BƏLƏDÇİSİ GÖZƏLLİK OLAN ŞƏHƏR

Layihənin istiqaməti: Regionların sosial-iqtisadi inkişafının təşviq edilməsi

Ağcabədi səfərimdən qeydlər

"... Ölkənin hər yerində, eləcə də hər bir sahədə böyük kompleks işlər həyata keçirilir. Ancaq Ağcabədidə bu işlər daha yaxşı icra olunur. Bu da onu göstərir ki, burda işlərin bünövrəsi mükəmməl qoyulub və bu gün də həmin işlər uğurla davam etdirilir".

Azərbaycan Respublikasının Prezidenti

İlham Əliyev

El dilində desək, indi boz aydı. Və bu boz ayın özünəməxsus parametrləri var. Yəni bunun içərisində ilin bütün fəsilləri özünü göstərə bilir. Bax, boz ayının həmin o özünü qışın sərtliyi ilə nümayiş etdirdiyi məqamda yolum Ağcabədiyə düşdü. Yol boyu aramsız yağan lopa-lopa qar dənələri ətrafı ağ örtüyə bürüsə də, maşını idarə etmək çətinləşsə də, bunun özündə də bir gözəllik var idi. Mənə elə gəlirdi ki, bu ağ qar dənələri üz tutub getdiyim bölgənin ağ günlərindən bir ip ucudur. Və mən o ip ucundan tutub bu bölgənin gerçəkləşən arzularını vərəqləyə biləcəm. Elə deyəsən Tanrı da mənim içimdə baş qaldıran istəyi duydu. Necə deyərlər, niyyətim çin oldu. Çünki...

Həmin gün Ağcabədidə həmişəkindən bir az da artıq bir işgüzar mühit var idi. Hər tərəfdə abadlıq işləri aparılır, havanın şaxtalı olmasına baxmayaraq, bu şəhərə hələ ki, qar dənələri gəlmib çatmamışdı. Ona görə də yol kənarlarında işləyən insanlar bu şaxtaya, bu soyuğa məhəl qoymur, öz daxili enerjiləri ilə doğma yurd-yuvalarını abadlaşdırırdılar. Kənardan müşahidə edəndə dərhal görünürdü ki, divar hörən, palçıq qarışdıran, səkiyə metlax düzən, damda örtüq mismarlayan və bir sözlə özünə aid işləri görən hər kəs bunu sevə-sevə, zövqlə yerinə yetirir, onun üzərində kiminsə nəzarəti yoxdu, kiminsə uca səsi qulağa toxunmur. Deməli, həvəslə, özün üçün işlədiyin kimi işləməklə bütün məqsədləri gerçəkləşdirmək ümmkündür. Necə ki, bunu ağcabədililər, bu qədim məkanın sakinləri edirlər.

Mən şəhərin Beyləqan istiqamətindən mərkəzə daxil olanda yolun kənarında çalışan insanların yanında bir anlıq dayandım. Heç bir sorğu-sualsız burda çalışan dörd-beş nəfərin gördüyü işi dəyərləndirmək, onun mahiyyətini anlamaq istədim. Məlum oldu ki, onlar özlərinə aid olan köhnə, şəhərin ümumi mənzərəsini korlayan obyektlərini söküb onun yerində daha müasir, daha gözəgəlimli, müştərinin diqqətini çəkə bilən bir ticarət köşkü tikirlər. Deməli, bu tikilən kbşkün həm xarici görkəmi, həm onun üzərindəki mili ornamentlər göstərirdi ki, indi adamlar təkcə fərdi yox, həm də ümumi gözəlliyi nəzərə almağa başlayıblar. Elə Ağcabədinin gözəlləşməsində, müasirləşməsində də əsas şərtlərdən biri zənnimcə budur. Yəni rəngarəngliklə yanaşı, müasirlik və zövq oxşamaq. Bu prinsip indi aran Qarabağının ən gözəl şəhərlərindən biri olan Ağcabədinin boyun biçilmiş bir göstəricidir, bir nümunədir. Yəni bu etiketdən istifadə etməklə ölkənin digər şəhər və qəsəbələrini də müaisrləşdirmək, abadlaşdırmaq mümkündür.

