ƏNƏNƏLƏRİ YAŞADAN VƏ MODERNLƏŞƏN ŞƏKİ

REGİON

(əvvəli ötən sayımızda)

"Kənd təsərrüfatı ili"nin uğurları

2015-ci il " Kənd təsərrüfatı " ili elan edilmişdir və ölkəmizdə bu sahədə düşünülmüş siyasət aparılır. Nazirlər Kabinetinin 2015-cü ilin 9 ayının yekunlarına və qarşıda duran məsələlərə həsr olunan yığıncağında çıxış edən cənab Prezident qeyd etmişdir ki, kənd təsərrüfatı hər bir ölkənin uğurlu iqtisadi inkişafını təmin edən əsas sahədir. Cənab Prezident demişdir : "Bu il "Kənd təsərrüfatı" ili elan olunub. Şadam ki , bu ildə kənd təsərrüfatımız 6,7 faiz artmışdır. Ölkədə aparılan islahatlar , eyni zamanda dövlət tərəfindən fermerlərə verilən dəstək , subsidiyalar , texnika təminatı bu vəziyyəti yaradır" .

Ötən illərdə olduğu kimi, bu ilin 9 ayında da məhsul istehsalının artırılması, kənd təsərrüfatında özəl bölmənin daha da genişləndirilməsi diqqət mərkəzində saxlanmış, taxılçılığın, heyvandarlığın, meyvəçiliyin, üzümçülüyün inkişafı üçün bir sıra tədbirlər həyata keçirilmişdir. Respublikamızın ən iri taxılçılıq rayonlarından biri olan Şəkinin fermer təsərrüfatlarında 2015-ci ilin məhsulu üçün 61968 hektar sahədə payızlıq taxıl əkini həyata keçirilmişdir. Yetişən məhsulu tez və itkisiz yığmaq üçün bütün zəruri tədbirlər həyata keçirilmiş, taxıl biçininin tez və itkisiz başa çatdırılması üçün konkret tapşırıqlar verilmişdir. Həyata keçirilən bu və ya digər tədbirlər nəticəsində rayonda taxıl biçini uğurla başa çatdırılmış və yüksək məhsuldarlıq əldə edilmişdir. Son statistik məlumatlara əsasən 186 min ton taxıl istehsal olunmuş ,hər hektardan orta məhsuldarlıq 30 sentner təşkil etmişdir. İstehsal olunan məhsul ötən illə müqayisədə 110 min ton çoxdur. Bu cənab Prezidentimizin ölkədə ərzaq bolluğu yaradılması istiqamətində həyata keçirdiyi mühüm tədbirlərin uğurlu nəticəsidir.

2016-cı ildə taxılçılıqda yüksək məhsuldarlıq əldə etmək üçün payızlıq taxıl səpini kampaniyasının yüksək aqrotexniki qaydalara uyğun aparılması mühüm əhəmiyyət kəsb edir. Rayonda payızlıq taxıl səpini üçün sahələrin çoxunda şum aparılmış və 1000 hektar sahədə arpa əkini həyata keçirilmişdir.

Cənab Prezidentin kənd təsərrrüfatının inkişaf etdirilməsi istiqamətində qarşıya qoyduğu əsas vəzifələrdən biri də iri fermer təsərrüfatlarının yaradılması və ixrac məsələsidir. Məhz cənab Prezidentin tapşırıq və tövsiyəsinə uyğun olaraq rayonun Orta Zəyzid bələdiyyəsinə məxsus ərazidə sahibkarlar tərəfindən icarəyə götürülmüş 78 hektar ərazidə müasir texnologiyalar əsasında yeni aqropark yaradılmışdır. Burada yüksək keyfiyyətli meyvə bağı salınmış, eyni zamanda məhsulun saxlanması, qablaşdırılması və emal olunması üçün işlər görülür. Əldə olunan məhsulun daxili bazarda satışı ilə yanaşı, həm də xaricə ixrac olunması nəzərdə tutulur.Ən müasir tələblərə cavab verən və meyvə məhsulları istehsalı və emalı üzrə ixtisaslaşacaq Aqroparkda 100- dən cox iş yerinin açılması nəzərdə tutulur.

...Dinamik inkişafın təmin edilməsi

Rayonun kənd təsərrüfatının əsas sahələrindən biri də heyvandarlıqdır. Bu sahənin də dinamik inkişafının təmin edilməsi, heyvandarlıq məhsulları istehsalının həcminin artırılması daim diqqət mərkəzində saxlanılır.

Qeyd etmək lazımdır ki, istər bitkiçilik, istərsə də heyvandarlıq məhsulları istehsalının artırılması ilə yanaşı, emal olunmasının təşkili, yeni emal müəssisələrinin yaradılması, istehsal olunan məhsulların satışına köməklik göstərilməsi, aqroservis xidmətlərinin genişləndirilməsi və s. qarşıda duran həlli vacib məsələlərdəndir.

Müasirləşmə istiqamətində yeniliklər davam edir

2015-cü ilin 9 ayında Şəkidə yenidənqurma, tikinti - quraşdırma işləri davam etdirilmiş, ilin əvvəlində şəhərdə aparılacaq abadlıq, quruculuq işlərinin planı təsdiqlənmişdir. Müddət ərzində şəhərin 13 küçəsində yolların əsaslı təmiri və 10 ictimai yaşayış binasında mənzil fondunun təmiri planlaşdırılmışdır. Baş Göynük kəndində 640, Göybulaq kəndində 180 şagird yerlik məktəb binaları istifadəyə verilmiş, Qoxmuq kəndində 840, Qaratorpaq kəndində 132 şagird yerlik məktəb binalarının tikintisi başa çatmışdır. Azərbaycan Respublikası Təhsil Nazirliyinin sifarişi ilə qarışıq tipli uşaq internat məktəbində əsaslı təmir işləri aparılır.

Azərbaycan Respublikası Əmək və Əhalinin Sosial Müdafiəsi Nazirliyi tərəfindən Şəki şəhərində şəhid ailələri və Qarabağ müharibəsi əlilləri üçün yeni 5 fərdi yaşayış evinin tikintisi davam etdirilir. Azərbaycan Respublikası Prezidentinin İşlər İdarəsinin sifarişi ilə Kiş kəndi ərazisində "Marxal" istirahət Kompleksinin tikintisi davam etdirilir. Kompleksə 7 mərtəbəli mehmanxana, SPA mərkəzi, restoran və kotteclər daxildir. Tikintinin ümumi sahəsi 27min 839 kv metrdir. Hazırda kompleksin binalarında daxili tamamlama və 50 hektara yaxın ərazidə abadlıq işləri davam etdirilir. Dünya Bankının dəstəyi və Ədliyyə Nazirliyinin sifarişi ilə tikintisi həyata keçirilən " Məhkəmə Kompleksi" nin tikintisi başa çatmışdır. Yaxın günlərdə kompleksin istifadəyə verilməsi planlaşdırılır.

(ardı gələn sayımızda)

Məzahir ƏHMƏDOĞLU

ədalət.-2015.-8 noyabr.-S.4.