başçısı Nazirlər Kabinetinin 2014-cü ilin yekunlarına və qarşıda duran vəzifələrə həsr olunan yığıncaqda xüsusi olaraq vurğulamışdır ki, bu gün ölkəmizdə sahibkarlara böyük diqqət vardır. Onlar həm siyasi, həm də maddi tərəfdən dəstəklənir. Cənab Prezidentimiz demişdir: "Bu il də sahibkarlara güzəştli şərtlərlə kreditlərin verilməsi təmin ediləcəkdir. Bu təşəbbüsün cox gözəl nəticələri vardır. Biz bunu əyani şəkildə görürük. Bölgələrdə açılan yeni müəssisələr və iş yerləri bunu göstərir".

İpək istehsalına yeni münasibət

Bildiyimiz kimi, 2014-cü il "Sənaye ili" elan edilmişdir və ötən ildə ölkəmizdə sənayeləşmə ilə bağlı düşünülmüş siyasət aparılmışdır. Nazirlər Kabinetinin 2014-cü ilin yekunlarına və qarşıda duran məsələlərə həsr olunan yığıncağında çıxış edən cənab Prezidentimiz hər bir rayonda sənaye zonalarının yaradılmasının vacibliyini xüsusi olaraq vurğulamış və bu göstərişin icra edilməsini tələb etmişdir.

(ardı gələn sayımızda)

Məzahir ƏHMƏDOĞLU

Ədalət.-2015.-21 fevral.-S.4.