ORDA BİR KƏND VAR, UZAQLARDA

Sosial-iqtisadi inkişafın qələbə estafetləri

Layihənin istiqaməti: Regionların sosial-iqtisadi inkişafının təşviq edilməsi

"...Bu, bir daha onu göstərir ki, bizim tutduğumuz yol düzgün yoldur. Azərbaycan müstəqillik, inkişaf yolu ilə gedir. Bir neçə il bundan əvvəl dünyanı bürümüş iqtisadi və maliyyə böhranı, eyni zamanda, bölgədə baş verən xoşagəlməz hadisələr, toqquşmalar Azərbaycanın uğurlu inkişafına təsir etməmişdir. Bunun başlıca səbəbi Azərbaycanda ictimai-siyasi vəziyyətin sabit olmasıdır, xalqla iqtidar arasındakı birlikdir və bizim bütün proqnozlarımızın uğurlu icrasıdır..."

Azərbaycan Respublikasının Prezidenti

İlham Əliyev

Ölkəboyu genişlənən quruculuq işləri, müasirləşmə və mədəni yüksəliş, təbii ki, sosial-iqtisadi inkişafın qələbə estafetlərinin nəticələridir. Respublikamızın bütün şəhər və rayonlarında, bütövlükdə ölkəmizin hər yerində aparılan quruculuq işlərinə, eyni zamanda iqtisadi uğurlara baxıb fəxr edən, qürur hissi keçirən hər bir Azərbaycan vətəndaşının qəlbi vətənlə bir döyünür, vətənlə nəfəs salır.

Sosial-iqtisadi inkişafın ölkənin ən ucqar bölgələrini də əhatə etməsi, insanların rifah halının yüksəlməsi bütün istiqamətlərə işıq salmışdır. Dövlət Proqramlarında qarşıya qoyulan vəzifələr, artıq hansısa bir binanın təmiri və ya hansısa bir küçəyə yeni asfalt qurulması qədər xırda məsələləri gündəmə gətirmir. Birinci Dövlət Proqramının icrasından bəri ölkənin hər yerində nəhəng işlər aparılır. Bu tərəqqi, bu yüksəliş Azərbaycan Respublikasının adi vətəndaşından tutmuş, onun rəhbərinə kimi sevinc və qürur bəxş edir. Ölkə Prezidenti İlham Əliyev regionlara səfərləri zamanı ictimaiyyət nümayəndələri ilə görüşlərində ən sadə adamlarla bu sevinci bölüşür, Azərbaycan Respublikasının gələcəyinin daha gözəl olacağına inandığını bildirir.

Təbii fəlakətə görə

misli görünməmiş dövlət qayğısı

Zaqatala rayonunda da belədir. Sosial-iqtisadi inkişafın bəxş etdiyi nailiyyətlər ən ucqar kəndlərin də həyatında mühüm rol oynamaqdadır. Ölkə rəhbərliyinin, şəxsən cənab prezidentin qayğı və diqqəti hər yerdə olduğu kimi, bu rayonun da tərəqqisini təmin etmiş, Zaqatala təkcə təbiət gözəllikləri ilə deyil, kəndli-şəhərli ən inkişaf etmiş bölgəyə çevrilmişdir.

2012-ci ilin may ayında bölgədə baş verən güclü zəlzələlər tarix və hadisə, fakt baxımından unudulmayıb. Zəlzələnin episentri Zaqatala rayonu olmaqla, qonşu Qax və Balakən rayonlarında da dağıntılar baş vermişdi. Təkcə Zaqatala rayonunun Muxax, Gözbarax, Danaçı və biri neçə digər kəndlərində, eyni zamanda rayon mərkəzində minlərlə yaşayış evləri, inzibati və digər sosial binalar dağılmış, yararsız hala düşmüş və ya zədələnmişdi. Dəhşətli mənzərə yaranmışdı. Ancaq bu dağıntılar Tanrının möcüzəsi, böyük rəhmi ilə can almamışdı. Cənab Prezidentin dərhal təbii fəlakət zonasına gəlməsi, əhalinin üzərindən qorxu və təlaşı götürmüş, insanları ruhlandırmışdı. Üstəlik dara düşənlər can itkisizliyi ilə yanaşı ikinci böyük bir mükafatın da sevincini yaşayaraq qorxulu hadisəni unutmağa başlamışdılar. Dünyada analoqu olmayan başqa bir xoş hadisə də baş vermişdi. Cənab Prezident zəlzələdən ziyan çəkmiş ev və binaların, sosial obyektlərin əvəzinə ən müasirlərinin tikilməsinə göstəriş verərək milyonlarla manat həcmində vəsait ayrılmasını təmin etmişdi. Təkrar vurğulamağa ehtiyac var. Hətta dünyanın ən inkişaf etmiş ölkələrində belə bu cür yanaşma, bu cür qayğı tarix boyu görünməyib.

Az vaxt ərzində bölgədə yaraşıqlı, hər cür rahatlığı olan mənzillər tikilib istifadəyə verildi. Azərbaycan Respublikasının Fövqəladə Hallar naziri, general-polkovnik Kəmaləddin Heydərov uzun müddət müntəzəmliklə burada aparılan işləri birbaşa nəzarətdə saxladı. Həmin vaxtlar təbii fəlakət bölgəsi tikinti işləri aparılan sonrakı dövrlərdə də Fövqəladə Hallar Nazirliyi rəhbərliyinin və məsul əməkdaşlarının gündəlik iş yerinə çevrildi. 2013-cü ilin sentyabr ayında görülmüş işlərin nəticələrinə baxmağa gələn Azərbaycan Respublikasının Prezidenti İlham Əliyev Zaqatalanın ən çox dağıntıya məruz qalmış Gözbarax kəndinə də baş çəkdi və burada görülən işlərdən razı qaldığını bildirdi.

O çətin və mürəkkəb günlərdə Zaqatalada fəaliyyət göstərən dövlət qurumları və inşaatçıların əzmkarlığı ilə yanaşı, rayon rəhbərliyinin, xüsusilə icra hakimiyyətinin başçısı Mübariz Əhmədzadənin gecəli-gündüzlü fədakar və təmkinli fəaliyyəti də cənab Prezidentin tapşırıqlarının tələb olunan səviyyədə yerinə yetirilməsində mühüm rol oynadı.

(Ardı var)

Məzahir ƏHMƏDOĞLU

Ədalət.-2015.-22 yanvar.-S.7.