SABAHIN ŞƏHƏRİ – AĞCABƏDİ

Layihənin istiqaməti: Regionların sosial-iqtisadi inkişafının təşviq edilməsi

Bunu görmək lazımdı

"...Rayonun gələcək inkişafı ilə bağlı konkret proqramlar var. Xüsusilə indi infrastruktur layihələri icra edilir. Kənd yollarının tikintisinə vəsait ayrılır. Sosial obyektlər tikilir. Ölkəmizin uğurlu inkişafı regionların inkişafından böyük dərəcədə asılıdır".

Azərbaycan Respublikasının Prezidenti

İlham Əliyev

(əvvəli ötən saylarımızda)

Hər bir abadlığın ilk nümunəsi, ilk işartısı yoldu, küçədi, səkidi. Bax, bu mənada atalar sözünə yenidən diqqət yetirmiş olsaq, onda "abad kənd yolundan tanınar" fikrini birbaşa Ağcabədiyə aid edə bilrik. Çünki bu rayonun, xüsusilə şəhər mərkəzinin küçələri, səkiləri həqiqətən ürəkaçan bir vəziyyətdədi.

Tam səmimiyyətimlə etiraf edim ki, mən bu rayon mərkəzində olanda gəzib dolaşdığım küçələrdən zövq alır, hətta sönmüş siqaretimi yerə atmağı özüm üçün çox böyük bir günah sayıram. Çünki səliqə-səhman, təmizlik elə bir səviyyədədir ki, küçəyə, yola nə isə atmaq yumşaq ifadə etsəm, ədəbsizlik olar. Üstəlik, gün ərzində şəhərdəki təmizliklə, səliqə-səhmanla məşğul olan adamların əməyinə hörmət, onların yaratdığı şəraitə insani münasibət hər kəsdən öncə özünə qarşı bir hörmət tələb edir. Deməli, abad küçələr və küçələrin kənarındakı səkilərin döşəmələri, eləcə də sel sularının axıdılması üçün yaradılmış xüsusi novdanların fasiləsiz işləməsi göstərir ki, ağcabədililər öz şəhərlərini sevirlər. Hətta yaz aylarının birində Ağcabədidə olarkən yağan güclü yağışın insanlarda, yəni küçələrdə hərəkət edən adamlarda çox da böyük gərginlik yaratmadığını müşahidə etmək mənə nəsib olub. Təbii ki, kənd rayonlarında hər şeyi birdən-birə həll etmək, bütün problemləri eyni zamanda aradan qaldırmaq qeyri-mümkündü. Üstəlik burada bir məqam da var. O da həmin görülən işlərə hamının eyni dərəcədə diqqət yetirməməsi, onu qorumaması, ona etinasız yanaşması və s. özü də ortaya yeni problemlər çıxarır.

Bütün bunlarla yanaşı Ağcabədidə tikilən sosial obyektlər, aparılan yaşıllaşdırma və bir də rayonun ümumi arxitekturasına yeni cizgilər əlavə edən müasir tipli çoxmərtəbəli binaların ucaldılması sanki bir ansambl yaradır. Yeri gəlmişkən onu da xatırladım ki, hətta rayonda tikilən şadlıq evlərinin özləri də bu ansambla ağırlıq gətirmir, əksinə, bir növü onu tamamlayır. Mən Ağcabədidə olarkən yerli sahibkarların, iş adamlarının Ağcabədi üçün etdiklərini də öz yaddaşıma köçürürdüm. Onlardan biri xüsusilə yaddaşımda dərin iz buraxıb. Belə ki, rayonda sayılan iş adamlarından biri olan Kərim Cəfərovun tikdiyi şadlıq evi və motel əslində şəhərin bir az gözdən uzaq məhəlləsində yerləşir. Amma həmin iş adamı "o gözdən uzaq yeri də özünün qayğıkeşliyi ilə, işə köklü münasibəti ilə ümumi mənzərəyə daxil edə bilib. Motelə gələn qonaq şəhərin bir qədər kənarında olan bu məhəllədə də eyni auranı yaşaya bilir. Xüsusilə həmin əraziyə gedən yol, onun ətrafında gedən abadlıq işləri gələn qonaqların maşınlarını park etmək üçün yaradılmış şərait və bütün bunlarla yanaşı, həm də buranın bir iş yeri kimi fəaliyyət göstərməsi, təbii ki, Regionların İnkişafına Dair Dövlət Proqramının əyani nümunələrindən biridir.

