NÖVRAĞI DƏYİŞƏN YEVLAX

Layihənin istiqaməti: Regionların sosial-iqtisadi inkişafının təşviq edilməsi

"... Həm iqtisadi sahədəki işlər, regionların inkişafı, iş yerlərinin açılması, abadlıq-quruculuq tədbirləri, həm də idman obyektlərinin, kənd yollarının açılışı, tikintisi ölkəmizin dinamik inkişafını göstərir. Gələcək illərdə bu inkişaf daha da sürətli olmalıdır. Əvvəlki illərdə görülən işlər deməyə əsas verir ki, artıq biz böyük uğurlara nail ola bilmişik".

Azərbaycan Respublikasının Prezidenti

İlham Əliyev

(Əvvəli ötən sayımızda)

Bugünkü Azərbaycan reallığının yaxşı nümunələrindən olan Yevlax şəhəri və bu bölgənin kəndləri demək olar ki, zamanın nəbzinə uyğun bir şəkildə tikilir, abadlaşır və özünün yeniləşən həm iqtisadi, həm mədəni həyatı ilə insanların zövqünü oxşayır. Üstəlik bu bölgədə həyata keçirilən hər bir iş özü-özlüyündə adamların sosial vəziyyətinin yaxşılaşmasına, ailə büdcəsinin möhkəmlənməsinə, eyni zamanda hər bir fərdin bazar zənbilinin təmin olunmasına xidmət edir. Demək olar ki, 2014-cü ilin müvafiq dövrü ilə müqayisədə rayonda adambaşına hər nəfərə görə ümumdaxili məhsul istehsalı 8 faiz artmışdı. Bu da öz-özlüyündə baş vermir. Bunun arxasında həm dövlətin gücü, onun iqtisadi proqramı, həm də Azərbaycan insanının əməyi dayanır.

Yuxarıda qeyd etdiyimiz 8 faiz artım göstəricisi özündə başqa məqamı da əks etdirir. Yəni həmin 8 faizin nəticəsində Yevlaxda çalışan əmək adamının orta aylıq əməkhaqqı ötən ilin müvafiq dövrü ilə müqayisədə artaraq təqribən 245 manata çatmışdı. Bunun özü də insanların güzəranının yaxşılaşdığını göstərən bir sübutdu. Yeri gəlmişkən onu da xatırlatmaq lazımdır ki, bu ilin birinci rübündə ötən ilin müvafiq dövrü ilə müqayisədə əhalinin pul gəlirləri 2,4 faiz, yəni 1,4 milyon manat artaraq 58,4 milyon manat təşkil etmişdi. Onu, yəni göstərdiyimiz bu rəqəmi rayonun sakinləri üzərində bölüşdürsək, onda hər nəfərə təqribən 467 manat gəlir deməkdir.

Təqdim etdiyimiz, daha doğrusu, araşdırmağa maraq göstərdiyimiz bu rəqəmlərin arxasında Yevlax şəhər icra hakimiyyətinin başçısı Qoca Səmədovun komandası və yeril sahibkarlar, iş adamları, eləcə də bu uğurları qazanmaq üçün hazırlanmış proqramlar dayanır. Birmənalı şəkildə ifadə etmək olar ki, son illərdə Yevlaxda bütün sahələr, o cümlədən də aqrar sahə, ticarət və xidmət sahələri, tikinti-quraşdırma, büdcə maliyyə, bank, sosial müdafiə və məşğulluq sahələri də planlı şəkildə, həm də paralel olaraq inkişaf etdirilir.

