ZAQATALA: QIZIL GÜLLƏR DİYARININ "QIZIL" PAYIZI

REGİON

"Bizim böyük resurslarımız var, bizim böyük iqtisadi gücümüz var və biz çalışmalıyıq ki, qeyri-neft sektorunu daha sürətlə inkişaf etdirib daha böyük imkanlar əldə edək və bundan da gözəl yaşayaq".

Azərbaycan Respublikasının Prezidenti

İlham Əliyev

Sevinc və qürur fenomeni

...Burada, gözəl Zaqatalada mərkəzə doğru aparan baş yol "Şimşək" deyilən ərazidən başlayır və 2 kilometrə yaxın məsafənin səliqəsini, orijinallığını və dadını büsbütün sənə yaşadır, bir panno kimi yaddaşını əlvan rənglərə çəkir, düşüncələrini təzələyir, təzələyir... Şirin arzulara qovuşursan burada. İllah da payızın belə qızılı, məxməri günləri ola...

Qarşı dağlar, meşələr, çaylar, bağ-bağatlar öz füsunkarlığında, bayramsayağı görünüşlü şəhər də öz ritmində, öz cazibəsində. Bütün bunları görmək, yaşamaq, bilsəniz necə xoşdur?.. Təbiət gözəlliyi ilə urbanik şəhər düzəni bir-birinə qovuşub da bax bu cür zövq yaşadır, zövq paylaşır eləcə...

Son illər çox işlər görülüb Zaqatala rayonunda. Şəhərin küçə və meydanları, park və bağları, yeni tikililəri əvvəlkilərdən də gözəl və cazibədardır. Burada keçdiyin hər küçə, rastlaşdığın hər məkan səni özünə çəkir, sənə sevinc və qürur bəxş edir.

Hər gün şəhərin müxtəlif istiqamətlərinə, ya da bir neçə kəndə baş çəkən Zaqatala Rayon İcra Hakimiyyətinin başçısı Mübariz Əhmədzadənin nə vaxt istirahət etdiyini də bilən yoxdur. Bütün günü axşamdan keçənə kimi iş başındadır. Ya görüşdə, qəbulda, kabinetdə, ya da şəhərdə, kəndlərdə, camaat içində. Yəqin elə bu səbəbdəndir ki, başçının hər bir sözünə, çağırışına sakinlər həmişə inamla, sevinclə qoşulurlar. Hamı bilir ki, Mübariz Əhmədzadənin və başçılıq etdiyi komandanın gördüyü bütün işlər onların, bütövlükdə rayonun xoş güzəranı, inkişafı üçündür. Və bütün bunların həyata keçməsinə müstəsna qayğı və diqqət göstərən sevimli prezidentləri İlham Əliyevə hər fürsətdə dərin minnətdarlıqlarını da bildirirlər qədirbilən zaqatalalılar.

Bu günlər rayondakı əhval-ruhiyyə də xüsusi bir məqama köklənib. Böyükdən kiçiyə - hamı ali qonağın gəlişini gözləyir, böyük sevinc və qürur hissi ilə bu görüşə hazırlaşır.

Bütün istiqamətlərdə

davamlı yüksəliş

Bu ərəfədə keçirilən ümumrayon yığıncağında da yaşanan anlar həmin əhval-ruhiyyəni əks etdirirdi. Yığıncaqda geniş məruzə ilə çıxış edən Zaqatala Rayon İcra Hakimiyyətinin başçısı Mübariz Əhmədzadə demişdir:

