Müasirliyin ünvanı - Ağcabədi

"...Biz öz gücümüzlə, öz bacarığımızla, öz qabiliyyətimizlə bütün dünyaya nəyə qadir olduğumuzu bir daha sübut etdik. Beynəlxalq aləm gördü ki, Azərbaycan nəyə qadirdi, hansı gücün sahibidi. Bunu ermənilər də gördü. Ermənistan hakimiyyəti bundan nəticə çıxarmalıdı..."

Azərbaycan Respublikasının Prezidenti

İlham Əliyev

(Əvvəli ötən saylarımızda)

Ağcabədidə tanış olduğum Hacı Mirələmlə bir az yol yoldaşlığı etdik. Mənim yazılarımdan, imzamdan xəbərdar olan Hacı zarafata salıb bildirdi ki, elə sizin kimi bir həmsöhbət axtarırdım. Mən də onun bu səmimiyyətinə cavab olaraq soruşdum:

- Xeyir ola?

Hacı ciddi bir görkəm alaraq səsinin kəsərini artırıb dedi:

- Gəl, rayonu birlikdə gəzək. Şəhərdə hansı işlər görüldüyünü, hansı yeniliklərin edildiyini özüm sənə göstərəcəm. Ondan sonra nə demək istədiyimi yəqin ki, anlayacaqsan.

Etiraz etmədim. Birlikdə Ağcabədi şəhərini eninə-boyun gəzdik. Hacı böyük həvəslə tikilən sosial obyektləri, qaçqınlar üçün salınmış şəhərciyi, açılmış iş yerlərini, bir sözlə rayonun bugünkü mənzərəsini həvəslə mənə göstərdi və bu işlərin necə sürətlə və keyfiyyətlə aparıldığını vurğulamağı da unutmadı. Biz gəzə-gəzə yeni bir obyektin önünə gəlib çıxdıq. Bu, Ağcabədidə tikilmiş möhtəşəm bir otel idi. İçəri daxil olduq. Cavan bir oğlan bizi qarşıladı. Məlum oldu ki, otel ilk qonaqlarını qəbul etsə də, ayın ikinci ongünlüyündə tam istifadəyə veriləcək. Amma inanın ki, cəbhə bölgəsində, necə deyərlər, əyalətdə belə bir oteli görmək, onun şəraiti ilə tanış olub heyran qalmamaq qeyri-mümkündü. Əsl beynəlxalq standartlara uyğun ən yüksək xidmət şəraiti olan bir otel Ağcabədidə tikilib. Buna ancaq sevinmək olar. Üstəlik, onun yerləşdiyi ərazidə yaradılmış səliqə-səhman o otelə, onun yanındakı digər obyektlərə çəkilmiş yüksək keyfiyyətli asfalt yol da bu səliqə-səhmanı tamamlayır.

Mən Hacı Mirələmin həm təqdimatı, həm də bir növü iştirakı ilə Ağcabədini gəzərkən bir məqamın da şahidi oldum. Belə ki, rayon sakinləri ölkəmizin həyatında baş verən hadisələrə çox həssaslıqla yanaşırlar. Haqsız iradlara, təxribat xarakterli çıxışlara etirazlarını dərhal büruzə verirlər. Ümumiyyətlə bu rayonda ictimai-siyasi durum çox aktivdi. Hətta cavan bir oğlan (onu Hacı Mirələm müəllim mənimlə tanış etdi və məlum oldu ki, Kooperasiya Universitetini bitirib Ağcabədidə işləmək üçün buraya gəlib və uyğun da bir iş tapıb. O, barəsində bəhs etdiyim oteldə bizi qarşılayan Rüfət adlı oğlan idi - Ə.M.) bildirdi ki, ailədə tək oğlan uşağı olsam da valideynlərimin razılığı ilə buraya işləməyə gəlmişəm. Əslən də ağcabədiliyəm. Bakıda evimiz, şəraitimiz var. Məni torpaq çəkib gətirib buraya. Burada diqqət yetirəndə görürəm ki, hər kəs üçün işləməyə imkan və şarit yaradılıbdı. Necə deyərlər, əksəriyyətin pay torpağı, şəxsi təsərrüfatı mövcuddu. Sadəcə, bizim bəzilərimizin canında bir tənbəllik hakimdi. Əli-ayağı "quru" bir iş arzusundayıq. Zəhmətə qatlaşmaq əvəzinə çayxanada əyləşməyə meyl göstəririk. Üstəlik də, əsassız, mənasız müzakirələrə qatılırıq. Unuduruq ki, Ağcabədi kimi bütöv Azərbaycan da bizim hər birimizin evimizdi, vətənimizdi. Onu qorumaq da, onu inkişaf etdirmək də bizim vətəndaşlıq borcumuzdu.

