BU GÜNÜMÜZÜN SAMUXU

Layihənin istiqaməti: Regionların sosial-iqtisadi inkişafının təşviq edilməsi

"... Ərzaq təhlükəsizliyi ilə bağlı institusional islahatlar aparılır, aqroparklar salınır, subsidiyaların verilməsi prosesi təkmilləşdirilir. Məhsuldarlığın artırılması prosesi də çox önəmlidir. Bizim ixrac potensialımızın artırılması da gündəlikdə duran məsələlərdən biridir. Çünki əminəm ki, biz yaxın gələcəkdə özümüzü bütün ərzaq məhsullarımızla təmin edəcəyik".

Azərbaycan Respublikasının Prezidenti

İlham Əliyev

Azərbaycanın bölgələrindən biri olan Samux özünün bir ərazi vahidi kimi tarixinin müxtəlif mərhələlərində əldə etdiyi uğurlarla həmişə insanların yadında qalıb. Yəni sovet dönəmində biz bu bölgəni məşhur inqilabçılarımızdan biri olan Xanlar Səfərəliyevin adını daşıyan bir rayon kimi tanıyırdıq. Müstəqillik illərimizdə isə Samux öz ilkin adını özünə qaytara bildi.

Və əslində bu da bir tarixi ədalətsizliyin aradan qaldırılması idi. Baxmayaraq ki, bugünün özündə də sovet dönəmində yaşamış insanların yaddaşında bu rayon həmin o inqilabçının adı ilə qalmaqdadı. Amma ən gerçəyi və ən dürüstü odur ki, rayonun hansı adla tanınmasından asılı olmayaraq, bu region özünün yerləşdiyi ərazi baxımından həmişə maraq doğurub. Çünki ən qədim və tariximizdə böyük yeri olan Gəncənin beş addımlığında yerləşən Samux həm Kəpəzdən, həm də Murovdan əsib gələn küləklərin, könül oxşayan havanın və ümumiyyətlə isə təbii gözəlliklərin elə təbiətin öz hökmü ilə də cilalandığı bir ərazidi. Bu ərazidə yaşayan insanlar da bölgənin bütün özəlliklərini qoruyub saxlamaq, onu daha da inkişaf etdirmək üçün əməyə qatlaşır, üstəlik də bütün münasibətlər həm də yaradıcı xarakter daşıyır. Ona görə də Samux rayonunda günbəgün sürətlənən inkişaf, diqqət çəkən quruculuq, abadlıq işləri həm effektliliyinə, həm də əhatə dairəsinə görə insanların könlünü xoş edir. Bugünlərdə səfər edib şahidi olduğumuz inkişafa bir qonaq diqqəti ilə nəzər salanda aydın oldu ki, Samux rayonu həm bir rayon mərkəzi kimi, həm də kəndləri ilə birlikdə bu gün Azərbaycanın inkişaf etməkdə olan rayonları ilə bir sırada dayanır. Təbii ki, bu işdə də regionların inkişafına dair Dövlət Proqramının tələb və icra mexanizmi əsas yer tutur. Yəni Azərbaycan prezidenti cənab İlham Əliyevin imzaladığı müvafiq sərəncamla həyata keçirilən regionların inkişafına dair dövlət proqramı Samuxda da bir vacib, həm də üzərində nəzarət olan fəaliyyət prinsipləri kimi gündəmdə qalır.

Bax, bu mənada həm ötən illərin, həm də bu ilin birinci rübünün yekunlarına diqqət yetirəndə onda məlum olur ki, Samuxda da həyat hər gün dəyişir, hər gün yeniləşir və inkişafın sürəti, bu sürətli inkişafın ortaya qoyduğu nəticələr günbəgün artıb şaxələnir.

Samux rayon icra hakimiyyətinin başçısı vurğulamışdı ki, bu ilin birinci rübünün yekunlarına görə, rayonumuz ötən ilin müvafiq dövründəkindən müqayisəli şəkildə söyləsək xeyli artımlara imza atmışdı. Yəni ayrı-ayrı sahələr üzrə götürsək, onda görərik ki, həm ümumi daxili məhsul, həm müxtəlif xidmət sahələri üzrə, həm də istehsal sahələrində diqqət çəkən artımlar var. Əgər bu artımları konkret rəqəmlərlə ifadə etsək, onda məlum olar ki, cari ilin birinci rübündə rayonun sosial-iqtisadi inkişafı ayrı-ayrı sahələr üzrə çox ürəkaçandı. Yəni təkcə ümumi məhsulun buraxılış həcmi 16,2 milyon manat təşkil etmişdi ki, bu da müqayisə ilə desək, onda 2014-cü ilin müvafiq dövründəkindən 1,4 faiz çoxdr.

