SÖZÜ ADI KİMİ UCA TUTAN

Bu, Füzuli Rüzgardı

Açığını deyim ki, onunla üz-üzə gəlib bir-birimizə doğru uzanmış əlimizi sıxanda özümdən asılı olmadan çox diqqətlə gözlərinə baxdım. Onun baxışları, çöhrəsi adını bütünlüklə tamamlayırdı. Çünki adı Füzuli olan insan görkəmində həqiqətən bir nuranilik, bir işıq, şairsayağı desəm, bir Füzulilik var idi. Hiss olunurdu ki, salamı rüşvət kimi vermir və rüşvət kimi də almır. Salamı elə Füzuli kimi içindən, ürəyindən gəlir. Bax, həmin o dəqiqədən başlayaraq mən ürəyimdə Füzuli müəllimə qarşı çox səmimi bir münasibətin öz-özünə göyərdiyini, öz-özünə böyüdüyünü hiss etdim. Və zaman da, bir-birini əvəz edən illər də göstərdi ki, nə ona Füzuli adını qoyanlar, nə də mənim ürəyim yanılmayıbdı. Çünki o...

Bəli, mən Füzuli Rüzgarla "Ədalət" qəzetinin redaksiyasında qarşılaşdım. Bizi bir-birimizə Babək Yusifoğlu ilə rəhmətlik Oqtay Salamov təqdim etdi. O andan başlayaraq "Ədalət" qəzetinin bölgə müxbiri kimi yazılarını daha yaxından izlədiyim Füzuli Rüzgar bir insan kimi də, bir şəxsiyyət kimi də mənim gözümdə ucaldı. Bunun ən başlıca səbəbi Füzuli müəllimin sözə, jurnalistikaya, mətbuata olan böyük sevgisi, həm də yazdığı hər bir sözə, bütövlükdə mətbuata çox böyük məsuliyyətlə yanaşması idi. Onun demək olar ki, bizimlə əməkdaşlıq etdiyi zaman kəsiyində öz sakit təbiətinə uyğun olaraq həm həmkarları ilə davranışı, həm də yazdığı hər bir yazıda konkret öz mövqeyini ortaya qoyması onun peşəkarlığının xarakterik tərəfi olmaqla bahəm, həm də səmimiyyətinin göstəricisi idi. Açıq şəkildə hiss olunurdu ki, Füzuli Rüzgar sözü zərgər dəqiqliyi ilə özü də yorulmadan, onun hər qatını görərək arayıb axtarır və cümlələrə, yazılara çevirir. Bax, bu keyfiyyətləri müəyyən bir zaman kəsiyindən sonra məndə onun jurnalist kimi keşdiyi yola bir diqqət yetirmək marağı oyatdı. Elə həmin maraqla da...g

Necə deyərlər, arayıb-axtarıb öyrəndim ki, həmkarım Füzuli Rüzgar, yəni Füzuli İmran oğlu Qasımov Gəncədə doğulub, burada ali təhsil alıb və 1968-ci ildən Jurnalistlər Birliyinin üzvüdü. Hətta onun ilk yazıları orta məktəb illərində həm Gəncənin, həm də respublikanın mətbu orqanlarında işıq üzü görüb. 1966-cı ildən əmək fəaliyyətinə başlayan Füzuli öncə "Daşkəsən" qəzetində ədəbi işçi, şöbə müdiri, sonra bugünkü Göygöl rayon qəzetində, sonra o vaxtkı "Kirovabad kommunisti" qəzetində müxtəlif vəzifələrdə çalışır. 2012-ci ildən isə o, həm də jurnalistikanın sirlərini gənclərə öyrətməklə məşğul olub. Belə ki, Azərbaycan Kənd Təsərrüfatı Akademiyasının nəzdindəki ictimai peşə fakültəsinə rəhbərlik edib. Paralel olaraq bir neçə jurnalın təsisçisi və redaktoru olubdu. Bu gün isə...g

Füzuli Rüzgarın həyatında ağrılı-acılı unudulmaz bir tarix də var. Belə ki, 2006-cı ilin may ayında qardaşı Rüzgar İmran oğlu torpaqlarımızın müdafiəsində dayanarkən şəhid olmuşdu. Atəşkəs olmasına baxmayaraq öz çirkin əməllərindən əl çəkməyən namərd düşmən gülləsi Rüzgarı şəhidlik zirvəsizə yüksəltmişdi. Bax, həmin o tarixdən qardaşının adını yaşatmaq və həm də içindəki sözün işığını hər kəsə çatdırmaq üçün Füzuli İmranoğlu "Rüzgar" adlı qəzet təsis etdi. Artıq 9 ildir ki, bu qəzet oxucularla ayda iki dəfə görüşür və onun hər sayında təsisçi və baş redaktorun, eləcə də yaradıcı kollektivin peşəkarlığı, sözə dəyər verməsi, sözü urvatlı tutması, mövzuların rəngarəngliyi, bir sözlə, oxucu rəğbətini qazanmış mükəmməl səhifələrin, yazıların mütaliəsi şəxsən məndə xoş ovqat yaradır. Hətta etiraf edim ki, bəzən öyrədir də. Bütün bunların fonunda bir gerçək də var. O da "Rüzgar" qəzetinin təkcə bir mətbu orqan yox, həm də bir xeyriyyə ünvanı kimi də fəaliyyət göstərməsidi. Belə ki, bu 16 səhifəlik qəzetin yaradıcı kollektivinin dəstəyi ilə Qarabağ qaçqını olan üç şairin kitabına sponsorluq edib milli bayramlarda qocalar və uşaqları unutmayaraq onların sığındıqları evlərə yardımlar çatdırır, bayram sovqatlarını əsirgəmirlər. Bu da onu göstərir ki, Füzuli müəllim sözlə, qələmlə yanaşı, maddi imkanı ilə də oxucularının yanındadı. Bu qədər məsuliyyətli, gərgin işin içərisində o həm də bir yazıçı-publisist kimi də bizləri, yəni onun imzasını gözləyənləri, izləyənləri sevindirib - 2 bədii, 4 publisist kitabın müəllifi kimi də söz dünyamıza ərməğan veribdi.

Bəli, əvvəldə vurğuladığım kimi, sözü də adı kimi yüksək tutan, sözün işığını heç kimdən əsirgəməyən Füzuli Rüzgar paytaxtdan uzaqda yaşasa da, amma böyük Azərbaycan mətbuatının qaynar qazanında öz yerini çoxdan təsdiq edibdi. Elə Milli Mətbuatımızın 140 illiyi ərəfəsində onun "Rüzgar" qəzeti bir daha sübut etdi ki, o, ənənələrə, yəni Zərdabidən gələn böyük yola sadiqdi. Necə deyərlər, o, sözün sadiq əsgəridi!

Əbülfət MƏDƏTOĞLU

Ədalət.- 2015.- 16 iyul.- S. 4.