BEYLƏQAN YÜKSƏLİŞ YOLUNDA...

"...Rayonun gələcək inkişafı ilə bağlı konkret proqramlar var. Xüsusilə indi infrastruktur layihələri icra edilir. Kənd yollarının tikintisinə vəsait ayrılır. Sosial obyektlər tikilir. Ölkəmizin uğurlu inkişafı regionların inkişafından böyük dərəcədə asılıdır".

Azərbaycan Respublikasının Prezidenti

İlham Əliyev

Qədim və zəngin tarixə malik olan Beyləqan həmişə diqqət mərkəzində olub. Çünki bu rayonun inkişafı, çiçəklənməsi və tərəqqisi üçün ölkə prezidenti səviyyəsində həmişə böyük diqqət göstərilib. Təsadufi deyil ki, Beyləqan Sovet dönəmində belə özünün kənd təsərrüfatı məhsulları ilə öndə gedən rayonlardan biri olub. Rayonun iqtisadiyyatını əsasını kənd təsərrüfatı təşkil edir. Və hər il də burda çox yüksək məhsuldarlıq əldə edilir.

Torpaqlar sahiblərinə veriləndən sonra

Əlbəttə, torpağın sahibi, yiyəsi olandan sonra onu əkib-becərmək o qədər də çətin deyil. Ən azından ona görə ki, o torpağın dilini o insanlar yaxşı bilirlər. Onlar yaxşı bilirlər ki, hansı əkin sahəsində nə əkmək olar və necə məhsuldarlıq əldə etmək mümkündür. Bu mənada Beyləqanda yaşayan sahibkarlar və eləcə də kənd təsərrufatı ilə məşğul olan insanlar öz işlərini günün tələbləri səviyyəsində qururlar. Bu gün rayonda taxılçılıq və heyvandarlıq çox böyük önəm kəsb edir. Sirr deyil ki, hər adam da bu cür təsərrüfatda istədiyinə nail ola bilmir. Onun üçün ən azından hər şeyi bilməlisən və bütün aqrotexniki tədbirləri vaxtında yerinə yetirməlisən. Bax, onda istər-istəməz əkilən toxum öz bəhrəsini verəcək və sahibinin axıtdığı tər hədər getməyəcək. Sevindirici haldır ki, bu gün rayonda taxılçılıq sahəsində yüksək məhsuldarlıq əldə olunub. Bununla yanaşı, digər kənd təsərrüfatı məhsullarının istehsalında da böyük uğurlara imza atılıb. Bütün bunlar isə beyləqanlıların çəkdiyi zəhmətin bəhrəsidir desək yanılmarıq. Təbii ki, çəkilən zəhmət bayaq dediyimiz kimi, bəhrə verəndə bax onda insanlar da dərindən nəfəs alır və özlərini rahat hiss edirlər.

Böyük abadlıq işləri

Beyləqanda hansı küçəyə getdiksə, hara baş çəkdiksə orda çox böyük abadlıq, yenidənqurma və tikinti işlərinin şahidi olduq. Təsadüfi deyildi ki, bu il Beyləqanda çoxlu sayda ağaclar əkilib. Bu ağaclar istər-istəməz şəhərə bir gözəllik gətirməklə yanaşı, həm də bir sərinlik verir. Beyləqan sakini Qənimət Hüseynovla Heydər Əliyev parkında görüşürük. O tək deyil, ətrafında dostları, tanışları və həmyerliləri də var. Qənimət müəllim çox sevinclə bildirir ki, rayonumuz tanınmaz dərəcədə dəyişib. Bir-birindən gözəl parklar, xiyabanlar, abad küçələr adamın diqqətini özünə cəlb edir. Bax, indi axşam saatlarıdır. Görürsünüz ki, nə qədər insan Heydər parkında gəzməyə çıxıb. Fəvvarələr işə düşəndə, göydən od yağanda da burda bir sərinlik var. Xüsusən də axşam saatları insanların burda sayı daha da çoxalır. Uşaqların əylənməsi üçün hər cür şərait yaradılıb. Üstəlik də yaşlı insanların istirahəti də yaddan çıxmayıb. Oturacaqlarda əyləşib rahatca kiminləsə saatlarca söhbət edə bilərsən. Ürəyin susuzluqdan yansa bir stəkan çay içmkə də adama sərinlik gətirir. Şükür Allaha, indi o qədər gözəl istirahət yerlərimiz, çayxanalarımız var ki, hansı birində əyləşsən, peşman olmazsan. Bir sözlə, Beyləqana qonaq gələnlər burdan çox razı qalacaqlar.

