ŞABRAN - QƏDİM MƏKAN

Yəqin çoxlarınızın qədim şəhər Şabran haqqında müəyyən təsəvvürləri var. Bu qədim şəhər öz zəngin tarixi ilə bu günümüzə qədər gəlib çıxıb. Təsadüfi deyil ki, həmin şəhərin qalıqları da bu gün mövcuddur. Rəhimli kəndinin yuxarı hissəsində mövcud olan bu qədim məkanda arxeoloqlar ən qədim dövrə məxsus olan əşyalar tapıblar və orda uzun müddət tarixçilər tədqiqat da aparıblar. Məlum olub ki, qədim Şabran şəhərinin çox zəngin bir tarixi keçmişi olub. Keçmişə söykənən yeni Şabran isə demək olar ki, tamamilə müasir memarlıq üslubunda inşa edilir.

Halallıq olan yerdə

Sövet dönəmində bu rayona yolum tez-tez düşürdü. Birincisi ona görə ki, elə mənim taleyim bu rayonla bağlıdır. Rayonun ən böyük kəndlərindən biri olan Rəhimli kəndi ilə qohum olmuşuq. Orda mənim doğmalarım, əzizlərim məskunlaşıb. Hamısı da halal zəhmətlə, alın təri ilə yaşayıblar. Düzdür, bir tikə çörəklərini çətinliklə qazanıblar, ancaq nə əldə ediblərsə, nəyə nail olublarsa, hamısını halal yolla qazanıblar. Təbii ki, bu da o insanların mənəvi saflığından, təmizliyindən və Allah sevgisindən irəli gəlir. Ümumiyyətlə, bu tərəfin insanları Allahı daha çox sevirlər. Düzdür, bir qədər çətinlik çəkirlər, əziyyətlə üzləşirlər, lakin qazandıqları bir parça çörəyi çox şirinliklə yeyirlər. Əlbəttə, hər şeydə halallıq olanda, təmizlik olanda o insanlar bir-birlərinin gözlərinin içinə dik baxmağı bacarırlar. Yəni heç kəs heç kəsin halal çörəyinə əl uzatmaq istəməz.

Səhərin gözü açılandan tarlaya üz tutan Rəhimli kəndinin camaatı sözün həqiqi mənasında torpağa bağlı olan insanlardır. Onlardan biri ilə söhbət edirəm. Bu Etibar Məmmədovdur. Deyir ki, indi yoldaşımı da götürüb əkin sahəmiz var, ora gedirəm. O əkin sahəsində çoxlu pomidor, badımcan, xiyar və digər tərəvəz məhsulları əkmişik. Ötən il yaxşı məhsul götürdük. Bu il də pis deyil. Sahədə hər şey çox yaxşıdır. Sadəcə olaraq bir az əziyyət çəkmək lazımdır ki, məhsul bol olsun və qazancımız özümüzə yetsin. Pomidor yaxşı olanda bazara getməyə ehtiyac qalmır, çünki gəlib sahədən sərfəli qiymətə həmin məhsulu alırlar. Ötən il 5 ton pomidor satdıq. Onun pulu ilə evimizdə təmir işləri apardıq, bir neçə də mal-qoyun alıb həyətimizdə saxladıq. İndi şükür Allaha, mal-qoyundan da pul qazanırıq, bostan-tərəvəzdən də. Hökumət də çox sağ olsun ki, bizə köməklik edir, əl tutur və şərait yaradır.