- Bildiyiniz kimi bu il oktyabr ayının 12-də Prezident İlham Əliyevin sədrliyi ilə Nazirlər Kabinetinin 2015-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası keşirilmişdir. Prezident İlham Əliyev bu il dünyada davam edən böhrana, neftin qiymətinin kəskin düşməsinə, ölkəmizə qarşı əsassız təzyiqlərə və bəzi hallarda təxribatlara baxmayaraq, ötən 9 ayda Azərbaycan iqtisadiyyatının inkişaf etdiyini, iqtisadiyyatın 3,7 faiz, sənaye istehsalının 2,1 faiz, qeyri-neft sənayesinin 10 faiz, kənd təsərrüfatı məhsulları istehsalının 6,7 faiz artdığını, inflyasiyanın isə 3,7 faiz təşkil etdiyini, əhalinin pul gəlirlərinin 5,8 faiz artdığını, ölkə iqtisadiyyatına bütün mənbələrdən 16 milyard dollar sərmayə qoyulduğunu bildirmişdir. Dövlətimizin başçısı sosial sahədə icra olunan layihələrdən danışarkən ötən dövrdə ölkədə 34 məktəb, 26 uşaq bağçası, 11 tibb müəssisəsi tikilib və ya əsaslı şəkildə yenidən qurulduğunu qeyd etdi. Əhalinin sosial vəziyyətinin yaxşılaşdırılması ilə bağlı xeyli iş görüldüyünü deyən Prezident İlham Əliyev xüsusilə ünvanlı sosial yardımın verilməsində şəffaflığın təmin edildiyini vurğulayaraq bildirdi ki, indi 500 min insan, yəni 114 min ailə ünvanlı sosial yardım alır...

...Prezident İlham Əliyev kənd təsərrüfatının və sənayenin inkişafı, meliorativ tədbirlərin görülməsi, yeni əkin sahələrinin yaradılması, bundan əlavə, dərman bazarında vəziyyətə nəzarətin daha da gücləndirilməsinin vacibliyini diqqətə çatdırdı.

Birinci Avropa Oyunlarının ölkəmizə marağı daha da artırdığını, turizm sektorunun inkişafına təkan verdiyini deyən dövlətimizin başçısı gələn illərdə keçiriləcək idman tədbirlərinin də bu baxımdan əhəmiyyətli olacağını bildirdi.

İnkişafın mühüm amilləri

Hesabat ilində Rayon İcra Hakimiyyəti Azərbaycan Respublikası Prezidentinin fərman və sərəncamlarını rəhbər tutaraq gündəlik fəaliyyətində Prezident Administrasiyasının yaxından köməyi, tapşırıq və tövsiyələri əsasında qarşımıza qoyulan vəzifələrin icrasına çalışmışdır.

Respublikada aparılan uğurlu iqtisadi siyasətin nəticəsi olaraq 2015-ci ilin doqquz ayında Zaqatalada iqtisadiyyatın dinamik inkişafına nail olunmuş, "Azərbaycan Respublikası regionlarının 2014-2018-cü illərdə sosial-iqtisadi inkişafı Dövlət Proqramının icrası istiqamətində işlər davam etdirilmiş, 173 milyon manat dəyərində ümumi məhsul istehsal edilmiş, bu da keçən ilin müvafiq dövrü ilə müqayisədə 5,4 faiz çoxdur. Məhsul istehsalı sənayedə 27,2 faiz, kənd təsərrüfatında 12,7 faiz, rabitədə 14,8 faiz, ticarətdə 5,4 faiz, pərakəndə əmtəə dövriyyəsi 10,1 faiz, pullu xidmətlərin həcmi 4 faiz artmış, əsas kapitala 12,9 milyon manat investisiya yönəldilmiş, 759-u daimi olmaqla 795 yeni iş yeri açılmışdır.

2015-ci ilin doqquz ayında büdcəyə vergi və tədiyyələr üzrə 5,6 milyon manat vəsait daxil olmuş, proqnoz tapşırıqlar 108,4 faiz icra edilmişdir. Gəlirlərin 7,3 faizi dövlət sektorunun, 92,7 faizi qeyri-dövlət sektorunun payına düşmüş, vergi qanunvericiliyini pozan 988 vergi ödəyicisinə 907,4 min manat həcmində maliyyə sanksiyası tətbiq edilmişdir.

Hesabat ilində mərkəzləşdirilmiş xərclərdən 12 milyon 852 min manat subsidiya alınmış, büdcə xərcləri 17 milyon 47 min manat və ya 90,3 faiz icra olunmuşdur.

(ardı gələn sayımızda)

Məzahir ƏHMƏDOĞLU

AzƏrbaycan Respublikasının Prezidenti yanında kütlƏvi informasiya vasitƏlƏrinin inkişafına dövlƏt dƏstƏyi fondunun maliyyƏ yardımı ilƏ

ədalət.-2015.-3 noyabr.-S.7.