Əgər həmin proqoramları nəzərdən keçirsək, onda məlum olar ki, cari ilin birinci rübündə Yevlax şəhəri üzrə pərakəndə əmtəə dövriyyəsi, eləcə də bu şəhərdə pulu xidmətlərin ümumi həcmi təqribən 71 milyon manat təşkil etmişdi. Bu isə bir il öncəki dövrlə müqayisədə təqribən 8 milyon manat artım deməkdi. Təbii ki, ticarət və xidmət sahələrində əldə edilən uğur özü-özlüyündə bu sahələrin yeni obyektlərinin, müəssisələrinin işə salınmasından, istifadəyə verilməsindən qaynaqlanır. Yəni açılan yeni obyektlər həm iş yerləri baxımından, həm də ticarət və xidmət baxımından insanları sevindirmiş, uğurların artımına təkan vermişdi. Konkret ifadə etsək, onda bəlli olar ki, ilin birinci rübündə məhz ticarət obyekti olaraq xidmətin səviyyəsinin yüksəldilməsinə istiqamətləndirilən 9 yeni obyektin tikintisinə icazə verilmiş və onlarn qısa müddətdə qapılarının vətəndaşların üzünə açmasına şərait yaradılmışdı. Bir məqamı da unutmaq lazım deyil ki, ölkəmizin digər ərazilərində olduğu kimi, Yevlax şəhərində də yeni tikilən xidmət obyektlərinin, ticarət müəssisələrinin, ümumiyyətlə, sosial sahəni irəli aparan hər bir tikintinin müasir tələblərə cavab verən dizaynla işlənilməsi şəhərin ümumi ponoram mənzərəsinin daha da gözəlləşdirilməsi rayon rəhbərliyinin diqqət mərkəzində saxlanılıb. Yəni görülən işlər ümumi mənzərəyə xələl gətirməməli, əksinə, onu daha da gözəlləşdirməlidir. Məhz bu prinsiplərlə gerçəkləşdirilən hər bir tikinti rayon rəhbərliyinin birbaşa nəzarətində saxlanılır, icra hakimiyyətinin bu sahəyə məsul olan işçilərindən bu işə görə əlavə məsuliyyət tələb edilir. "Birmənalı şəkildə görülən işlər Yevlaxı daha da gözəlləşdirməlidir!" devizi günün prinsipi kimi hər kəsin yaddaşına yazılıb.

Yevlax şəhərində aparılan tikinti-abadlıq işləri öz həcminə görə də həm diqqəti çəkir, həm də könül oxşayır. Əgər konkret faktlara üz tutsaq, onda məlum olar ki, bu ilin birinci rübündə şəhər ərazisində aparılan tikinti-quraşdırma-abadlıq işlərinə 10 milyon manatdan artıq pul qoyulmuşdu. Bu da təbii ki, ötən ilin müvafiq dövründəkindən 5 faiz çoxdur. Məhz həmin kapital qoyuluşu hesabına Yevlax şəhərində Azərbaycan Beynəlxalq bankının Yevlax filialının inzibati binası tikilib istifadəyə verilmiş, eləcə də Kür çayı sahilində 5 ulduzlu otel, rayonun polis şöbəsi üçün yeni binanın tikintisi, Aran regional inkişaf mərkəzinin, Kənd Təsərrüfatı Nazirliyinin Yevlax rayon idarəsinin, təhsil şöbəsinin, həmçinin 11 saylı Ərazi Vergilər Departamentinin inzibati binalarının tikintiləri sürətlə aparılır. Həmin inzibati banlarla yanaşı, Yevlax şəhərində 100 yerlik ikimərtəbəli uşaq bağçasının da tikintisi coşqu ilə davam etdirilir. İlk baxışdan sadəcə faktlar kimi görünən bu tikintilər əslində xeyli adamın işlə təmin olunması deməkdir.

Təbii ki, Yevlax şəhərində təkcə inzibati binalar deyil, həmçinin yaşayış evləri, parklar, meydanlar da tikilib. Əgər bu şəhərə yolunuz düşsə, onda bir reallığın da şahidi olacaqsınız. Görəcəksiniz ki, Bakı-Ələt-Qazax avtomobil yolunun kənarı boyunca tikilən qala divarları, onların bürcləri, həmçinin o divarların üzlük daşları ilə bəzədilməsi prosesi başa çatmışdı. Həmçinin rayonun aran qəsəbəsindən Mingəçevir şəhərinə gedən avtomobil yolunun kənarında 1350 metrlik dekorativ metal borularla təhlükəsizlik hasarı çəkilmişdi. Həmin yol boyunca təqribən 1 km məsafəyə yeni səkilər salınmış, ağ laylar, metlaxlar döşənmişdi.

O ki, qaldı şəhərin mərkəzində aparılan tikintilərə, qeyd etmək lazımdır ki, Yevlaxın 31-ci məhəlləsində 5 ədəd beşmərtəbəli yaşayış binalarının fasad hissələri yenidən üzlük daşlarla örtülmüş və bütövlükdə binanın görkəmi xeyli dəyişdirilmişdi. yevlaxlıların ən çox sevdikləri Kür boyu istirahət kompleksində də demək olar ki, hər gün yenidənqurma işləri aparılır.

(Ardı var)

Ceyhun RÜSTƏMOV

Ədalət.-2015.-15 may.-S.7.