NUR İÇİNDƏ OLAN HORADİZ

Layihənin istiqaməti: Regionların sosial-iqtisadi inkişafının təşviq edilməsi

"... Kənd təsərrüfatının inkişafı üçün kreditlər, gübrələr, əlavə texnika verilir. Soyuducu anbarlar, taxıl anbarları tikilir. Yəni, biz istəyirik ki, bu inkişafa daha da güclü təkan verək. Çünki hər bir bölgədə, hər bir kənddə yaxşı şərait olsun, rifah artsın, iş yerləri açılsın və gözəl abadlıq işləri görülsün".

Azərbaycan Respublikasının Prezidenti

İlham Əliyev

Bu gün məmləkətimizin bütün rayonlarında sonra dərəcə möhtəşəm və böyük abadlıq işləri görülür. Təbii ki, bütün bunlar hamısı Ulu Öndər Heydər Əliyevin və prezident İlham Əliyevin həyata keçirdiyi uzaqgörən siyasətin bəhrəsidir. Azərbaycanın hansı rayonuna, hansı kəndinə, hansı qəsəbəsinə gedirsənsə bu cür möhtəşəm, abadlıq və quruculuq işlərinin şahidi olursan. Sanki Azərbaycan ildırım sürətilə hərəkət edir. Təbii ki, bunu gözügötürməyən qüvvələr də var. Qoy onlar belə işlərə baxıb köks ötürsünlər və paxıllıqlarından ürəkləri partlasın.

Möhtəşəm şəhər

Bu barədə mən dəfələrlə öz yazılarımda qeyd eləmişəm. Qeyd eləmişəm ki, Füzuli rayonunun Horadiz şəhəri öz gözəlliyinə və əsrarəngizliyinə görə heç də Avropa şəhərlərindən geri qalmır. Hələ biz Bakını demirik ha, Horadizi xatırlayırıq. Çünki Horadizi görənlər, onun prospekti və küçələri ilə gəzənlər möhtəşəm quruculuq işlərinin şahidi olurlar. Yolun sağında və solunda əkilmiş küknar ağacları şəhərə qeyri-adi bir gözəllik verir. Bununla yanaşı, Bayraq meydanının möhtəşəmliyi isə tamamilə fərqlidir. Ən azından ona görə ki, bu yüksəklikdə Azərbaycan bayrağı dalğalanır və təpəliklərdə çoxlu sayda müxtəlif ağac kolları əkilib. Belə baxanda adama çox xoş olur. Xüsusən isti yay günlərində təmiz hava udmaq istəyirsənsə istər-istəməz Bayraq meydanına qalxmalısan. O yüksəklikdən işğal altında olan torpaqlarımız görünür. Ərgünəşin uca zirvəsi sanki bizi özünə çağırır. O zirvəyə baxanda kövrəlirəm və çox yaxınlıqda olan Füzuli şəhərinə gedə bilmədiyimə görə özümü qınayıram. Həsrətlə həmin yerlərlə baxıram, kövrəlirəm və gözlərim doluxsunur. Aşağı düşüb çayxanada bir stəkan çay içirəm və yavaş-yavaş toxtayıram...

İnsanlar bu yerlərə

ürəkdən bağlanıblar

Füzuli rayonu 1993-cü ilin avqustun 23-də erməni işğalçıları tərəfindən işğal edilib. İşğal edilməmişdən öncə Füzulidə 84 yaşayış məntəqəsi, şəhər və qəsəbə vardı. Təbii ki, erməni işğalçıları işğal zamanı öz simalarını göstərmiş və yaşayış məntəqələrini yandıraraq külə döndərmişdilər. 1994-cü ilin yanvarın əvvəllərində Ulu Öndər Heydər Əliyevin rəhbərliyi ilə Füzulinin işğal altında olan Horadiz şəhəri və 22 yaşayış məntəqəsi ermənilərdən azad edildi. Və hər şey də bundan sonra bərpa olunmağa başladı. Ulu Öndər Heydər Əliyev Füzuliyə səfəri zamanı qeyd etmişdi ki, biz işğaldan azad olunmuş yaşayış məntəqələrinin hamısını bərpa edəcəyik. Bu fikirlər prezident İlham Əliyev tərəfindən də davam etdirilmiş və Füzuli rayonunun azad olunmuş yaşayış məntəqələri əsaslı surətdə bərpa edilmiş və yenidən tikilmişdir. Çox qəribə də olsa deyək ki, ermənilər həmin yerləri görsələr paxıllıqdan ürəkləri partlayar. Çünki xarabalığa çevirdikləri yaşayış məntəqələri indi hamısı abad gündədir. Horadizin qeyri-adi bərpası və gülüstana çevrilməsi dediklərimizə əyani sübutdur.

