Kürdəmirdə sürətli inkişafa necə nail olunur?

Layihənin istiqaməti: Regionların sosial-iqtisadi inkişafının təşviq edilməsi

"...Kənd yollarının tikintisi gedir. Həm dövlət büdcəsindən, eyni zamanda, Prezidentin ehtiyat fondundan vəsait ayrılır. İndi işlər gedir. Bir neçə kəndi birləşdirən yollar tikilməkdədir. Gələcəkdə bu layihələrə də əlavə vəsait ayrılacaqdır".

Azərbaycan Respublikasının Prezidenti

İlham Əliyev

Bütün istiqamətlərdə xoş bir dönüş

Son vaxtlar Kürdəmirin hər bir kənd və qəsəbəsində, rayon mərkəzinin küçə və meydanlarında quruculuq və modernləşmənin mükəmməl mənzərəsi canlanır. Kürdəmirlilər böyük hörmət bəslədikləri icra başçısı Ceyhun Cəfərovun abadlıq və quruculuq, yeni müasirləşmə çağırışına elliklə qoşularaq əsl birlik nümunəsi göstərməkdədirlər. Rayon həyatının bütün istiqamətlərində xoş bir dönüş, qaynarlıq, həvəs və coşqu yaşanmaqdadır.

Quruculuq işləri fundamental və

uzunmüddətli məqsədlərə yönəldilir

Bu rayonun sakinləri son illər gerçəkdən daha gülərüz, daha qürurlu görünürlər. İftixar mənbəyi sosial-iqtisadi inkişafın reallıqlarında, insanların rahat və normal yaşayışındadır. Bütün bunlar insanları ciddi şəkildə düşündürür və yeni uğurlara ruhlandırır.

Bu inkişafın, bu gedişatın daxilində, güdəlik ritmində başqa bir nüansı da diqqətə gətirmək gərəkdir. Yəni bütün istiqamətlərdə nailiyyətlər qazanmaq, qazanılanları qoruyaraq daha böyük məsələlərin həllinə köklənmək, daim işgüzarlığın ən sağlam və fəal formasında qala bilmək elə də asan məsələ deyil. Ancaq respublika rəhbərliyinin yüksək etimadını layiqincə doğruldan Kürdəmir Rayon İcra Hakimiyyətinin başçısı Ceyhun Cəfərov və onun komandası çətin və şərəfli vəzifələri uğurla həll etməkdə, həyata keçirməkdədir. Bunlar əsasən nədən ibarətdir? Rayon iqtisadiyyatının real perspektivlərdə inkişaf etdirilməsi, eyni zamanda insanların sosial və mədəni tələblərinin həll edilməsi, quruculuq və abadlıq tədbirlərinin dekorativ görüntülərdən fundamental, uzunmüddətli məqsədlərə yönəldilməsi. Şəhər əhalisi, hətta ən ucqar kəndlərin də sakinləri bir sıra sosial problemlərin son illər ərzində sürətlə həll edilməsini Azərbaycan Respublikası Prezidenti İlham Əliyevin siyasətinin yerli hakimiyyət tərəfindən düzgün və səriştəli həyata keçirləsinin nəticəsi hesab edir.

Ümumrespublika

tərəqqisinin işığında...

Abadlıq və yenidənqurma işləri 2015-ci ilin başlanğıcından daha böyük sürət götürmüşdür. Görülən işlər barədə söhbət düşərkən C.Cəfərov ətraflı məlumat verərək deyir:

