Nərgiz Cəlilova: "Yaradıcı insanlar həmişə özlərini təsdiqləməlidirlər"

"“Sevilənlər” birgə yaradıcılığın məhsuludur"

Hazırladığı müxtəlif verilişlərlə daim tamaşaçıları sevindirən tanınmış teleaparıcı Nərgiz Cəlilovanın Azərbaycan Televiziyasındakı yeni "Sevilənlər” verilişi də maraqla qarşılanıb. Artıq bir aydır yayımlanan "Sevilənlər” elə adına uyğun olaraq tanınmış simaları qonaq etməklə, müxtəlif mövzulara toxunmaqla tamaşaçıların görüşünə gəlir. İzləyici marağını nəzərə alaraq Nərgiz Cəlilova ilə "Sevilənlər”dən danışdıq. Adalet.az müsahibəni təqdim edir:

- İlk olaraq yeni verilişiniz münasibətilə təbrik edirik. Həmişəki kimi çox uğurlu alınıb. Şəxsən bir tamaşaçı kimi çox bəyənirəm. İstərdim ümumulikdə nəzər yetirək: necə oldu ki, yenidən Azərbaycan Televiziyasında veriliş aparmaq qərarına gəldiniz?

- Əvvəlcə onu qeyd edim ki, bu veriliş Azərbaycan Televiziyasının layihəsidir. Telekanalın rəhbərliyi məni dəvət etdi və məmnuniyyətlə bu təklifi qəbul etdim. Mən buna görə çox minnətdaram. Bilirsiniz ki, mən ilk dəfə Azərbaycan Televiziyasında aparıcılığa başladım və 10 il burda çalışandan sonra digər kanallarla işlədim. Düz 22 ildən sonra yenidən bu doğma divarların arasına qayıtmaq çox xoşdur.

- Yəqin ötən illərin nostaljisi də var.

- Əlbəttə, nostalji hisslər doğrudan da keçirtdim. Hətta bir az qorxdum da... Çünki Azərbaycan Televiziyasında çalışmaq o qədər böyük məsuliyyət tələb edir ki! Bu telekanalın tələbatı, qaydaları başqadır. Çox böyük özəllikləri var, bütün dünyaya yayımlanır. Burada dilin təmizliyinə, diksiyaya, aparıcılığa, davranışa, dəvət olunan qonaqlara çox fikir verilir. Mən də Azərbaycan televiziyasının yetirməsi kimi artıq bunları bilirdim və mənim üçün yenilik deyildi. Təbii ki AzTV özəl telekanallardan fərqlənir. Əlbəttə, mənim digər kanallara da böyük sayğım var, birlikdə gözəl layihələr həyata keçirdik, həmkarlarımı da hörmətlə xatırlayıram. Çünki televiziya işi çox ağırdır, məsuliyyətlidir, böyük zəhmət tələb edir, burada çalışan işçilərə xor baxmaq olmaz. Amma qeyd etdiyim kimi AzTV-də tələbat daha çoxdur, xüsusilə uzun illər efirdə olan insandan daha peşəkar iş tələb olunur.

- Eyni gözlənti tamaşaçıda da olur. Çünki izləyicilər Nərgiz Cəlilovadan və digər peşəkar teleaparıcılardan daha səviyyəli veriliş, arzuladıqları proqram görmək istəyirlər...

- Bəli, elə təəssürat yaranmamalıdır ki, artıq bir neçə iri layihələrə, verilişlərə imza atmısansa, deməli çox arxayın olmalısan. Əksinə, məsuliyyət birə on artır. Çox qəribə hissiyatdır, sanki bir daha özünü təsdiqləməli olursan. Düşünürəm ki, yaradıcı insanlar həmişə özlərini təsdiqləməlidirlər. Çünki yaradıcı insan üçün pik nöqtə yoxdur. Hər dəfə yeni işə başlayanda bir daha sübut etməlidir ki, o, daha peşəkardır. Hər işə sanki ilk dəfə başlayırmış kimi yanaşmalıdır. Və məsuliyyətli insanlar bunu həmişə diqqətdə saxlayırlar. Daha maraqlı, daha gözəl iş təqdim etmək istəyirlər.

- "Sevilənlər”in sizin digər verilişlərinizdən fərqi nədir, bu proqramda nəyə üstünlük verirsiniz?

- Bunu həmişə söyləyirəm ki, mən televiziya aparıcısıyam, bütün ixtisaslara yiyələnə bilmərəm. Amma qonaqlarımız müxtəlif sahələrdən, peşələrdən olur: burda yazıçı, aktyor, müğənni, eləcə də digər sahələrdən ola bilər, müxtəlif mövzulardan danışa bilərik...

- Hətta futboldan da danışdınız...

