Mingəçevir - əsl Avropa şəhərində Avropa Oyunları

AzƏrbaycan Respublikasının Prezidenti yanında kütlƏvi informasiya vasitƏlƏrinin inkişafına dövlƏt dƏstƏyi fondunun maliyyƏ yardımı ilƏ

Layihənin istiqaməti: Regionların sosial-iqtisadi inkişafının təşviq edilməsi

"...Hər bir şəhərin inkişafı ölkəmizin ümumi inkişafına bir töhfədir. Hər bir şəhərin inkişafı burada sakinlərin yaşayış şəraitini yaxşılaşdırır, yeni imkanlar, yeni iş yerləri, yeni müəssisələr açılır. Mingəçevir şəhərinin inkişafı ilə bağlı müvafiq sərəncamlar verilmişdir, vəsait ayrılmışdır".

Azərbaycan Respublikasının Prezidenti

İlham Əliyev

(əvvəli

ötən sayımızda)

Azərbaycan xalqı tarixi anlara şahidlik edir. I Avropa Oyunları qitənin idman ictimaiyyətinin diqqətini ölkəmizə yönəldib. Bakıda keçirilən bu mötəbər tədbirdə 50 ölkə 6 mindən çox idmançı ilə təmsil olunur.

Mingəçevir şəhəri də adını qitədə ilk dəfə keçirilən bu yarışların tarixinə yazıb. I Avropa Oyunlarının proqramına daxil olan avarçəkmə yarışları Azərbaycanın bu müasir və gözəl şəhərində keçirilir.

Dünya Mingəçevirə baxır

Avarçəkmə yarışlarında iştirak etmək üçün 300-ə yaxın idmançı Mingəçevirə gəlib. 37 müxtəlif ölkəni təmsil edən həmin idmançılar arasında Olimpiya çempionları və mükafatçıları da var. I Avropa Oyunlarının medalları uğrunda mübarizə aparan avarçəkənlər üçün Mingəçevirdə yüksək səviyyədə şərait yaradılıb.

Yarışlar başlamazdan öncə Mingəçevirə gələn "Bakı-2015" Avropa Oyunları Əməliyyat Komitəsinin əməliyyatlar üzrə Baş direktoru Saymon Kleq görülən işləri yüksək dəyərləndirib: "Yarışlar keçirilən "Kür" Olimpiya Tədris İdman Mərkəzində şərait çox gözəldir. Belə məsul yarış ərəfəsində bütün işlər vaxtında və keyfiyyətlə görülüb. Mingəçevirdə idmançılar, məşqçi heyəti, tibbi personal və yarışları işıqlandıran jurnalistlər üçün hər cür şərait yaradılıb. İdmançılar və tamaşaçılar üçün ən müasir texnoloji yeniliklər tətbiq olunur. Burada salınan Atletlər şəhərciyinin başqa gözəlliyi var. Gördüklərim mənə əsas verir deyim ki, Mingəçevirdə yaradılan şərait Bakıdan heç də geri qalmır. İnanıram ki, müxtəlif ölkələrdən gələn idmançılar və xarici turistlər də bu fikirdədir".

I Avropa Oyunlarında gümüş medalı boynundan asan millimizin üzvü, tanınmış kanoeçi Valentin Demyanenko bu yarışları hər zaman xatırlayacaq. Çexiyalı Marton Foksa, macar Denita Kozak, latviyalı avarçəkən Henrikas Justautas da Mingəçevirdə keçirdikləri günləri, buradakı gözəl və rahat şəraiti yəqin ki, heç vaxt unutmayacaqlar.

Xatırladaq ki, "Kür" Olimpiya Tədris İdman Mərkəzində keçirilən kayak və kanoe yarışları dünyanın aparıcı idman kanalları vasitəsi ilə yayımlanıb. I Avropa Oyunları ilə əlaqədar bu şəhərə gələn çoxsaylı turistlərlə yanaşı ekran qarşısında yarışları izləyən milyonlarla tamaşaçı da Mingəçevirin gözəlliyinə heyran olub.

Kürün sahilindəki

gözəllik

Azərbaycanın turizm perspektivli bölgələrindən biri də Mingəçevirdir. Bu istiqamətdə silsilə tədbirlər həyata keçirilir. Şəhərin turizm sahəsində inkişaf planı və turist xəritəsi hazırlanıb.