- Respublikamızda əldə olunan nailiyyətlər Kürdəmir rayonunun da sosial-iqtisadi inkişafına öz müsbət təsirini göstərmiş, Dövlət Proqramına əsasən rayonumuzda nəzərdə tutulmuş tədbirlər həyata keçirilmişdir. 2015-ci ilin I rübündə 151 nəfər işlə təmin olunmuşdur ki, bundan 131 nəfəri daimi (o cümlədən 7-si yeni yaradılmış, 5-i mövcud müəssisə və təşkilatda, 124 nəfər fiziki), 20 nəfəri isə müvəqqəti və mövsümü işlə təmin olunanlardır. 2015-ci ilin üç ayında ötən ilin müvafiq dövrü ilə müqayisədə ümumi məhsul buraxılışı 8,9 faiz artaraq, 77583,4 milyon manat olmuşdur. Ümumi məhsul buraxılışının 67,8 faizi məhsul istehsalı, 32,2 faizi isə xidmət sahələrində olmuşdur. Regionların sosial-iqtisadi inkişafı Dövlət Proqramına uyğun olaraq rayonumuzda aqrar sektorun inkişafı diqqət mərkəzində saxlanılmışdir. Rayonda taxıl istehsalının artırılması üçün tədbirlər davam etdirilmişdir. Bu ilin məhsulu üçün ötən ilin payızında 13408 hektarda buğda, 24365 hektarda arpa olmaqla cəmi 37773 hektar sahədə taxıl əkilmişdir. Taxıl əkinləri suvarılmış, 11600 hektardan çox sahədə ziyanvericilərə qarşı kimyəvi mübarizə aparılmış, 31200 hektardan çox sahəyə üzvü və mineral gübrələr verilmişdir. Toxumluq taxıl sahələrinə fərdi qaydada qulluq göstərilməsi təşkil olunmuşdur. Hazırda taxıl biçininə hazırlıq işləri görülür. Bu məqsədlə biçinə 76 kombayn hazırlanır və onların təmiri işləri aparılır. Rayonda taxıl biçinini vaxtında başa çatdırmaq məqsədi ilə kənardan əlavə 100-dən çox ədəd kombayn cəlb edilməsi üçün müqavilələr bağlanılır. Rayonda 8 toxumçuluq təsərrüfatı fəaliyyət göstərir. 2015-ci ilin I rübündə 4200 tonadək yüksək reproduksiyalı toxum istehsal olunmuşdur. Kürdəmirdə 3000 hektardan çox plantasiya şəklində nar bağı salınmış, bu bağlardan 500 hektardan çoxunun müasir texnoloqiya ilə becərilməsi, damcılarla suvarılması təşkil olunmuşdur. Tərəvəzin örtülü qruntlarda yetişdirilməsi genişləndirilmiş, 6 hektarda müasir istixana qurulmuş, əlavə 7 hektarda xırda istixanalarda tərəvəz yetişdirilir. Üzümçülük və digər bitkiçilik məhsullarının istehsalı və emalının genişləndirilməsi sahəsində ardıcıl işlər aparılır. "Aqrolizinq" ASC-nin rayonda aqrotexservis mərkəzi fəaliyyəti göstərir. Aqrotexservis Mərkəzində və onun mexaniki dəstələrində 45 traktor, 37 kombayn, ot biçən, taxıl səpən, ümumilikdə 130-dan çox traktor, digər kənd təsərrüfatı maşınları və avadanlıqlarından istifadə olunur. Təkcə bu il 20 müasir kombayn alınmışdır. Kənd təsərrüfatına xidmət edən suvarma sistemləri idarələrinin də maddi texniki bazası möhkəmləndirilmiş onlar müasir, yüksək manevr qabiliyyətli yerqazan texnikalarla təchiz olumnuşdur. Aqrotexservis Mərkəzi tərəfindən istehsalçılara 500 tonadək güzəştli qiymətlərlə mineral gübrələr satılmışdır. Bundan əlavə 5 özəl aqrotexservis mərkəzi yaradılmışdır və burada da 120-dən çox traktor, kombayn və digər kənd təsərrüfatı texnikalarından istifadə olunur. Fiziki və hüquqi şəxslər tərəfindən 120-dən çox traktor və digər kənd təsərrüfatı texnikası lizinqə götürülmüşdür. Bunun nəticəsidir ki, rayonda kənd təsərrüfatı işlərinin optimal müddətlərdə görülməsi mümkün olur. Rayonda heyvandarlığın və quşçuluğun inkişaf etdirilməsi sahəsində məqsədyönlü işlər görülür, hazırda iri buynuzlu mal qaranın sayı 63,5 min başı, qoyun keçilərin sayı 132,1 min başı ötmüş, heyvandarlıq məhsulları istehsalının dinamik artımına nail olunmuş, bu ilin I rübündə 20049 ton ət istehsal edilmişdir. Ötən ilin müvafiq dövrü ilə müqayisədə rayon üzrə ət itehsalı 0,9 faiz, süd istehsalı 0,9 faiz və yumurta istehsalı isə 0,8 faiz artmışdır. Rayondakı "Kürdəmir Broyler" ATSC-nın fəaliyyəti genişləndirilmiş, damazlıq ana quşların sayı 16 min başa çatdırılmış, quş əti və yumurta istehsalı artırılmışdır. 300 min yumurta istehsal olunmuşdur...

Hər gün diqqət mərkəzində olan

məsələlər

Öyrənirik ki, əhalinin elektrik enerjisi, təbii qaz və içməli su ilə təminatının yaxşılaşdırılması rayon İcra Hakimiyyətinin daim diqqət mərkəzində olmuşdur. Rayon mərkəzində və kəndlərdə qəzalı vəziyyətdə olan elektrik dirəklərinin, köhnəlmiş naqillərin, texniki cəhətdən nasaz olan sayğacların dəyişdirilməsinə, sıradan çıxmış transformatorların yeniləri ilə əvəz olunmasına diqqət artırılmışdır. Dövlət Proqramına uyğun olaraq "Azəriqaz" İstehsalat birliyinin Kürdəmir rayon Xidmət Sahəsi tərəfindən 2015-ci ilin I rübündə müxtəlif diametirli 350 p/m boru əsaslı təmir edirlərək yenilənmişdir. İstehlakçıların qaz təchizatının daha da yaxşılaşdırirması məqsədi ilə rayonun Xırdapay, Şahsevən, Ucarlı kəndlərində, şəhərin X.İslamzadə küçəsində cəmi 4 ədəd olmaqla yeni müasir tipli qaz tənzimləyici quraşdırırlaraq istismara qəbul edirmişdir. Rayonun 190 fərdi abonenti əhatə edən Garis-Əyribənd və 130 abonentin məskunlaşdığı Ərşəli kəndində tikinti quraşdırma işləri artıq başa çatdırırmışdır. Yaxın günlərdə görülən işlərin sənədləşdirirməsi başa çatdırıldıqdan sonra kəndlərə qazın açılışı təmin ediləcəkdir. Bundan başqa rayonun Karrar, Ərəbqubalı, Məhərrəmlı, Çöl-Ərəb, Ərəbxana və Çərtəyəz kəndlərində tikinti işləri sürətlə davam etdirilir.

(ardı gələn sayımızda)

Məzahir ƏHMƏDOĞLU

Ədalət.-2015.-22 may.-S.7.