- Bəli, yazıçı Çingiz Abdullayev qonağımız olanda, onun yeni seçildiyi vəzifəsi ilə əlaqədar bu mövzuya da toxunmalı olduq. Bu sahəni az bilsəm də, istər-istəməz öyrənməli, qonaqla söhbətə hazırlaşmalı oldum. Çünki verilişimiz populyar formatdadır, sırf ixtisas verilişi deyil. Bundan başqa, çalışırıq ki, qonaqların geniş kütlə tərəfindən tanınmayan cəhətlərini, həm də yaxşı tərəfdən göstərək. Axı insanları onların yaradıcılığı, işləri ilə yanaşı iç dünyaları da maraqlandırır!.. Biz daha çox o sarı simlərə toxunmağa çalışırıq. Amma təbii ki, bəlli həddə qədər...

- Yəni qarşınızdakı qonağın səmimilik sərhəddinə hörmətlə yanaşırsınız...

- Əlbəttə! Aparıcı gərək hiss etsin ki, müsahibi ilə hara qədər danışa bilər. Onun statusunu, kimliyini nəzərə almalıdır. Çox vacib amildir ki, onunla hansı həddə qədər səmimi danışa bilərsən, duyğularına hansı nöqtəyə qədər toxuna bilərsən. Hissiyyat ayıq olmalıdır. Bir balaca hiss eləyəndə ki, qonaq bundan o tərəfə keçmək istəmir, aparıcı mütləq orda dayanmalıdır. Həmsöhbətlərin insani tərəflərini açmaq mənim üçün maraqlı olub. Çünki biz - televiziya işçiləri onları tanıyırıq, amma geniş tamaşaçı kütləsi onları tanımır. Bizim də işimiz odur ki, onların sevdikləri məşhurları tanımadıqları tərəfdən göstərək. Tamaşaçılar sevdikləri sənətkarları bir başqa tərəfdən də kəşf etsinlər. Əsas məqsəd budur.

- Hətta məşhurların ailə üzvlərini də dəvət edirsiniz. Elə ilk verilişinizdə mərhum musiqiçi Rafiq Babayevin bacısını qonaq qismində çağırmışdınız, şəxsən mənim üçün çox maraqlı oldu, məşhur qardaşı bir də bacısının dilindən eşitdik...

- Bəli, bəli. İmkan yarandıqca, təbii ki təklif edirik. İstək olanda, verilişimizə qatılıb, öz ürək sözlərini deyirlər. Onların həm özlərinə, həm tamaşaçılara xoş olan mövzularda söhbət edirik. Yəni müsahibədən çox, qarşılıqlı söhbət yaranır. Sevinirəm ki, bu alınır, həmsöhbətlərim razı qalırlar.

- Verilişin buraxılışları arasında da fərqlilik var, yəni biri digərini təkrar etmir. Məsələn, ilk verilişdə daha çox qonaq - ailə üzvləri, dostlar dəvət etmişdiniz, sonrakı bölmədə isə, deyək ki, yalnız Çingiz Abdullayevlə futboldan danışırdınız.

- Adından da göründüyü kimi əsas hədəf - "Sevilənlər”dir, yəni əhatə dairəsi genişdir, məhdud deyil. Bəzən hansısa mövzunu müzakirəyə çıxarırıq. Orada da sevilənlərdən danışa bilərik: sevilən musiqi, teatr, sənətkarlarımız ola bilər. Çünki gündəm bizə başqa mövzular da verir və biz onlara da toxunmalıyıq. Tamaşaçının tələbini, istəyini nəzərə almalıyıq.

- Bütün televiziya layihələri kimi "Sevilənlər”in də yəqin öz komandası var?

- Sözsüz ki. Verilişin redaktoru Afaq Vasifqızını uzun illərdir tanıyıram, dostluq edirik və bu, işimizdə də özünü göstərir. Hər bir mövzunu qarşılıqlı müzakirə edib işləyirik, qonaqları birgə seçirik, sualları birgə tərtib edirik. Ümumiyyətlə, işin uğurlu alınmasında komandanın çox böyük rolu var. Birlikdə çalışan insanlar eyni düşüncədə olmalıdır. Dünyagörüşü üst-üstə düşməlidir, fikirlər bir-birini tamamlamalıdır. Yəni ortada sual işarəsi qalmamalıdır. Mənim üçün kimlərlə çalışacağım çox önəmlidir, arada umu-küsü olmamalıdır, qarşılıqlı hörmət əsasdır. O zaman işin keyfiyyəti dərhal görünür. Bir sözlə, "Sevilənlər” birgə yaradıcılığın məhsuludur.

Şəfiqə Şəfa

Ədalət.-2015.-9 may.-S.8.