Bəli, məlum olduğu kimi, Ağcabədidə respublika əhəmiyyətli məhdud məsuliyyətli cəmiyyətlər, şirkətlər fəaliyyət göstərir. Əsasən heyvandarılq, yəni ətçilik. Südçülük üzrə ixtisaslaşmış bu şirkətlərin məhsulları ölkənin bütün bölgələrində həvəslə qarşılanır. Elə bu məsələ ilə bağlı fikirlərimi nizamlayarkən yadıma millət vəkili, Ağcabədidə hər kəsin böyük ehtiramla qarşıladığı, özünə doğma bildiyi Tahir Rzayevin sözləri yadıma düşdü. Hörmətli millət vəkili bildirmişdi ki, bu gün Ağcabədidə çox normal işgüzar mühit hakimdi. Rayon icra hakimiyyətinin başçısı və onun komandası həqiqətən Ağcabədinin müasirləşməsi, inkişaf etməsi üçün böyük işlər görürlər. Bir də ki, inkişaf təkcə hansısa sosial obyekti tikmək, hansısa bir yaraşıqlı binanın açılışını etmək deyil. İnkişaf həm də insanların işləməsi üçün, fikir mübadiləsi aparmaq üçün şərait yaratmaq, adamları dinləmək, onlarla ünsiyyət qurmaq və yerlərdən gələn fikirlərə, təkliflərə qulaq asıb ona yaşıl işıq yandırmaqdı. Bu kompleks şəkilində götürəndə həm abadlıq deməkdi, həm iş yeri deməkdi, həm də demokratiya. Bax, ölkə rəhbəri də hər bir məmurdan bunu tələb edir. Çox sevindirci haldır ki, bu gün Ağcabədidə belə bir mühit hakimdi.

Doğurdan da cəmi bir neçə saat qonağı olduğum Ağcabədidə gördüklərim, eşitdiklərim məni bir vətəndaş kimi həm heyrətləndirdi, həm də düşündürdü. Çünki həyat, daha doğrusu Ağcabədinin timsalında gördüklərim bir daha sübut etdi ki, Azərbaycan insanı hər şeyə qadirdi. Gözəllik yaratmaq, onun işığında ətrafı göz oxşayan bir cənnətə çevirmək bu xalqın böyük istedadının bəhrəsidi. Ancaq ona da heyrət etdim ki, abadlığı, yaradılan gözəlliyi görmək istəməyənlər. Ona qara eynək arxasından baxanlar da var. Bu həqiqətən heyrət və təəssüfedici bir haldı. Görünür, biz yaxşıları, yaxşılıqları görmək və unutmamaq üçün onlara təbii bir ehtiyac var. Ona görə də həmin adamlar öz "missiyalarını" bacardıqları kimi yerinə yetirirlər.

Azərbaycan prezidenti İlham Əliyev cənablarının son çıxışlarının birində vurğuladığı kimi, "biz öz gücümüzlə, öz bacarığımızla, öz qabiliyyətimizlə bütün dünyaya nəyə qadir olduğumuzu bir daha sübut etdik. Beynəlxalq aləm gördü ki, Azərbaycan nəyə qadirdi, hansı gücün sahibidi. Bunu ermənilər də gördü. Ermənistan hakimiyyəti bundan nəticə çıxarmalıdı. Onlar da anlamalıdılar ki, biz problemin sülh yolu ilə həll edilməsinin tərəfdarı olsaq da torpaqlarımızda ikinci erməni dövlətinin yaradılmasına heç vaxt icazə verməyəcəyik. Ona görə də real vəziyyəti qiymətləndirib torpaqlarımızdan çəkilib getməlidilər. Əks halda, biz özümüz onları qovmalı olacağıq".

Bəli, cəbhə bölgəsinin beş addımlığında, necə deyərlər, düşmənin gözü önündə hər gün yeniləşən Ağcabədi rayonu özünün inkişaf sürəti və uğurları ilə həqiqətən könül açır və bir daha bəyan edir ki, işgüzar kollektiv torpağa bağlı insanlar və bir də təcrübəli kadr ən çətin problemlərin öhdəsindən gəlməyə qadirdi. Məhz Ağcabədi rayon icra hakimiyyətinin başçısı Şahin Məmmədov və eləcə də onunla çiyin-çiyinə çalışan hər kəs Ağcabədidə bunu sübut edə bilib.

Əbülfət MƏDƏTOĞLU

Ədalət.- 2015.- 8 iyul.- S. 3.