Ağcabədidə köhnə dostlarımdan olan Fitkrət müəllimlə görüşüb həmsöhbət oluram. Onunla etdiyim söhbət zamanı məlum olur ki, bu gün təkcə rayon mərkəzinin yox. Eləcə də onun əksər yaşayış məskənlərinin hamısında abadlıq xüsusi diqqət mərkəzindədi. Yəni təkcə tikilən bir obyektin, ucaldılan bir binanın görkəmi yox, eləcə də çəkilən yolların, yol kənarı səkilərin, hətta qaz, işıq, telefon xətlərinin özlərinin də səliqəli olması bu gün rayon rəhbərliyi tərəifndən çox ciddi bir tələb kimi qarşıya qoyulubdu. Bəzən gözəgəlimli, diqqətçəkən bir binanın önündən keçəndə köhnə, rəngi solmuş və necə gəldi çəkilmiş boruları , əyilmiş işıq, telefon dirəklərini görəndə istər-istəməz təəssüf edirik, gözəlliyə xələl gətirildiyini düşünürük. Ancaq fəxr hissi ilə demək olar ki, bu gün Ağcabədidə həmin o təəssüf doğuran məqamlara rast gəlmək demək olar ki, mümkün deyil. Bunun da səbəbi rayonda görülən işlərə məsul olan şəxslərin məsuliyyəti və onların üzərindəki tələbkar nəzarətdi.

Qarabağın Ağcabədi adlı bölgəsində son illərdə görülən ölkə əhəmiyyətli işlərin sırasında təbii ki, təsərrüfat subyektlərinin iqtisadi göstəriciləri əsas yeri tutur. Belə ki, regionların inkişafına dair Dövlət Proqramına uyğun olaraq ölkənin digər sahələrində olduğu kimi, Ağcabədidə də böyük işlər görülür və görülməkdədi. Onların arasında xüsusi yeri olan "Aqata Aqro" MMC-nin xüsusi yeri var. Yəni 3000 (üç min) başlıq heyvandarlıq kompleksi olan bu MMC özünün istehsal gücünə yeni iş yeri baxımından həm rayon üçün, həm respublika üçün önəm kəsb edir.

Heç də təsadüfi deyil ki, dəfələrlə Ağcabədiyə səfər etmiş ölkə prezidenti cənab İlham Əliyev burada görülən işləri yüksək qiymətləndirərək bildirmişdi ki, "ölkənin hər yerində, eləcə də hər bir sahədə böyük kompleks işlər həyata keçirilir. Ancaq Ağcabədidə bu işlər daha yaxşı icra olunur. Bu da onu göstərir ki, burda işlərin bünövrəsi mükəmməl qoyulub və bu gün də həmin işlər uğurla davam etdirilir".

Bəli, könül rahatlığı ilə bioldirmək olar ki, bu gün Ağcabədidə fəaliyyət göstərən, sutkalıq istehsal gücü 250 ton olan "Atena" MMC-nin süd məhsulları, həmçminin sutkalıq istehsal gücü 20 ton olan Ağcabədi sud emalı zavodunun uğurları bütün ölkəyə məlumdur. Bu, təkcə həmin məhsulların rkeklamı ilə bağlı deyil. Bu həm də həmin məhsulların keyfiyyəti və onlara olan tələbatla bağlıdır. Təbii ki, bu məhsulları da Ağcabədidə onun torpağa bağlı insanları araya-ərsəyə gətirirlər. Həm də Ağcabədidə kənd təsərrüfatının digər sahələri də - taxılçılıq, əkinçilik, bostan-tərəvəz məhsullarının istehsalı və digər kənd təsərrüfatı məhsulları uğurla reallaşdırılır. Bir az da dəqiq ifadə etsək, Ağcabədidə həm rayon sakinlərinin, həm də respuğlika əhalisinin süfrəsini bəzəyəcək məhsulların istehsalı yüksək səviyyədə araya-ərsəyə gətirilir və onların məhsuldarlığı da zəhmət adamlarını həmişə razı salır.

Həqiqətən qısa bir zaman kəsiyində Ağcabədidə gəzib gördüklərim, eşitdiklərim məndə bu bölgədə insanların işləməsi, yaşaması üçün yaradılmış şəraitin rahatlığına bir əminlik yaratdı. Üstəlik də getdikcə genişlənən məhdud məsuliyyətli cəmiyyətlərin, o cümlədən "BMS Aqro" MMC-nin imkanlarının genişlənməsi, burada Holandiya və Fransadan gətirilmiş damazlıq heyvanların baş sayının və cinsinin artırılıb genişləndirilməsi, eləcə də istehsal olunmuş məhsulların saxlanılması üçün soyuducu anbarların və digər işlərin real göstəriciləri bu dediklərimi özü-özlüyündə sübut edirdi. Həmçinin adamların təhsil, səhiyyə, həmçinin işıq, qaz problemlərinin də vaxtlı-vaxtında çözülməsi burda həyatın öz yüksək axarında olduğuna bariz bir nümunə idi. Elə həmin o hisslərlə də üzü Bakıya qayıdıram. Gördüklərim mənə Ağcabədinin bir Avropa şəhəri olduğunu pıçıldayırdı...

Əbülfət MƏDƏTOĞLU

Ədalət.-2015.-28 fevral.-S.4.