ÜZÜ BAHARA DOĞRU BOYLANAN GÖYÇAY

Layihənin istiqaməti: Regionların sosial-iqtisadi inkişafının təşviq edilməsi

"...Rayonun inkişafı sürətlə gedir. Gördüklərim məni çox sevindirir. Şəhərin abadlaşması, küçələrin salınması, binaların bərpası, yeni ictimai yerlərin yaradılması Azərbaycanda gedən ümumi siyasətimizin təzahürüdür. Çünki mən istəyirəm ki, hər bir şəhərdə, hər bir rayonda işlər yaxşı getsin".

Azərbaycan Respublikasının Prezidenti

İlham Əliyev

(əvvəli ötən sayımızda)

Aparılan uğurlu aqrar islahatlar nəticəsində torpaq və əmlak üzərində yeni mülkiyyət münasibətlərinin formalaşması kənd təsərrüfati məhsullarının üstün artımına, əhalinin məşğulluğunun yüksəldilməsinə və sosial-iqtisadi vəziyyətinin yaxşılaşmasına səbəb olmuşdur.

2014-cü ildə rayonun kənd təsərrüfatında ümumi məhsul istehsalının həcmi 2,0 faiz artaraq 97,3 milyon manata çatmışdır.

Hesabat dövründə rayon əhalisinin həyat səviyyəsi xeyli yaxşılaşmış, pərakəndə əmtəə dövriyyəsinin həcmi 8,5 faiz, əhaliyə göstərilən pullu xidmətlərin həcmi 2,4 faiz, orta aylıq nominal əməkhaqqı 4,0 faiz artmışdır.

2014-cü ildə əhaliyə 751,9 min manatlıq rabitə və poçt xidmətləri göstərilmişdir ki, bu da 2013-cü ilə nisbətən 12,4 faiz çoxdur. Rayon əhalisinə göstərilən rabitə xidmətinin səviyyəsi xeyli yüksəlmiş, daha müasir rabitə texnologiyalarının tətbiqi ilə əlaqədar internet istifadəçilərinin sayı əsaslı şəkildə artmışdır.

Rayon əhalisinin elektrik enerjisi və təbii qazla təchizatının yaxşılaşdırılması, istifadə edilmiş elektrik enerjisinin və təbii qazın dəyərinin ödənilməsi sahəsində bir sıra işlər görülmüş, elektrik yarımstansiyalarında daha müasir avadanlıqlar quraşdırılmışdır.

Qaz istismar sahəsi tərəfindən 2014-cü ildə 3,4 p/km. müxtəlif diametrli istismara yararsız qaz xətləri, 11 ədəd qaz tənzimləyici şkaflar yenisi ilə əvəz edilmiş, Yekəxana və Şıxbəy kəndlərinin qaz təchizatının bərpası işlərinə başlanılmışdır...

Şəhərin abadlaşdırılması və yaşıllaşdırılması, küçə və meydanların yenidən qurulması istiqamətində xeyli işlər görülmüşdür.

"İDEA" ictimai birliyinin təşəbbüsü ilə 2014-cü ilin sentyabr-noyabr aylarında ümumrespublika yaşıllaşdırma" marafonu çərçivəsində həyata keçirilmiş ağacəkmə kompaniyası zamanı şəhərdə və kənd yaşayış məntəqələrində 30 minə yaxın ağac və gül kolları əkilmişdir.

Şahmat məktəbinin tikintisi başa çatdırılmış, Gənclər evinin tikintisində işlər davam etdirilmiş, rayon mədəniyyət evinin fasadı, Heydər Əliyev prospektində çoxmənzilli binaların üz hissələri müasir memarlıq baxımından yenidən qurulmuş, dam örtükləri təzələnmişdir. Şəhərin Nizami küçəsində yağış sularını ötürmək üçün yeni su ötürücülər çəkilmiş, Nizami və M.Hüseynzadə küçələrində abadlıq işləri aparılmış, həmin ərazidəki fərdi yaşayış evləri və divarlar müasir memarlıq tələbləri baxımından üzlənib, evlərin və xidmət obyektlərinin dam örtükləri təzələnib. Heydər Əliyev prospektinə, Nizami, R.Rza və M.Ə.Rəsulzadə küçələrinə yeni asfalt örtüyü salınıb.

Bütün bunlarla yanaşı şəhər təsərrüfatının işində bir çox problemlər vardır.