I Avropa Oyunları çərçivəsində avarçəkmə yarışlarının Mingəçevirdə keçirilməsi Kür çayının sahilində yerləşən bu ecazkar şəhərdə turizmin inkişafına önəmli töhfə verəcək.

Mingəçevir Turizm Kolleci həm bölgədə, həm də ümumilikdə ölkəmizdə bu sahə üzrə kadr hazırlığı ilə məşğul olan tədris müəssisələrindən biridir. 2006-cı ildə yaradılan bu orta ixtisas təhsili müəssisəsində hazırda 2 mindən çox tələbə təhsil alır. Kollecdə 10-dan çox ixtisas üzrə tədris aparılır.

Kür çayının sağ və sol sahilində yerləşən Mingəçevir ilin bütün fəsillərində turizm üçün çox əlverişli məkanlardan hesab olunur. Mingəçevir Tarix Muzeyi turistlərin diqqətini çəkən məkanlardan biridir. Muzeyin direktoru Nofər Məmmədəliyevin sözlərinə görə, burada 15 minə yaxın eksponat - eneolit dövründən başlayaraq ayrı-ayrı tarixi mərhələləri özündə ardıcıl əks etdirən maddi-mədəniyyət nümunələri nümayiş etdirilir. Eyni zamanda muzeydə müasir Mingəçevir, şəhərdəki bütün müəssisə və təşkilatlar haqqında da məlumat almaq olar.

Mingəçevir Su Elektrik Stansiyası şəhərin simvollarından biri sayılır. Ölkə başçısı İlham Əliyevin tapşırığı ilə 2010-cu ildə əsaslı şəkildə yenidən qurulan bu unikal kompleksin tikintisinə 1945-ci ildə başlanılsa da, stansiya 1954-cü ildə işə salınıb. Mingəçevir SES Cənubi Qafqazda ən iri su elektrik stansiyasıdır. Stansiyanın inşası ilə yanaşı burada ölkəmizin yeni sənaye mərkəzinin - energetiklər şəhəri Mingəçevirin təməli qoyulub. 1957-ci ildə Varvara SES işə düşdükdən sonra bu iki qurğu birlikdə "Mingəçevir SES silsiləsi" adlanır. Kür çayının Bozdağdan keçdiyi yerdə yaradılan Mingəçevir su anbarının ümumi tutumu 15730 milyon kubmetrdir. Anbarın çay boyu uzunluğu 70 kilometrdir, eni 3 kilometrdən 18 kilometrədək dəyişir. Maksimal dərinliyi 75 metr, orta dərinliyi 26 metr, sahil xəttinin uzunluğu 247 kilometrdir. Mingəçevir su anbarı həm də iki kanalı - Yuxarı Qarabağ və Yuxarı Şirvan kanallarını su ilə təchiz edir. Bu kanallardan Mil, Muğan, Şirvan düzlərinin suvarılmasında, eləcə də balıqçılıq və rekreasiya məqsədi üçün də istifadə olunur.

Mingəçevirə gələn turistlərə müasir tələblərə cavab verən hotellər xidmət göstərir. Onlardan biri - 4 ulduzlu "Riverside" müştərilərin xoşuna gəlir. Burada turistlər gəmi gəzintisinə çıxa, katamaran, su motosikletlərindən istifadə edə, balıq və quş ovlaya, həmçinin milli və Avropa mətbəxinə aid gözəl yeməklərinin dadına baxa bilərlər.

Şəhərdəki digər turizm obyektlərində də yerli və xarici qonaqlara yüksək keyfiyyətli xidmət göstərilir. Mingəçevir Şəhər İcra Hakimiyyətinin rəhbərliyi xidmət sahələri ilə məşğul olan sahibkarlara hər cür şərait yaradır, onların işini daim diqqət mərkəzində saxlayır. Ərazinin turizm potensialından səmərəli istifadə olunması bölgəyə həm yerli, həm də xarici turistlərin axınını gücləndirib. Təsadüfi deyil ki, son illər şəhərə gələn turistlərin sayında artım müşahidə olunur. Yolu yaşıllıqlara bürünən bu şəhərə düşən hər bir qonaq yenidən buralara qayıtmaq istəyir. Müasir, gözəl və hər addımda səliqə-sahman duyulan Mingəçevirə kim bir də gəlmək istəməz ki...

Ədalət.-2015.-20 iyun.-S.4.