Adı ölkələr dolaşan Naftalan

REGİON

Bir zamanlar kurort şəhəri kimi tanınan Naftalan yenə əvvəlki şöhrətini bərpa etməyə çalışır. Şəhərin hər yerində geniş abadlıq-quruculuq işləri aparılır, yeni yaşıllıqlar salınır. Bu gün Naftalana gələn yerli və əcnəbi turistlər müasir, abad bir şəhərlə rastlaşırlar.

Yanan çıraqlar

Azərbaycanın abad, öz səliqə-sahmanı ilə seçilən şəhərlərindən biri də Naftalandır. Bir vaxtlar Goranboyun və Yevlaxın tərkibində qəsəbə olan bu gözəl məkana 1967-ci ildə respublika tabeliyindəki şəhər statusu verilib.

Son statistikaya görə, şəhərin 9 mindən çox əhalisi var. Burada insanlar Naftalanın inkişafı, abadlığı üçün çalışır, başlanan hər bir müsbət işə öz töhfələrini vermək istəyirlər.

Naftalan şəhərinin sosial-iqtisadi inkişafı ilə əlaqədar 2015-ci ilin doqquz ayında görülən işlər və qarşıda duran vəzifələrə dair hesabat iclasında da bu məsələ xüsusi vurğulanıb.

Toplantıda çıxış edən Naftalan Şəhər İcra Hakimiyyətinin başçısı Natiq Aslanov bildirib ki, son illər Azərbaycanda aparılan uğurlu sosial-iqtisadi siyasət nəticəsində təkcə ölkənin paytaxtı deyil, regionlarımız da sürətlə inkişaf edir. Kurort şəhəri olan Naftalanda da hərtərəfli inkişaf üçün mühüm işlər görülür, həm sosial, həm də iqtisadi sahələrdə önəmli nəticələr əldə edilir.

Yığıncaqda qeyd olunub ki, həyata keçirilən tədbirlər nəticəsində şəhər üzrə ümumi məhsul buraxılışı 10497.5 min manat, iqtisadiyyatın aparıcı sahəsi sayılan sənaye istehsalı 1264.4 min manat təşkil edib. Bu ilin doqquz ayı ərzində əhaliyə 200.3 min manatlıq nəqliyyat xidməti göstərilib.

Əhalinin həyat səviyyəsini xarakterizə edən əsas göstəricilərdən biri olan pullu xidmətlərin həcmi 10690 min manat təşkil edib. Bu ilin doqquz ayı ərzində pərakəndə əmtəə dövriyyəsinin həcmi keçən ilin müvafiq dövrü ilə müqayisədə 20.5 faiz artaraq 13056.9 min manat, bir işçiyə hesablanan orta aylıq əməkhaqqı isə 5.3 faiz artaraq 295.5 manat, hüquqi və fiziki şəxslərə göstərilən informasiya və rabitə xidməti isə 138.4 min manat olub.

Hesabat yığıncağında xüsusi olaraq vurğulanıb ki, Naftalan şəhərinin yerli büdcəsi subsidya və digər gəlirlə birlikdə 2818.7 min manat, xərcləri isə 2271.9 min manat təşkil edib. Yerli mənbələrdən gəlir üzrə daxil olma 2271.2 min manat planlaşdırıldığı halda 2478.7 min manat olub. Bütövlükdə yerli büdcənin illik icrasına 75.3 faiz əməl edilib. 2016-cı il dövlət büdcəsinin müzakirəsi aparılarkən, xərclərini öz gəlirləri hesabına təmin edən rayon və şəhərlərin sırasına Naftalan şəhəri də daxil edilib. Bu faktın özü də Naftalan şəhərinin uğurlu inkişafından xəbər verən amillərdən biridir.

Hər kəsə diqqət

Şəhər rəhbərliyi aztəminatlı ailələrin sosial müdafiəsinin gücləndirilməsini daim diqqət mərkəzində saxlayır.

Hesabat dövründə Əhalinin Sosial Müdafiəsi Mərkəzi 93 ailəyə ünvanlı dövlət sosial yardım təyin edib, ümumilikdə isə 127 ailəyə ünvanlı dövlət sosial yardımı ödənilir.

Bu ilin doqquz ayı ərzində Dövlət Sosial Müdafiə Fondunun Naftalan şəhər şöbəsi tərəfindən 50 nəfərə müvafiq kateqoriyalar üzrə pensiya təyinatı aparılıb. Pensiya, müavinət və sosial yardımlar vaxtlı-vaxtında ödənilib.

Naftalan Şəhər İcra Hakimiyyətinin başçısı Natiq Aslanov toplantıda bu sahəyə diqqətin daha da artırılması üçün müvafiq tapşırıqlar verib.

Təhsil sahəsində də nəzərəçarpacaq uğurlar əldə edilib. Şəhərdə məktəblərin maddi-texniki bazasının gücləndirilməsinə də xüsusi önəm verilir. Qış mövsümündə məktəb binalarının fasiləsiz olaraq istiliklə təmin olunması məqsədilə hazırlıq işləri artıq başa çatmaq üzrədir. Qarşıya çıxan problemlər isə operativ həll edilir, nöqsanlar dərhal aradan qaldırılır. Bu il ali məktəblərə qəbul imtahanlarında iştirak etmiş Naftalanın 40 məzunundan 20-si tələbə adını qazanıb. Bir nəfər yüksək bal topladığına görə Prezident təqaüdünə layiq görülüb.

Hesabat yığıncağında qeyd edilib ki, ümumtəhsil məktəblərinin rəhbərləri tədrisin keyfiyyətini yüksəltmək üçün daha ciddi addımlar atmalıdırlar. Pedaqoji sahədə çalışanlar qarşıya qoyulan tapşırıqları uğurla yerinə yetirmək əzmindədirlər.

(ardı növbəti sayımızda)

Etibar CƏBRAYILOĞLU

Ədalət.-2015.-20 noyabr.-S.7.