Suvarma arxlarının mühafizə zolağı ayrı-ayrı vətəndaşlar tərəfindən zəbt edildiyindən, bir sıra yerlərdə mühafizə zonasında ticarət və xidmət obyektləri inşa edildiyindən arxların texnika ilə qazılmasında ciddi çətinliklər mövcuddur. Məişət tullantılarının və ayrı-ayrı həyətlərdən çirkab sularının suvarma arxlarına tökülməsi hallarına qarşı lazımi mübarizə aparılmır və bu sahəyə nəzarət etmək üçün şəhər bələdiyyəsinin və icra nümayəndəliyinin, bu sahəyə məsul olan təşkilatların məsul işçilərindən yaradılmış komissiyanın fəaliyyəti lazımi səmərə vermir. Şəhər ərazisində pərakəndə küçə ticarətinin qadağan olunmasına baxmayaraq hələ də bir çox yerlərdə, xüsusən bazar ətrafı ərazilərdə küçə ticarəti baş alıb gedir.

Rayonun içməli suya tələbatı

tam ödəniləcək

Hesabat dövründə şəhər əhalisinin içməli su ilə təminatının yaxşılaşdırılması istiqamətində müəyyən tədbirlər həyata keçirilmişdir.

Göyçay şəhərinin su təchizatı və kanalizasiya sisteminin yenidənqurulma layihəsinin ikinci mərhələsində işlər davam etdirilmiş, şəhərin Heydər Əliyev prospektindən cənubda yerləşən əhaliyə, müəssisə və təşkilatlara yeni su mənbəyindən içməli su verilməsinə başlanılmışdır. Rayonun içməli su mənbəyi olmayan 16 yaşayış məntəqəsində modul tipli su təmizləyici qurğuların quraşdırılması üçün torpaq sahələri seçilmiş və sənədlər Ekologiya və Təbii Sərvətlər Nazirliyinə təqdim edilmişdir. Ötən il nazirlik tərəfindən rayonun Bığır, Mırtı, Alıkənd, Türkmən kəndlərində modul tipli su təmizləyici qurğuların tikintisi və quraşdırılması işlərinə başlanılmışdır.

Prezident: "Üçüncü proqramın icrası ilə bağlı heç bir problem olmamalıdır"

2014-cü ilin yanvar ayının 27-də Heydər Əliyev Mərkəzində "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının birinci ilinin yekunlarına həsr olunmuş konfrans keçirilmiş və Azərbaycan Respublikasının Prezidenti cənab İlham Əliyev konfransda iştirak etmişdir. Cənab Prezident öz çıxışında bildirmişdir ki, "Üçüncü proqramın icrası ilə bağlı heç bir problem olmamalıdır. Proqramı icra etmək üçün bütün cəmiyyət səfərbər olmalıdır və əminəm ki, biz buna nail olacağıq".

"Azərbaycan Respublikası Regionlarının 2014-2018-ci illərdə sosial-iqtisadi inkişafı Dövlət Proqramı"nda Göyçay rayonu üzrə nəzərdə tutulmuş tədbirlərin yerinə yetirilməsi sahəsində müəyyən işlər görülmüşdür. Hesabat dövründə ölkəmizdə alternativ enerji mənbələrindən, xüsusən hidroresurslardan geniş istifadə edilməsi çərçivəsində Yuxarı Şirvan kanalının Göyçay rayonunun Bığır kəndi ərazisindən keçən əlverişli və münasib hissəsində inşa edilən 3 Mva gücü olan "Göyçay -1" su elektrik stansiyasının tikintisi başa çatdırılmışdır. Rayon ərazisində yol infrastrukturunun təkmilləşdirilməsi, kəndlərarası avtomobil yollarının yenidən qurulması istiqamətində əməli tədbirlər görülmüş, Muğanlı-Yevlax avtomagistralının Göyçay rayonu ərazisindən keçən hissəsinin tikintisi davam etdirilmiş, Göyçay-Ucar avtomobil yolunun əsaslı təmiri başa çatdırılmışdır.

"Göyçay rayonunun sosial-iqtisadi inkişafının sürətləndirilməsinə dair əlavə tədbirlər haqqında" Azərbaycan Respublikası Prezidentinin 17 iyul 2013-cü il tarixli sərəncamına əsasən inşa edilən 7 min əhalisi olan 6 yaşayış məntəqəsini birləşdirən Cəyirli-Qızılağac-Yenikənd avtomobil yolu istifadəyə verilmişdir.

(ardı gələn sayımızda)

Məzahir ƏHMƏDOĞLU

Ədalət.-2015.-4 mart.-S.6.