SABAHIN ŞƏHƏRİ – AĞCABƏDİ

Layihənin istiqaməti: Regionların sosial-iqtisadi inkişafının təşviq edilməsi

Bunu görmək lazımdı

"Bu il Azərbaycanda kənd təsərrüfatının bütün sahələri üzrə irəliləyişlərə nail olmaq əsas vəzifədir. Bunun üçün investisiya qoyulmasından, eləcə də sahənin bütün təlabatlarının ödənilməsindən ibarət olan ən vacib vəzifələr birinci növbədə yerinə yetirilməlidir. Kənd adamları onlara göstərilən diqqət və etimadın bəhrəsini görməlidilər. Bax bu da bütün Azərbaycan üçün yaradılacaq bolluğun, böyük inkişafın stimulları deməkdi"

Azərbaycan Respublikasının Prezidenti

İlham Əliyev

(əvvəli ötən sayımızda)

Bu gün böyük bir quruculuq meydanını xatırladan məmləkətimizin hər bir bölgəsində, hər bir regionunda insanda xoş ovqat yaradan tikinti-abadlıq işləri aparılır. Özü də görülən bu işlər həm planlı şəkildə, həm də regionun coğrafi və mədəni parametrlərini özündə əks etdirməklə reallaşdırıldığında dərhal diqqəti çəkir, zövq oxşayır. Çünki hər bir tikintinin obrazlı desək, damarında milli ornamentlər özünü büruzə verir.

Təbii ki, bu da işin sahibini, yəni bu quruculuğa, bu həyata keçirilən layihələrin həm təşəbbüsçüsü, həm də bir növü rəhbəri olan insanların torpağa bağlılığının, milli dəyərlərə qiymət verməyinin bəhrəsidi. Bax, bu mənada Ağcabədidə görülən işlər və təbii ki, bu işlərə rəhbərlik edən rayon icra hakimiyyətinin başçısı Şahin Məmmədovun özünün və komandasının fəaliyyəti təqdirəlayiqdi. Ən azından ona görə ki, indi Ağcabədiyə yolu düşən hər kəs bu şəhərin uzaq keçmişini və o keçmişdə qalan görkəmini hətta xatırlaya da bilmir. Çünki onlar, yəni Ağcabədinin 15-20 il bundan öncəki görkəmi tarixin arxivinə verilib. Bunu da ağcabədililər və Ağcabədiyə rəhbərlik edən insanlar, xüsusilə bu bölgəyə böyük diqqət yetirən, hətta özünün doğum gününü də bu ərazidə qarşılayan Azərbaycan prezidentinin özü və siyasəti gerçəkləşdiribdi. Bir az da konkret desək, regionların inkişafına dair Dövlət Proqramının yüksək səviyyədə həyata keçirilməsi, üstəlik də həmin proqramma uyğun olaraq bölgələrə respublika qurumlarının diqqətinin daha da artırılması bugünkü reallağın yaradılmasında əsas amillərdən biridi.

Bəli, bu gün böyük bir tikinti meydanına çevrilən Ağcabədidə təkcə kənd təsərrüfatının deyil, sənayenin, tikintinin, sosial sahələrin və ümumiyyətlə həyat əhəmiyyətli bütün problemlərin həlli istiqamətində köklü işlər görülür. Əgər rəqəmlərə müraciət etsək, onda birmənalı şəkildə deyə bilərik ki, bu il Ağcabədidə ötən ilin müvafiq dövrü ilə müqayisədə ət, süd, yumurta, yun istehsalında xeyli artıma nail olunmuşdu. Yəni ət istehsalı 5234 ton, süd istehsalı 44097 ton, yumurta istehsalı 83500, yun istehsalı 835 ton olmaqla sahələr üzrə ən azı bir faiz artım əldə olunmuşdu ki, bu da rayonun ümumi gəlirinin paralel olaraq artımı deməkdi. Faktiki olaraq rayonda istehsal edilən bu məhsullar rayon sakinlərinin, yəni bu sahə ilə məşğul olan adamların ailə büdcəsinin möhkəmlənməsinə və artımına gətirib çıxarmışdı.