Kəndlərdə hər şey dəyişib

İşğaldan azad olunmuş kəndlərdə demək olar ki, hər şey tamamilə dəyişib. Yandırılmış və dağıdılmış evlər əsaslı surətdə bərpa edilib. Nəinki indi həmin kəndlərdə yaşayış var, bu yaşayış məntəqələrində həyat o qədər inkişaf edib ki, Bakıda və digər yerlərdə müvəqqəti məskunlaşmış sakinlər hamısı öz dədə-baba yurdlarına dönüblər. Ən azından ona görə ki, hər evdə-eşikdə ocaq yanır, tüstü bacadan çıxır və insanlar həyət-bacada təsərrüfat işləri ilə məşğuldurlar. Füzulinin elə bir kəndi yoxdur ki, işğaldan sonra ora asfalt yol çəkilməsin, qaz xətti olmasın və eləcə də digər abadlıq işləri həyata keçirilməsin. Hətta Sovet dönəmində belə bir çox kəndlərdə təbii qaz olmadığı halda bu gün yaşayış məntəqələrində mavi qaz var və insanlar qışda yanacaq sarıdan heç bir korluq çəkmirlər. Bu isə o deməkdir ki, əhali birmənalı olaraq ölkə prezidenti İlham Əliyevin apardığı siyasəti dəstəkləyir və öz əməli işləri ilə ölkəmizə töhfələrini verirlər.

Çörək boldur

Ötən illərdə olduğu kimi, bu il də Füzulidə kənd təsərrüfatı məhsullarının istehsalı sahəsində yüksək məhsuldarlığa nail olunub. İlk növbədə rayonda maldarlıq inkişaf edib. Bununla yanaşı, bostan-tərəvəz məhsullarının istehsalı artıb. Təbii ki, bu da dövlət və hökumət tərəfindən sahibkarlara yaradılmış münbit şəraitlə bağlıdır. Əlbəttə, zəhmət adamına şərait yaradılanda, ona güzəştlər ediləndə o adamlar da istər-istəməz istədiklərinə nail olmağı bacarırlar. Belə ki, rayonda taxılçılığın inkişafına xüsusi diqqət yetirilir. Fermerlərə güzəştli yanacaqlar verilir, kənd təsərrüfatını inkişaf etdirmək üçün böyük köməklik göstərilir. Elə bunun nəticəsidir ki, ötən il taxılçılıq sahəsində ən yüksək nəticə əldə olunub və yüz min tondan çox taxıl istehsal edilib. Bu il də rayonda taxılçılıq yüksək xətlə inkişaf edib. Artıq arpa biçiminə başlanılıb. Bir müddətdən sonra taxıl yığımı başlanacaq.

Rayon icra hakimiyyətinin başçısı Alı Alıyev isə bildirir ki, ölkə prezidenti cənab İlham Əliyev rayonumuza çox böyük qayğı və diqqət göstərir. Nə əldə etmişiksə, hansı uğurları qazanmışıqsa, bunun hamısı cənab prezidentin zəhmətinin bəhrəidir. Elə məhz füzulililər də hörmətli prezidentimiz İlham Əliyevin bu qayğısını yüksək qiymətləndirir, onun apardığı daxili və xarici siyasəti dəstəkləyir. Çünki cənab prezident həmişə füzulililərə qarşı çox diqqətli olub və bizim bütün problemlərimizin həll edilməsində öz köməkliyini göstərib. Bir daha füzulililər adından deyə bilərəm ki, biz cənab prezidentin etimadını doğruldacaq, dövlətçiliyə daha sadiq olacaq, bu istiqamətdə öz əməli işlərimizi davam etdirəcəyik.

(Ardı var)

Faiq QİSMƏTOĞLU

AzƏrbaycan Respublikasının Prezidenti yanında kütlƏvi informasiya vasitƏlƏrinin inkişafına dövlƏt dƏstƏyi fondunun maliyyƏ yardımı ilƏ

Ədalət.-2015.-17 iyun.-S.7.