Ləzə-ağ donlu gözəl

Layihənin istiqaməti: Regionların sosial-iqtisadi inkişafının təşviq edilməsi

"Bu mərkəz Azərbaycanda ən böyük turizm mərkəzidir və dövlət xətti ilə turizm infrastrukturna qoyulan ən böyük vəsait Qusar rayonuna yatırılıb".

Azərbaycan Respublikasının Prezidenti

İlham Əliyev

(əvvəli ötən sayımızda)

Gözəlliklər məskəni Ləzə kəndinin adı dünyaya yayılmaqdadır. Qışda buralar daha füsunkar olur. Təsadüfi deyil ki, kəndin ərazisində yerləşən "Şahdağ" qış-yay turizm kompleksinə gələn yerli və əcnəbi turistlərin sayı durmadan artır. Mövsüm başlayandan kompleksin çeşidli və yüksək keyfiyyətli xidmətlərindən 25 mindən çox turist istifadə edib.

Zirvələrdə böyük

inkişaf dövrü

Ölkədə turizm sektorunun inkişafına xüsusi önəm verilir. Təkcə paytaxt Bakıda deyil, regionlarda da müasir turizm obyektlərinin, istirahət mərkəzlərinin tikilməsi Azərbaycanda bu sahəyə diqqətin artmasına nümunədir. "Şahdağ" qış-yay turizm kompleksi kimi universal obyektlərin, otellərin inşa olunması ölkəmizdə turizm biznesinin inkişaf etdiyini, qeyri-neft sektorunda bu sahənin xüsusi çəkisinin ildən ilə daha da artdığını təsdiqləyir. Belə böyük layihələrin Qusarda, digər rayonlarımızda qurulması regionların sosial-iqtisadi inkişafına öz töhfəsini verməkdədir.

Dövlət başçısı yanvarın sonunda növbəti dəfə "Şahdağ" qış-yay turizm kompleksinə səfər edərkən burada görülən işlərə yüksək qiymət verib, qarşıda daha böyük hədəflərin dayandığını diqqətə çatdırıb:

"...Şahdağ kurort mərkəzində işləyənlərin 80 faizi yerli insanlardır, Qusar rayonunun sakinləridir. Yadımdadır, təməl daşını qoyanda demişdim ki, bu mərkəz, eyni zamanda, iş yerlərinin yaradılmasına xidmət göstərəcək. Çünki turizm sektoru çoxsaylı iş yerlərinin açılmasına gətirib çıxarır.

Nəzərə alsaq ki, biz hələ birinci mərhələdəyik, demək olar, bizim bütün planlarımız otellərin tikintisi ilə artıq reallaşıb. Ancaq Şahdağ turizm mərkəzinin əsas fəaliyyət dövrü bundan sonra başlayacaq..."

"Enerjili mövsüm" ili qeyd olunur

Azərbaycanda builki qış turizm mövsümünə ötən il dekabrın 20-dən start verilib və bu müddət ərzində "Şahdağ" qış-yay turizm kompleksinə 25 min nəfərdən artıq turist gəlib. "Şahdağ" Kompleksi İdarəsinin Müştərilərlə iş şöbəsinin müdiri Aygün Həsənovanın sözlərinə görə, turistlər həftəsonları bura gəlməyə daha çox üstünlük verirlər: "Gələn turistlər arasında xarici turistlərin sayı ötən ilə nisbətən bu il daha çoxdur".