Yollara asfalt çəkilib, yaşayış məntəqələrinə təbii qaz verilib

Sevindirici haldır ki, abadlıq və quruculuq işləri tək Beyləqan şəhərində deyil, onun qəsəbələrində və yaşayış məntəqələrində də geniş vüsət alıb. Sirr deyil ki, bu gün əksər regionlara təbii qaz verilir. Bu mənada son vaxtlar Beyləqanın da bir çox kəndlərinə təbii qaz nəql edilir. Bu isə əhalinin çox böyük sevincinə səbəb olub. Rayonun sakinlərindən biri olan Qənimət Hüseynov öz rayonları haqqında ürək dolusu danışır. Deyir ki, Beyləqanın gündüzü də gözəldir, gecələri də. Bir axşam burda qalsanız görərsiniz ki, bir-birindən yaraşıqlı yaşayış binaları, inzibati tikililər və müasir memarlıq üslubunda inşa edilmiş möhtəşəm tikililər necə gözəl görünür. Mən bir beyləqanlı kimi fəxr edirəm ki, bu rayonun sakiniyəm. Şükür Allaha, işimiz var, yeməyə çörək tapırıq və əmin-amanlıqdır. Bütün bunlara görə bir daha ölkəmizin prezidenti cənab İlham Əliyevə minnətdarıq. Çünki həm Ulu Öndər Heydər Əliyev, həm də prezident İlham Əliyev tərəfindən biz həmişə böyük qayğı görmüşük. Rayonda bütün möhtəşəm tikililər və abadlıq işləri bu iki dahi şəxsin köməkliyi ilə həyata keçirilib. Əvvəllər rayonumuzda təbii qaz yox idi. Amma İlham Əliyev cənablarının böyük köməkliyi nəticəsində bu gün rayonumuza mavi qaz verilir. Bax bu da biz sakinlərin qışda yanacaq sarıdan bütün problemlərini həll etmək deməkdir. Əgər qaz gəlməsəydi biz əlimizdə balta-dəhrə meşələrə gedib odun qırmalıyıq. Təbii ki, insanlar üçün yaradılan şərait həmişə dəyərləndirilməlidir. Axı biz hər birimiz bu ölkəyə, bu xalqa əməli işimizlə xidmət etməliyik.

Beyləqanlılar sabaha böyük ümidlə baxırlar

Biz Beyləqanda kiminlə söhbət elədiksə, onların hər biri inamla, ümidlə danışdı. Dedilər ki, şükür Allaha, yeməyə çörəyimiz var, içməyə suyumuz. Bir beyləqanlı olaraq fəxr edirik ki, belə bir abad və gözəl bir rayonda yaşayırıq. İşimiz də yaxşı gedir. Ümumiyyətlə, kim çalışırsa, əziyyət çəkirsə, Allah-Təala onun əməyini qiymətləndirir. Tənbəl adamın heç vaxt çörəyi olmayıb. Qışda yatıb, yayda da kölgə axtarıb. Təbii ki, belə adamın dolanışığı yaxşı olmayacaq.

Şükür Allaha, ölkəmizdə kənd təsərrüfatının inkişafına böyük diqqət yetirilir. Elə biz də əkin-biçin və təsərrüfat işləri ilə məşğul olur və ailələrimizi dolandırırıq. Əhməd Vəliyev adlı Beyləqan sakini dedi ki, oğluma iyulun 25-də toy edəcəm, siz idə ora dəvət edirəm. Gəlin görün bizim camaat necə yaşayır. Maşınım var, evim var, uşaqlarım da hamı işləyir. İndi axırıncı oğlumu evləndirirəm. Daha bundan sonra mənim heç bir çətinliyim qalmır.

Faiq QİSMƏTOĞLU

Ədalət.- 2015.- 16 iyul.- S. 3.