ŞƏKƏRCİYƏ GEDƏN YOL

Layihənin istiqaməti: Regionların sosial-iqtisadi inkişafının təşviq edilməsi

"Siz düşmənlə üz-üzə yaşayırsınız, siz böyük cəsarət, mərdlik göstərirsiniz. Biz burada, düşmənlə üz-üzə Horadizdə bir gülüstan, abad şəhər görürük. Getsinlər öz şəhərlərinə baxsınlar. Bu gün Horadiz abadlığa görə onların paytaxtı olan qədim Azərbaycan şəhəri İrəvandan bir neçə dəfə üstündür. Bu, reallıqdır. Bunu hər kəs görür və görməlidir".

İlham Əliyev, Azərbaycan Respublikasının prezidenti

Füzuli-2014

...Burdan belə getmək mümkün deyil. Gərək onda Füzulinin Alxanlı, Aşağı Seyidəhmədli, Yuxarı Seyidəzmədli kəndlərini keçib şəhərin özünə çatasan. Ordan da Şəkərciyə bir addımlıq yoldur. Hələ ki, Şəkərciyə getmək mümkün deyil. Amma Allah qoysa, ölkə prezidenti İlham Əliyevin köməkliyi ilə biz nəinki Şəkərciyə, Füzuli şəhərinə, Ağdama, Şuşaya, Laçına, Kəlbəcərə... gedəcəyik...

Hər şey burdan başlayır

Füzuli rayonunda mədəniyyət və turizm sahəsində çox böyük irəliləyişlər əldə olunub. Rayon işğaldan azad edildikdən sonra möhtəşəm mədəniyyət sarayları, klublar və digər ocaqlar inşa edilib. Rayon Turizm və Mədəniyyət şöbəsinin müdiri Elman Məmmədov deyir ki, Şəkərcik kənd musiqi məktəbinin direktoru Əli Baxış çox maraqlı və istedadlı bir adamdır. Onunla görüşüb söhbət eləsən tanışlığına şad olarsan. Ümumiyyətlə, bizim rayonda icra hakimiyyəti başçısı Alı Alıyevin qayğısı ilə bütün sahələr sürətlə inkişaf edir və o cümlədən mədəniyyət sahəsi də dirçəliş və çiçəklənmə günlərini yaşayır.

Direktor-bəstəkar

Əli Baxışla telefonda söhbət eləyirik və ilk tanışlıqdan da hər şey gözəl alınır. Deyir ki, Faiq müəllim, sən həmişə Füzuli və füzulilər haqqında xoş sözlər demisən. Bir ziyalı olaraq, səni yaxşı tanıyırıq. Gəl Dərnəgülə, bir stəkan çay içək, həm də dərdləşək. Çoxdandır, sənin kimi ziyalının həsrətini çəkirik. Elə onunla Dərnəgüldə sığınacaq tapdıqları ünvanda görüşürük. Burda da Əli müəllim Şəkərciyin ab-havasını yarada bilib. Sanki otaqlara baxanda elə bilirsən ki, Şəkərciyin özündəsən. Əli Baxış bu məktəbi 1991-ci ildə Füzulidə olarkən yaradıb. Elə o vaxtdan da məktəbin direktorudur. Söz sözü çəkdikcə onun ürəyi açılır və məlum olur ki, Əli müəllim həm də gözəl bəstəkardır. Onun 250-dən çox mahnısı var. Bu mahnıları Zöhrə Abdullayeva, Qədir Qızılsəs, Nadir Bayramlı və digər müğənnilər ifa ediblər. Əli müəllim onu da bildirir ki, mənim ürəyim həmişə Füzulidədir. Füzulidən bir adam görən kimi elə bilirəm o yerləri gəzib gəlirəm...

