ÜMUMTƏHSİL SİSTEMİNDƏ MÜASİRLƏŞMƏ DÖVRÜ

REGİON

"... Əlbəttə, Azərbaycanda elmə, təhsilə göstərilən diqqət mütləq öz nəticəsini verəcək. Bizdə savadlılıq yüksək səviyyədədir, savadsız insan yoxdur. Bu, böyük üstünlüyümüzdür. Ancaq bu gün yeni texnologiyalar tətbiq olunur. Uşaqlar da bunu bilməlidirlər. Elmin, təhsilin inkişafı ölkəmizin dayanıqlı inkişafını təmin edəcək. ".

Azərbaycan Respublikasının Prezidenti

İlham Əliyev

(mövzu əsasında XXVIII yazı)

Cəmiyyətin hərəkətverici qüvvəsi

Bütün dövrlərdə cəmiyyətin tərəqqisi bilavasitə təhsilin inkişafından və onun əhəmiyyətinin düzgün qiymətləndirilməsindən asılı olmuşdur. Cəmiyyətin tələbatı təhsilin inkişafını sürətləndirmiş, elmi və texnoloji nailiyyətlər isə təhsil sistemi qarşısında daha mürəkkəb vəzifələr qoymuşdur. Qloballaşmanın geniş vüsət aldığı hazırkı mərhələdə, informasiya cəmiyyətində sosial-iqtisadi fəaliyyət sahələrindəki rəqabətin gücləndiyi, habelə təbi resursların tədricən tükəndiyi bir vaxtda təhsilin rolu artmaqdadır. Yüksək intellektə malik insan kapitalının formalaşmasında, davamlı inıkişafa zəmin yaradan güclü iqtisadiyyatın qurulmasında təhsilin rolu mühüm əhəmiyyət kəsb edir. Təbii, burada təhsilin bütün mərhələlərinin ümumi məzmunu nəzərdə tutulur.

Mühüm istiqamətlər

Artıq inamla demək mümkündür ki, Azərbaycan təhsili də hərtərəfli inkişafa doğru geniş istiqamət götürmüşdür. Bu gün Azərbaycan həm regionun, həm də Avropanın siyasi cəhətdən stabil ölkəsinə çevrilmişdir. Azərbaycanın bütün sahələrində sürətli inkişafı ölkə Prezidenti İlham Əliyevin yeni idarəetmə modeli sayəsində mümkün olmuşdur. Məhz bunun nəticəsidir ki, son dövrlər Azərbaycanda təhsilin arzuolunan inkişafı diqqət çəkir. Qəbul olunmuş çoxistiqamətli proqramların reallaşması nəticəsində təhsilin müasir tələblər səviyyəsində qurulması və məzmununun yeniləşdirilməsi, təhsil alanların nailiyyətlərinin qiymətləndirilməsi üzrə yeni modellər və mexanizmlərin tətbiqi, təhsil müəssisələrinin informasiya-kommunikasiya texnologiyaları ilə təmin edilməsi və başqa sahələrdə əhəmiyyətli nailiyyətlər əldə olunmuşdur.

Şəkidə təhsilin inkişafı xüsusi diqqət mərkəzindədir

Bütün bunlar və təhsilin digər strateji istiqamətləri Şəki rayonunda da xüsusi diqqət mərkəzindədir. Rayon rəhbərliyi özünəməxsus ənənələri olan Şəki təhsil sisteminin daha böyük uğurlar qazanması üçün effektiv tədbirlər həyata keçirir. Elə rayon təhsil şöbəsinin müdiri Südabər İsmayılova da həmişə Təhsil Nazirliyinin və rayon rəhbərliyinin qayğı və diqqətinə cavab olaraq pedaqoji kollektivlərin səmərəli fəaliyyətindən inamla danışır.

Uğurlu nəticələrlə...

