Biz bəxti seçmirik, bəxt bizi seçir

Vaqif İSAQOĞLU,

Prezident təqaüdçüsü

ÇIXIB HAQQ YOLUNA

Bu yurdun hər çöpü bir ləl daşıdı,

Yurdun sərvətini kimlər daşıdı?

Axı bu vətənin vətəndaşıdı,

Deyin necə dözsün talana Vaqif?

Qaranlıq zindana salsalar da bil,

Görən gözlərini oysalar da bil,

Onu diri-diri soysalar da bil,

Yenə də əl çalmaz yalana Vaqif.

Çıxıb haqq yoluna Quran əlində,

Dünyanın dərd yükü onun belində.

Doğma vətənində, doğma elində,

Nə qədər qərib tək dolana Vaqif?

Harda hallallıq var, çörək olacaq,

Haqq üçün döyünən ürək olacaq.

Bu xalqa nə vaxtsa gərək olacaq,

Qoyma dərd oduna qalana Vaqif.

ÜZ TUTUB GEDİRƏM

İllər gəncliyimi əlimdən alıb,

Ümidim çiçək tək solub, saralıb.

Mənim son nəğməmə daha az qalıb,

Üz tutub gedirəm qəbrimə sarı.

Daha kökdən düşüb qəlbimin simi,

Qayğılar söndürüb həyat eşqimi.

Ölüm şərbətini içib bal kimi,

Üz tutub gedirəm qəbrimə sarı.

Ölüm hər dərdimi yuyub aparar,

Məni kim axtarar, məni kim arar?

"Ol" deyən Tanrının "öl" deməyi var,

Üz tutub gedirəm qəbrimə sarı.

Biz bəxti seçmirik, bəxt bizi seçir,

İllər ömrümüzü ot kimi biçir.

Allaha qovuşmaq ölümdən keçir,

Üz tutub gedirəm qəbrimə sarı.

ÇƏKMƏSƏ ƏGƏR

Bağlardan barını gör kimlər dərdi?

Namərd elədilər qovaraq mərdi.

Hamı bu dünyada gəldi-gedərdi,

Heç kim bu dünyada qalmaz, - deyirəm.

Yalan ayaq tutub yeriyən yerdə,

Haqsızlar haqlını sürüyən yerdə,

Qanmazlar qanana dərs deyən yerdə,

Şər Xeyrə qələbə çalmaz, - deyirəm.

Dərd səni yumaq tək bükməsə əgər,

Kədər can evinə çökməsə əgər,

Ürək hər əzabı çəkməsə əgər,

Gözlərin yaş ilə dolmaz, - deyirəm.

Oğrular doğrunu hədələr, Vaqif,

Ürəyi ox kimi dərd dələr, Vaqif.

Vəzifə alsa da gədələr, Vaqif,

Onlarda kişilik olmaz, - deyirəm.

BİR ÖLÜM HAQDI

Göydən yer üzünə daşlar yağsa da,

Qanımız tökülüb su tək axsa da,

Ahımız, naləmiz göyə çıxsa da,

Ədalət qələbə çalası deyil.

Yalana əl çalıb, şəri öyməsən,

Namərdi ucaldıb, mərdi döyməsən,

Yaltaqlıq eləyib sən baş əyməsən,

Dərdinə bir çarə olası deyil.

Heç vaxt tərifləyib öymə özünü,

Şahın da önündə əymə özünü.

Hər yoldan ötənə demə sözünü,

Yoluna bir işıq salası deyil.

Hələ də baş əyir qanan qanmaza,

Haqqa üz tutanlar batıbdı yasa.

Canın göynəməsə, qəlbin yanmasa,

Gözlərin yaş ilə dolası deyil.

Həyat başdan-başa özü sınaqdı,

Hər şey əfsanədi, bir ölüm haqdı.

Ay Vaqif, dünyada hamı qonaqdı,

Heç kim bu dünyada qalası deyil.

FİKİR İÇİNDƏ

Ürək fikir içində,

Bir an sevinc tapammır.

Gecə-gündüz çırpınır,

Özünü dinc tapammır.

İnsan fikir içində,

Getməyə pir tapammır.

Əli yerdən üzülüb,

Özünə yer tapammır.

Xəstə fikir içində,

Həkimə pul tapammır.

Ümid yolu bağlanıb,

Çıxmağa yol tapammır.

Qoca fikir içində,

Dərdə dərman tapammır.

Yaşadığı ömürdə,

Xoş gün, xoş an tapammır.

Kişi fikir içində,

Axtarır, iş tapammır.

Beli dərrdən bükülüb,

Yeməyə diş tapammır.

Vaqif fikir içində,

Deməyə söz tapammır.

Tüpürləsi üz nə çox,

Öpməyə üz tapammır.

"KİŞİLƏR"

Yalana da əl çalır,

İlana da əl çalır.

El gözündə alçalır,

Yala hürən "kişilər".

Ara vurmaq işidi,

Yaltaqlıq vərdişidi.

Kim deyir ki, kişidi?

Yala hürən "kişilər".

Pul görəndə yuxalır,

Rüşvəti də çox alır.

Günü-gündən çoxalır,

Yala hürən "kişilər".

Millətin üz qarası,

Sağalmayan yarası.

Olub bostan urası,

Yala hürən "kişilər".

Nə qandırar, nə qanar,

Nə dərd bilər, dərd anar.

Evini vətən sanar,

Yala hürən "kişilər".

GƏLMİŞƏM

Sənsiz bu dünyada qəribəm, qərib,

Qəlbimdən sevinci görən kim dərib?

Həsrətin canımı buza döndərib,

İsinməyə ocağına gəlmişəm.

Ürəyim dərd ilə broşalıb dolar,

Qorxuram murazım gözümdə qalar.

Bircə yol üzümə gülümsə nolar,

Xoş gününə, xroş çağına gəlmişəm.

Gətirdin ömrümə dumanı, çəni,

Gəl yada salmayaq olub keçəni.

İstər qəbul eylə, istər qov məni,

Son ümidlə ayağına gəlmişəm.

Ruhum haray çəkir bu can qəfəsdə,

Daha yaşamağa yoxdu həvəs də.

Bu yazıq Vaqifi salmısan xəstə,

Ölmək üçün qucağına gəlmişəm.

A DAĞLAR QIZI