Şirin səslər

bulaq suyu kimi təmizdir

Bu musiqi məktəbində bir-birindən istedadlı və şirin səsə malik olan gənclər var. Daha doğrusu, musiqi məktəbində təhsil alan şagirdlər öz ürəklərinin səsi ilə bu ünvana gəliblər. Amil Hüseynzadə (tar), Seyfəddin Qasımzadə (qarmon), Rövlan Hacıyev (səs), Aygün Hacıyeva (səs), Rəsul Quliyev (səs) öz ifaları ilə çoxlarının diqqətini cəlb ediblər və müsabiqədə fərqləniblər. Deyirlər ki, qarabağlıların uşaqları da ağlayanda "Segah" üstündə ağlayır. Onların ifasını dinləyəndə bir daha adam özünü çox gözəl bir məkanda hiss eləyir. Səsin şirinliyi və avazı insanın qəlbini sehrləyir. Əlbəttə, bu uşaqlar elə-belə püxtələşməyiblər. Çünki onları həyata hazırlayan, səhnəyə çıxaran musiqi müəllimləri var.

Yeganə Şirinova (fortepiano), Mübariz Əliheydərov (tar), Hamlet İsmayılov (tar), Zeynəb Quliyeva (səs) belə müəllimlərə nümunə sayıla bilər. Təşkilat Nəsirov isə çox tanınmış və məşhur bir xanəndədir. Onun özü "Xarı bülbül" müsabiqəsinin laureatıdır.

İstedadlar səhnədə

özünü göstərir

Məktəbin direktoru Əli Baxış deyir ki, istedadlı şagirdlərimiz səhnədə özlərini birmənalı olaraq təsdiqləyiblər. Məsələn, mən onlardan Mikayıl İsmayılovun (piano), Aynur Şahverənovanın (piano), Ayaz Hacıyevin (tar) adlarını çəkə bilərəm. İnandırım sizi, bu şagirdlərin hər biri çox bacarıqlı və səhnə üçün sanki yaranmış uşaqlardılar. Onlar öz seçdikləri sənətə o qədər qəlbən bağlıdırlar ki, müəllimləri bir dəfə hər hansı bir musiqini öyrədən kimi onu yadda saxlayır və gözəl ifa edirlər.

Bir faktı da qeyd etməliyəm ki, bu gün məktəbimizdə xalq çalğı alətləri, fortepiano, səs, qarmon, nağara şöbələri fəaliyyət göstərir. Və bu şöbələrdə 185 şagird musiqinin müxtəlif növlərini öyrənirlər. Şəxsən fərəhlə deyə bilərəm ki, onların hər biri bizim üzümüzü beynəlxalq və respublika müsabiqələrində ağ edirlər.

Sevincli anlar

Direktor Əli Baxışla söhbət etdikcə mən xəyalən özümü Füzulinin Şəkərcik kəndində hiss eləyirdim. Çünki uşaq vaxtı o kənddə o qədər olmuşam ki. Yaxın bir qohumumuzun evinə tez-tez atam məni aparardı və orda qalmaq istədiyimi hiss edib xətrimə dəyməzdi. Əli müəllim deyir ki, həmin kənd üçün indi burnumuzun ucu göynəyir. Çox sağ olsun mədəniyyət və turizm şöbəsinin müdiri Elman Məmmədovu. Rayona gedəndə hamımızı başına yığır, öz tövsiyələrini verir, sonra da Horadiz şəhərində gözəl bir məkanda əyləşib bir stəkan çay içirik. Bax, onda Horadizdə biz Füzuli şəhərinin və Şəkərciyin ətrini hiss edirik.

Bizim məktəbin çox istedadlı bir yetirməsi var - estrada müğənnisi Zamiq Hüseynov. Yəqin çoxlarınız onu yaxşı tanıyır. Vaxtı olanda bizi yaddan çıxarmır. Onunla yanaşı, çox istedadlı tar ifaçısı Namiq Fərzəliyev də bizim məktəbi bitirib və bu gün musiqi müəllimi işləyir. Bir şagirdimiz isə Qazaxıstanda keçirilən beynəlxalq müsabiqədə 2013-cü ildə laureat adını qazanıb. Geri baxanda və bu uğurları xatırlayanda iftixar hissi keçiririk.

Əlbəttə, insan keçmişinə qürurla baxır və sevinir ki, yaşadığı ömür hədər getməyib. Əli müəllimin narahatlığını hiss edirik. Deyir ki, bir-iki gündən sonra oğlumun toyudur. Bir az ona görə həyəcanlanıram. Əli müəllim, təki toy olsun və Allah-Təala da sizin balanızı xoşbəxt eləsin!..

Faiq Qismətoğlu

Ədalət.-2015.-16 yanvar.-S.7.