Yeri gəlmişkən onu da qeyd edək ki, rayonda fəaliyyət gestərən "ATENA" MMC, həmçinin "AQAT-Aqro" MMC də paralel olaraq öz istehsallarını artırmaqla həm yerli büldcənin, həm də respublik büdcəsinin forrmalaşmasında öz müsbət təsirlərini göstərə bilmişdilər. Adı çəkilən və artıq respublikada hər kəsin tanıdığı bu böyük MMC-lərin istehsalı olan heyvandarlıq məhsulları indi həm keyfiyyətinə, həm də maya dəyərinə görə hər bir azərbaycanlının süfrəsində yer ala bilibdi. Deməli, bu da sahibkarlığa, özəl sektora göstərilən dövlət qayğısının konkret bir nümunəsidi. Ağcabədidə bu MMC-lərin fəaliyyəti təkcə məhsul bolluğu yox, həm də adamların işlə təmin olunması sahəsində atılan uğurlu bir addım kimi də dəyərləndirilir. Elə buradaca xatırlatmaq yerinə düşər ki, respublika hökuməti tərəifndən Sahibkarla Kömək Milli Fondunun dəstəyi ilə Ağcabədidə bu gün 138 sahibkara öz təsərrüfatlarını genişləndirmək, istehsallarını artırmaq üçün 1 milyon 752 min 900 manat güzəştli kredit verilmişdi. Həmin kreditlərin verilməsi də faktiki olaraq rayonda 339 nəfərin işlə təimn olunması, yəni iş yerlərinin açılmasına səbəb olmuşdu.

Maraqlı haldır ki, bu gün Ağcabədidə həyata keçirilən iri layihələrlə yanaşı, ayrı-ayrı təşəbbüslərin də qiymətləndirilməsi və dəstəklənməsi gündəlik işə çevrilib. Faktiki olaraq rayon rəhbərliyi və rəhbərliyin nümayəndələri rayonun bütün ərazisində sahibkarların, fermerlərin istehsalla məşğul olan insanların problemlərinin çözümünə, onların hüquqi bank-kredit yardımlarının göstərilməsinə çox diqqətlə yanaşırlar. Elə bunun nəticəsidir ki, bu ilin reallaşan layihələrinə diqqət yetirəndə onda məlum olur ki, məhz həmin o görülən işlər rayon büdcəsində öz əksini tapıb. Əldə etdiyimiz faktlardan da məlum olduğu kimi rayon üzrə orta aylıq əmək haqqı təqribən 259 manat olmuşdu. Bu da 2005-ci illə müqayisədə, yəni arxada qalan 10 illə yanaşı götürüləndə 4,1 dəfə artım deməkdi. Etiraf edək ki, kənd rayonunda yaşayıb işləyən Azərbaycan insanı üçün 259 manat aylıq gəlir heç də pis rəqəm deyil. Əksinə, bu, ailə büdcəsinin uğuru, qazancı sayıla bilər.

Rayon icra hakimiyyəti başçısının birinci müavini Rövşən Əhmədovun dediyi kimi, "məhz Azərbaycan prezidenti cənab İlham Əliyevin qayğısı, həm də tələbi ondan ibarətdir ki, hər bir Azərbaycan vətəndaşı bu gün dünənkindən daha yaxşı yaşamalıdır. Onun həyatı hər gün yenilənməli, hər gün uğurlarla yaddaqalan olmalıdı". Bu fikirlərdən də aydın olur ki, Ağcabədi rayon icra hakimiyyətinin başçısı Şahin Məmmədov və onun komandasının əsas qayəsi, əsas başlıca məramı Ağcabədini hər gün daha uğurlu sabahlara qovuşdurmaq, hər bir ağcabədilininin probleminin çözümünə nail olmaqdı. Elə bu istiqamətdə də görülən işlərin mənzərəsini göz önünə gətirəndə məlum olur ki, təqribən 13200 əhalisi olan Ağcabədi rayonunda yerli gəlirlər təqribən 145000 manat olmuşdu. Bu da faizə çevirəndə 108 faiz deməkdir. Adi rəqəm təsiri bağışlayan bu faktlar isə gerçək həyatda Ağcabədi rayon əhalisinin ailə büdcəsinə daxil olan gəlirləri əks etdirir.

Təbii ki, bu gün Ağcabədi rayonunda gerçəkləşdirilən bütün layihələrin birmənalı ifadəsi özünü regionların inkişafına dair Dövlət Proqramında tapıbdı. Həmin proqramın məramı isə ölkəni inkişaf etdirmək, Azərbaycan vətəndaşının həyat səviyyəsini yüksəltməkdir. Bunun üçün isə iş yerlərinin açılması, istehsalat sahələrinin genişləndirilməsi, növbəli əkin sistemi və xüsusi olaraq hər bir əmək adamına öz arzusuna, istəyinə uyğun sahələr yaratmaq, işləmək imkanı verməkdi. Faktiki olaraq Ağcabədidə adamlar üçün də məhz bu şərait yaradılıbdı.

(Ardı var)

Əbülfət MƏDƏTOĞLU

Ədalət.-2015.-3 sentyabr.-S.4.