Şəhərə baxanda

adamın ürəyi sevincindən köksünə sığmır

Əlbəttə, abad şəhər gözəl bir məkandır. Amma hər şəhəri abad eləmək üçün də gərək əziyyət çəkəsən. Ölkə prezidenti İlham Əliyevin köməyi və dəstəyi nəticəsində Şabranda çox böyük abadlıq, quruculuq işləri görülüb. Bir-birindən gözəl yaşayış binaları, küçələr, prospektlər adamıq diqqətini özünə çəkir. Üstəlik də yeni-yeni əsaslı təmir edilmiş inzibati binalar, xəstəxanalar və müasir tikililər göz oxşayır. Adam bilmir ki, onların hansına tamaşa eləsin. İnsanın ürəyini sevindirən və qəlbini açan həm də Şabrandakı səliqə-səhman və təmizlik işləridir. Bir qayda olaraq küçələr çox səliqəli və gözəl görünür. Mərkəzi küçədə Şabran sakini Natiq Əliyevlə söhbət eləyirik. O da bizim qabağımıza düşüb möhtəşəm Heydər Əliyev parkını, eləcə də digər gözəl yerləri bir-bir bizə göstərir. Sanki bələdçi kimi onları təqdim edir və hər biri haqqında məlumat verir. Hiss edirik ki, o bu torpağa, bu yurda çox bağlı adamdır. Çünki Şabrandan danışanda sevincindən ürəyi köksünə sığmır və deyir ki, müəllim, burda əvvəllər vəziyyət o qədər də ürəkaçan deyildi, amma son on ildə rayonumuzda o qədər möhtəşəm işlər görülüb ki, saymaqla qurtarmaq olmur. Yaxşısı budur gəlin gedək yeni tikilən çayxanada bir stəkan çay içək. Müasir üslubda inşa edilmiş bu çayxanada hər bir şərait yaradılıb. Ətrafdakı insanların da çöhrəsində bir sevinc hiss olunur. Kimi domino oynayır, kimi nərd taxta, kimi də şahmat. Ən çox yaşlı insanların istirahət etdiyinin şahidi oluruq. Yaşı 80-ni haqlamış Cəfər kişi fərəhlə deyir ki, oğul, şükür Allaha, rayonumuzda insanların istirahəti və rahatlığı üçün hər bir şərait var. Belə bir şəraiti əvvəllər biz təsəvvür edə bilməzdik. Heç Sovet dönəmində bu qədər möhtəşəm tikililər, xəstəxanalar, məktəblər olmayıb. Buna görə biz ölkə prezidenti cənab İlham Əliyevə minnətdarıq. Çünki o, dəfələrlə bizim rayona səfər edib və rayonumuzun sosial problemlərinin həllinə böyük köməklik göstərib. Bu gün Şabranda hansı qapını döysən, hansı evə getsən orda yeməyə çörək də var, içməyə su da. Bütün evlərdə qonaqlara böyük məhəbbət hissi var. Təbii ki, insanın şəraiti yaxşı olanda, imkanı yetərincə çatanda başqasına da arxa durmaq istəyir.

Abadlıq işləri kəndlərə ayaq açır

Bu gün böyük abadlıq və quruculuq işlər tək Şabran şəhərində deyil, onun ən ucqar kəndlərində və yaşayış məntəqələrində belə nəzərə çarpır. Başqa sözlə demş olsaq, insanlar bu abadlıq və quruculuq işlərini gündəlik həyatlarında hiss edirlər. Neçə-neçə kəndə asfalt yol çəkilib, təbii qaz verilib. Və eyni zamanda həmin yaşayış məntəqələri içməli su ilə təchiz edilib. Sevindirici haldır ki, Şabranın kəndlərindəki məktəblər və xəstəxanalar da əsaslı təmir edilir. Təbii ki, bu cür abadlıq işlərinin geniş vüsət alması ilk növbədə hər bir şabranlının ürəyindən xəbər verir.

Bir vaxtlar insanlar kəndləri, yaşayış məntəqələrini ona görə tərk edirdilər ki, orda lazımi şərait yox idi. Amma indi bütün rayonlarda şəhərdəki kimi insanlar üçün hər cür şərait yaradılıb. Aydındır ki, bu cür şəraitin olması insanları dədə-baba yurduna daha ürəkdən bağlanmağa sövq edir. Çünki bir insanın iş yeri, dolanışığı yaxşı olanda istər-istəməz o daha rahat yaşayır. Başqa sözlə demiş olsaq, insanların qayğısı azalanda onlar dərindən nəfəs alırlar.

Şabranda kiminlə söhbət elədiksə onlar bir ağızdan dedilər ki, bu möhtəşəm işlər Ulu Öndər Heydər Əliyevin və prezident İlham Əliyevin bizə olan qayğısının nəticəsidir. Eyni zamanda sadə şabranlılar onu da bildirdilər ki, rayon icra hakimiyyətinin başçısı Novruz Novruzov da camaatın dərin hörmətini qazanıb. Və rayonda mövcud problemlərin həll edilməsində cənab prezidentə arxalanır. Təbii ki, biz də öz sahəmizdə, öz işimizdə ölkəmizə və xalqımıza töhfəmizi verməliyik. Əgər mənim torpağıim varsa onu əkməliyəm, yetişdirməliyəm və bazara çıxarmalıyam. Yəni hərə öz işi ilə bu dövlətə, bu xalqa kömək göstərməlidir. Bax, onda ölkəmiz daha güclü və daha qüdrətli olar.

Faiq Qismətoğlu

Ədalət.- 2015.- 17 iyul.- S. 4.