Aygün Həsənova "Şahdağ"da turistlər üçün bir çox əyləncə xarakterli əlavə xidmətlərin təşkil edildiyini də diqqətə çatdırdı. Şöbə müdiri bildirdi ki, belə tədbirlərdən biri "JAGUAR Snow Bowling" ekstremal yarışıdır: "Bu layihə "SaySome Production" və "JAGUAR Energy Drink" tərəfindən "Şahdağ" istirahət kompleksinin dəstəyi ilə təqdim olunur. Qışın ən ekstremal və maraqlı yarışının qaydalarına görə, iştirakçılardan biri iki kameralı böyük bir hava şarının içərisinə daxil olur, hansı ki, çox böyük sürətlə hündürdən aşağıda düzülmüş 3 metrlik nəhəng keqliləri dağıtmaq üçün dağdan aşağı atılır. Şarı həmin yola gətirən ikinci iştirakçı isə bütün gücü ilə şarın qabağında qaçır ki, altında qalmasın. Bu oyun Azərbaycanda və "Şahdağ" kompleksində ilk dəfə keçirilməsinə baxmayaraq böyük maraq doğurub". Yeri gəlmişkən, onu da vurğulayaq ki, belə əyləncəli oyunlarda iştirak edənlər "Paşa Sığorta" tərəfindən də sığortalanır, oyun zamanı iştirakçıların avtobus, yemək və s. xərclərini təşkilatçılar ödəyir.

Kompleks nümayəndəsi "Şahdağ"da qiymətlərin gün ərzində dəyişdiyini də dedi. Kanat yollarından istifadə 08:00-dan 16:30-a kimi 25 manat, 08:00-dan 12:30-a kimi 15 manat, 12:30-dan 16:30-a kimi isə 15 manatdır. Bu qiymətə bütün kanat yolundan istənilən qədər istifadə etmək olar. 1 dəfə istifadə isə böyüklər üçün 10, (ancaq təcrübəsiz kanat yolundan istifadə) uşaqlar üçün 6 manatdır. Kompleksdə xizək yollarına aparan 3 kanat istifadədədir. Kanatdan istifadə etmək ücün ödəniş edənlər 3 kanat yolundan da istifadə edə bilərlər. Turda növbəsiz xizək kirayələmək istəyən turistlər mütləq ən azı turun başlamasina 3 gün qalmışa kimi ad, soyad, boy, çəki, ayaq ölçüsü və doğum tarixlərini sifariş verdikləri turizm şirkətinə bildirməli və ödəniş etməlidirlər. Xizək kirayəsi 20 manata başa gəlir. Əks halda, onlar xizəklə təmin olunmayacaqlar. Bu qayda müştərilərin növbəsiz rahat xizəklə təmin olunması məqsədilə müəyyənləşdirilib. Xizəkdən istifadə qiyməti vaxta görə bölünməyib, yəni 1 saatlıq və ya 1 günlük qiymət eynidir.

Qeyd edək ki, "Şahdağ" qış-yay turizm kompleksində rəngarəng menyuları olan restoran turistlərin ixtiyarındadır. Bundan əlavə, kompleksdə maşın dayanacağı, tibb məntəqəsi, xizək məktəbi, bar, hotel, xizək-idman avadanlıqları satılan dükan da fəaliyyət göstərir. Kompleksin özünə isə giriş pulsuzdur.

Hazırda qış turizm mövsümünün ən qaynar vaxtıdır. Ölkəmizdə fəaliyyət göstərən "Şahdağ" qış-yay turizm kompleksi turistlərin daha çox seçdiyi istiqamətdir. Turizm şirkətləri də "Şahdağ"ı diqqət mərkəzində saxlayır, hər həftə sonları bu istirahət məkanına müxtəlif turlar təşkil edirlər.

Azərbaycanda qış turizm sənayesinin yaradılması və inkişaf etdirilməsi məqsədilə "Şahdağ" qış-yay turizm kompleksinin ilkin mərhələdə istifadəyə verilmiş hissəsində 2012-2013-cü ilin qış mövsümündən qonaqların qəbuluna başlanılıb. Fəaliyyətə başladığı gündən etibarən təxminən 200 minə yaxın yerli və əcnəbi turist kompleksə səfər edib, Ləzə kəndinin ərazisində yaradılan bu möcüzəyə heyran qalıb. Təsadüfi deyil ki, Qusarın dağlar qoynunda yerləşən ağ donlu gözəli-Ləzə kəndi təkcə Azərbaycanda deyil, uzaq-uzaq ölkələrdə də tanınmağa və geniş təbliğ olunmağa başlayıb.

Etibar CƏBRAYILOĞLU

Ədalət.-2015.-27 fevral.-S.8.