ƏNƏNƏLƏRİ YAŞADAN VƏ MODERNLƏŞƏN ŞƏKİ

REGİON

"...Biz indi, əlbəttə ki, keçid dövrünü başa vurmuşuq. Azərbaycan bu gün tamamilə müasir əsaslar üzərində inkişaf edir - istər siyasi sahədə, istər iqtisadi sahədə, istərsə də sosial məsələlərin həllində. Ancaq biz bu sahədə, xüsusilə sosial məsələlərin həllində inkişaf etmiş ölkələrin təcrübəsinə, əlbəttə ki, baxmalıyıq. Bu təcrübədə həm müsbət, həm mənfi məqamlar vardır. Əlbəttə ki, biz müsbət məqamları seçməliyik və öz sosial siyasətimizi inkişaf etmiş ölkələrin meyarlarına yaxınlaşdırmalıyıq, ona uyğunlaşdırmalıyıq".

Azərbaycan Respublikasının Prezidenti

İlham Əliyev

(əvvəli ötən saylarımızda)

Azərbaycan Respublikasının Prezidenti cənab İlham Əliyevin rəhbərliyi ilə ölkəmizdə məktəbəqədər təhsil müəssisələrinin inkişafına böyük qayğı göstərilir, yeni uşaq bağçaları tikilir, uşaqların hərtərəfli inkişafına xüsusi diqqət yetirilir. Məhz bu amili nəzərə alaraq rayonda əhalinin daha sıx məskunlaşdığı ərazilərdə hər biri 100 yerlik 2 uşaq bağçası inşa edilmişdir. Qeyd etmək lazımdır ki, son 3 ildə Şəkidə 10 uşaq bağçası əsaslı təmir edilmiş və ya yenidən tikilmişdir. Hal-hazırda 2 yeni bağça binasının tikintisi ilə yanaşı şəhər 19 saylı uşaq bağçası əsaslı təmir edilir, 11 saylı bağçanın təmiri ilə bağlı müvafiq işlər aparılır.

Xidmət sahələri

diqqət mərkəzində

Müddət ərzində şəhər və kəndlərdə istismar müddətini başa vurmuş elektrik verilişi xətlərinin çəkilməsi, transformatorların təzələnməsi və təmiri ilə bağlı xeyli iş görülmüşdür. Belə ki, Şəki şəhərində və kəndlərdə artıq yüklənməyə məruz qalan yarımstansiyaların yenisi ilə əvəz edilməsi istiqamətində 23 ədəd transformator quraşdırılmışdır.

2015-ci iln 9 ayında 147 yeni mənzil təbii qazla təmin edilmiş, 12 yaşayış mətəqəsinin qazlaşdırılması istiqamətində işlər görülmüşdür. Şəki rayonunun Suçma kəndində Yaponiya hökumətinin "Ot kökləri və insan təhlükəsizliyi" qrant yardımı proqramı çərçivəsində həyata keçirilən "Su təchizatı sisteminin tikintisi" layihəsi başa çatmışdır.

Təhsil, səhiyyə,

mədəniyyət və turizm

Hesabat dövründə Şəkinin təhsil işçiləri də gənc nəslin təlim-tərbiyəsi, onların kamil insan və hərtərəfli şəxsiyyət kimi yetişməsi işini şərəflə yerinə yetirmişdir. Sevindirici haldır ki, rayonun şagirdləri bir çox Respublika səviyyəli müsabiqələrdə böyük uğur qazanmışdır. Buraxılış imtahanlarının yekunlarına görə keyfiyyət faizi 2014-cü illə müqayisədə xeyli yüksək olmuşdur. IX sinfi başa vuran 1961 nəfər şagirddən 245 nəfərin şəhadətnamə qiymətləri yalnız 5 olmuşdur. Ali məktəbə qəbul üçün ərizə vermiş 1101 nəfərdən 615 nəfəri tələbə adını qazanmışdır. Bu il keçirilən qəbul imtahanlarında məzunlardan 145 nəfəri 500-dən, o cümlədən 61 nəfəri 600 baldan yuxarı nəticə göstərmişdir.