Azərbaycanın əksər bölgələri kimi, Samux da kənd təsərrüfatı rayonudu. Burada da əkinçilik, bağçılıq, heyvandarlıq, bostan-tərəvəz və sairə paralel surətdə inkişaf etdirilir və həm inkişafın sürəti və həm bu sahələrin özünün ayrı-ayrılıqda genişlənməsi diqqət mərkəzində saxlanılıb. Xatırlatmaq yerinə düşər ki, Samuxda bu ilin birinci rübündə kənd təsərrüfatı məhsullarının istehsal həcmi 6,7 milyon manat olmuşdu. Bu adi bir rəqəm deyil. Konkret göstəricidi və həm də bu, ötən ilin müvafiq dövründəkindən 3,8 faiz artıq kənd təsərrüfatı məhsulu deməkdi.

Bu gün Samux rayonunun dövlətin birbaşa dəstəyi, xüsusilə Sahibkarlığa Kömək Milli Fondunun qayğısı nəticəsində müəyyən güzəştli kreditlərlə təmin olunmuşdu.

Rayon icra hakimiyyəti başçısının hesabatından göründüyü kimi, bu ilin birinci rübündə həmin Sahibkarlığa Kömək Milli Fondu tərəfindən rayonda fəaliyyət göstərən sahibkarların fonda təqdim etdikləri 40 layihəyə görə üst-üstə 524,8 min manat məbləğində güzəştli kredit ayrılmışdı. Bu kredit isə öz növbəsində rayonda daha 89 nəfərin işlə təmin olunmasına şərait yaratmışdı. Göründüyü kimi, 89 nəfərin işlə təmin olunması əslində həm də elə bu qədər ailənin maddi durumunun yaxşılaşdırılması deməkdir. Ümumiyyətlə isə 2015-ci ilin birinci rübündə Samux rayonunda digər bölgələrimizdə olduğu kimi, insanların işlə təmin olunmasına xüsusi diqqət və qayğı göstərilir. Həmin diqqət və qayğının bariz nümunəsi kimi konkret rəqəmləri də diqqət çatdırmaq olar. Yəni rayon icra hakimiyyəti başçısının hesabatından məlum olur ki, Samuxda ilin birinci rübündə faktiki olaraq 256 yeni iş yeri açılmışdı. Onların isə 241-i daimi iş yeridi. Zənnimizcə, birinci rübdə bu qədər iş yerinin açılmasını təşkil etmək, ona şərait yaratmaq rayon rəhbərliyinin və yerli iş adamlarının, sahibkarların bacarığından, peşəkarlığından xəbər verir. Hər halda bir rayonda bu qədər iş yerinin açılması konkret və ürəkaçan faktdı.

Bəli, Samux rayonu özünün iqtisadi potensialı ilə bir çox iri rayonlarımızdan arxa cərgədə dayansa da, amma burada sürətlə aparılan abadlıq, yenidənqurma işləri göstərir ki, rayon sakinləri əməyi sevdikləri kimi, onun real bəhrəsini də ortaya qoymağı bacarırlar. Yəni onlar səmərəli, planlı şəkildə qurduqları təsərrüfatlarından uğurlu nəticələr əldə etməkdə həmişə israrlıdılar. Necə deyərlər, görülən işlərin nəticəsi də bu israrın, bu inadkarlığın bariz nümunəsidi.

Həqiqətən də bu gün Samux rayonunda aparılan genişmiqyaslı tikinti-abadlıq, yenidənqurma işləri, park və meydanların salınması, küçə və yolların, səkilərin adablaşdırılması, yenilənməsi özü-özlüyündə həm insanların faydalı əməklə məşğul olmasına, həm də ailə büdcələrinin artmasına müsbət təsir edən amillərdən biridir.

(Ardı var)

Ceyhun RÜSTƏMOV

Ədalət.-2015.-26 may.-S.7.