Rayonda hər kəsin həmişə maraq mərkəzində olan səhiyyənin və eləcə də səhiyyə ocaqlarının durumu get-gedə daha da diqqətçəkən olub. Yəni müasir xəstəxana binasının tam istifadəyə verilməsi, eləcə də bu xəstəxanada demək olar ki, ən müasir avadanlıqların quraşdırılması artıq qonşu rayonların da diqqətini çəkib. Bu gün Ağcabədidə fəaliyyət göstərən 5 çarpayılıq hemodializ və 10 çarpayılıq onkoloji şöbə ətraf rayonlardan müraciət edən xəstələrin ümid yeridi. Onu da əlavə edək ki, rayonda xəstəxanının vərəm şöbəsinin də tam təmir edilib öz fəaliyyətini bərpa etməsi bu xəstəlikdən əziyyət çəkənlərin başqa ünvanlara üz tutmaq problemini aradan qaldırır. Elə buradaca onu da qeyd edək ki, rayonda təkcə şəhər mərkəzində deyil, həmçinin kənd və qəsəbələrdə də sahə xəstəxanalarının ambulatoriyaların tikilməsi, təmir-bərpası işləri heç vaxt yaddan çıxmır. Əksinə, ayrılan diqqətin bəhrəsi kimi kənd xəstəxanalarında da müasir şəraitin yaradılması üçün vacib qərarlar qəbul olunmaqla, demək olar ki, sakinlərin həm ilkin yardım, həm də stasionar müalicəsinə şərait yaradılıb.

Bu gün Ağcabədidə idmanın inkişafı üçün ayrılan diqqət, göstərilən qayğı digər bölgələrimizə nümunə ola bilər. Əgər faktlara üz tutsaq onu görərik ki, cari ilin birinci yarısında Ağcabədi idmançıları beynəlxalq, respublika və zona yarışlarında 91 medala layiq görülüblər ki, onlardan 32 nəfər I yerin, 29 nəfər II yerin, 30 nəfər III yerin qalibi olub. Ən sevindirici hal budur ki, Ağcabədi idmançıları dünya çempionatında, Avropa və beynəlxlaq yarışlarda həmişə öz uğurlu çıxışları ilə öz həmyerlilərini sevindiriblər. Təbii ki, bu da rayonda idmana göstərilən diqqətin və yaradılmış şəraitin nəticəsidir. İndi bir məqamı da qeyd etmək lazımdır ki, idmanla yanaşı, Ağcabədidə mədəniyyət sahəsinin də inkişaf etdirilməsi üçün normal bir mühit mövcuddur. Ona görə də rayonda keçirilən musiqi yarışmaları, muğam evində hamının böyük maraqla izlədiyi musiqili anlar dediklərimizə real bir nümunədir. Təkcə mədəniyyət və turizm şöbəsinin xətti ilə reallaşan tədbirlərin silsiləsinə diqqət yetirəndə o da məlum olur ki, mədəniyyət evinin, kitabxanaların, klubların, tarix-diyarşünaslıq evinin, Həmidə xanım Məmmədquluzadənin ev muzeyinin, dövlət rəsm qalareyasının, Ü.Hacıbəyov adına Qarabağ muğam mərkəzinin fəaliyyəti və bu şəbəkənin günbəgün genişlənməsi həm istirahət və əyləncələrin təşkili, həm də iş yerləri kimi dəyərləndirilməlidir.

Bəli, bu gün faktiki olaraq Ağcabədi rayonunda görülən işlərin siyahısı tərtib olunarsa, onda görərik ki, rayon icra hakimiyyətinin başçısı Şahin Məmmədov və onun komandası yerli sakinlərlə birlikdə diqqətçəkən işlərin müəllifləridirlər. Bu işlərin içərisində vətəndaşlarla işləmək, onlarla elə yerindəcə, yəni kəndlərdə, qəsəbələrdə görüşlər keçirmək, problemi isti-isti həll etmək xüsusilə təqdirəlayiqdir. Üstəlik, Şahin Məmmədovun da vurğuladığı kimi, ölkə prezidentinin nümayəndəsi kimi hər bir Ağcabədi sakininə diqqətlə yanaşmaq və rayonun problemlərini aradan qaldırmaq vəzifə sahiblərinin birinci və birmənalı vəzifəsidir. Üstəlik, bölgədə yerləşən hərbçilərlə, qaçqın və məcburi köçkünlərlə sıx əlaqə saxlamaq, onlara da gərəkli yardımları göstərmək rayon rəhbərliyinin gündəlik qayğılarındandır.

Doğurdan da bu gün böyük bir inkişafın meydanına çevrilmiş və sabahını bu günündən gözəl görmək üçün ürəklə çalışan, məsuliyyətlə vəzifəsini icra edən rayon rəhbərliyi, aidiyyəti qurumlar, eləcə də hər bir ağcabədili inanır ki, Azərbaycan prezidentinin diqqət və qayğısı onların üzərindədi, onlar da bu diqqət və qayğıya öz vətəndaş mövqeləri ilə həmişə cavab veriblər və bundan sonra da həmin mövqedə qalacaqlar. Çünki abadlaşan Azərbaycanın bir parçasıdır.

Əbülfət MƏDƏTOĞLU

Ədalət.-2015.-5 sentyabr.-S.4.