Bu yaxınlarda yeni dərs ilinin başlanmasına həsr olunmuş ümumrayon tədbirində ətraflı məruzə ilə çıxış edən S.İsmayılova demişdir:

- Ulu öndər Heydər Əliyevin əsasının qoyduğu siyasi kursun davamçısı olan möhtərəm prezidentimiz İlham Əliyevin rəhbərliyi altında Azərbaycanda davamlı inkişaf strategiyasının ən öncül istiqamətlərindən biri olan təhsilimizi yeniləşdirmək, müasirləşdirmək, dünya təhsil məkanına inteqrasiya etmək üçün mühüm addımlar atılması bu ilin də leytmotivi olmuşdur. Mən bu bayram münasibətilə pedaqoji ictimaiyyəti, xüsusilə bu il tələbə olan məzunların valideynlərini, yaxınlarını bir daha təbrik edirəm.

2014-2015-ci dərs ilində Şəkidə 98 ümumtəhsil məktəbi fəaliyyət göstərmişdir. Bunlardan 72-si tam orta, 22-si ümumi orta, 4-ü ibtidai məktəbdir. Bu məktəblərdə 23359 nəfər şagird təhsilə cəlb edilmişdir. Dərs ilinin sonunda 23113 nəfər sinifdən sinfə keçmiş və ya məktəbi bitirmişdir.

Məlumdur ki, orta ümumtəhsil yeganı təhsil pilləsidir ki, bütün insanlar buradan keçməli olur, gələcək həyatını bu təhsil vasitəsilə müəyyənləşdirir. Əgər bu zaman tələbyönümlük, şəxsiyyətyönümlük və vətənpərvərlik istiqamətində nəticələr müsbətdirsə uğurlar rəqəmlərdə öz əksini tapır.

Adətən təhsil sahəsində aparılan işlərin son nəticəsi üç meyar üzrə birləşdirilib qiymətləndirilir.

1. İstedadlı şagirdlərin üzə çıxarılması, onların yaradıcılıq potensialının inkişaf etdirilməsinə stimul verən fənn olimpiadalarının yekunu.

2. Şagirdlərin baza təhsili üzrə yekun attestasiyaların, buraxılış imtahanlarının nəticələri.

3. Məzunların sonrakı təhsili, ali məktəblərə qəbul.

İstedadlı şagirdlərin üzə çıxarılması, onların yaradıcılıq potensialının inkişaf itdirilməsinə stimul verən olimpiadalara bu ildən artıq Təhsil Nazirinin 12 dekabr 2014-cü il tarixli 1256№-li əmrinə uyğun olaraq yeni qaydalarla keçirilmiş və cəmiyyət tərəfindən yüksək qiymətləndirilmişdir.

Fənn olimpiadalarının rayon turunda 605 nəfər şagird iştirak etmiş, yarımfinalda normativə uyğun olaraq yüksək nəticə göstərən 72 nəfər əvəzinə 78 nəfər iştirak hüququ qazanmış, onlardan 48 nəfəri I-II-III yerləri tutmuş, I yeri tutan 17 nəfər Respublika turunda müvəffəqiyyət qazanaraq 8 nəfər gümüş və bürünc medalla təltif olunaraq 9 nəfərə sertifikat verilmişdir. Respublika və beynəlxalq miqyaslı yarış və müsabiqələrdə iştirak hüququ qazanmış 91 nəfər şagirddən 60 nəfəri qaliblər sırasındadır ki, bu da keçən ilin müvafiq rəqəmlərindən 2 dəfə çoxdur.

Qeyd etməliyəm ki, IX-XI siniflərdə təhsil alan şagirdlərin elmi axtarışlara sövq edilməsi, onların elmi və yaradıcılıq fəaliyyətinin stimullaşdırılması məqsədilə Təhsil Nazirinin əmri ilə keçirilən "Sabahın alimləri" Respublika müsabiqəsində rayonumuz respublika üzrə ən çox, yəni 16 şagird 10 layihə ilə təmsil olunmuşdur. İki nəfər gümüş medal, 14 nəfər isə sertifikata layiq görülmüşdür.

(ardı gələn sayımızda)

Məzahir ƏHMƏDOĞLU

Ədalət.-2015.-6 oktyabr.-S.3.