Şəki təhsilinin əldə etdiyi uğurlar dövlətimiz tərəfindən həmişə olduğu kimi, bu il də yüksək qiymətləndirilmişdir. Azərbaycan Respublikasının Prezidenti cənab İlham Əliyevin 02 oktyabr 2015-ci il tarixli Sərəncamı ilə şəhər 8 №-li tam orta məktəbin direktoru Ələsgərov Səttar "Tərəqqi" medalına, şəhər 10 №-li tam orta məktəbin riyaziyyat müəllimi Şərifova Nailə isə "Əməkdar müəllim" fəxri adına layiq görülmüşdür. Ümumiyyətlə son 4 ildə rayonun 12 nəfər müəllimi "Əməkdar müəllim", 6 nəfər müəlllim isə "Tərəqqi" medalına layiq görülmüşdür. 2011- 2014-cü illərdə Şəkinin 6 məktəbi "Ən yaxşı umumtəhsil məktəbi", 4 nəfər isə " Ən yaxşı müəllim" adını almışdır.

Şəki Mərkəzi Rayon Xəstəxanası və onun tabeliyində fəaliyyət göstərən tibb müəssisələri tərəfindən 2015-ci ilin 9 ayında əhaliyə göstərilən tibbi xidmətin səviyyəsi yüksəlmiş, tibb müəssisələrinin maddi-texniki bazasının yaxşılaşdırılması sahəsində müəyyən işlər görülmüşdür.

2015-ci ilin 9 ayında mədəniyyət müəssisələrinin maddi-texniki bazasının yaxşılaşdırılması sahəsində bir sıra işlər görülmüş, müddət ərzində bir sıra mədəni-kütləvi tədbirlər keçirilmiş, tarixi günlər, bayram tədbirləri yüksək səviyyədə qeyd olunmuşdur. Şəki bu gün Azərbaycanda turizmin yüksək səviyyədə inkişaf etdiyi bölgələrdən birinə çevrilmişdir. Şəkidə turizm infrastrukturunun yaradılması istiqamətində mühüm işlər görülmüş, müasir tipli istirahət mərkəzləri, yeni otellər istifadəyə verilmişdir. Şəkidə il ərzində xalqımızın zəngin mədəni irsinin təbliğinə həsr olunan müxtəlif festivalların keçirilməsi də rayonda turizmin inkişafına əhəmiyyətli dərəcədə kömək göstərmişdir.

Mədəniyyət və Turizm Nazirliyinin, Azərbaycan Milli Kulinariya Mərkəzinin, Azərbaycan Milli Kulinariya Assosiasiyasının və Şəki Şəhər İcra Hakimiyyətinin birgə təşkilatçılığı ilə iyulun 20-də Şəki şəhərində İkinci Beynəlxalq ənənəvi şirniyyat festivalı keçirilmişdi. Festivalda 12 ölkədən - Türkiyə, Rusiya, Fransa, Yunanıstan, Rumıniya, Moldova, Şimali Kipr Türk Cümhuriyyəti, Qazaxıstan, Qırğızıstan, Serbiya, Koreya Respublikası və İndoneziyadan gəlmiş qənnadıçılar, eləcə də respublikamızın 21 şəhər və rayonunun şirniyyatçıları iştirak etmişdilər. Mədəniyyət və Turizm Nazirliyi, Şəki Şəhər İcra Hakimiyyəti və "ALMUS Production" şirkətinin təşkilatçılığı ilə avqustun 22-dən - 26 dək Şəkidə keçirilən "Nağara-2015" Beynəlxalq Zərb Alətləri Festivalı şəhərin mədəni həyatında mühüm hadisə olmuşdur.

2015-ci ilin 9 ayında Şəkidə cinayətkarlığa qarşı mübarizə, qanunçuluq və hüquq qaydalarının möhkəmləndirilməsi sahəsində bir çox işlər görülmüşdür. Müddət ərzində 171 cinayət hadisəsi qeydə alınmışdır. Qeydə alınan cinayətlərdən 97,1 faizinin açılması təmin edilmişdir. Müddət ərzində Şəki Şəhər Rayon Polis Şöbəsi tərəfindən keçirilən əməliyyat axtarış tədbirləri nəticəsində narkomaniya ilə bağlı 22 fakt aşkar edilmişdir.

Məzahir ƏHMƏDOĞLU

Ədalət.-2015.-12 noyabr.-S.7.