İŞIQ OLAN YERDƏ...

Layihənin istiqaməti: Regionların sosial-iqtisadi inkişafının təşviq edilməsi

"... Mən qeyd etmişdim ki, buralar hamısı işğal altında idi. Ermənilər bu bölgələri zəbt etmişdilər. Sonra Azərbaycan Ordusu bu torpaqları azad etdi, yenidənqurma-bərpa işləri başlandı. Birinci mərhələdə əlbəttə ki, maliyyə çətinliklərimiz var idi, imkanlarımız o qədər də geniş deyildi. Amma nəyimiz var idi Azərbaycan dövləti sərf edirdi ki, burada bərpa işləri getsin. Ancaq indiki şəraitdə ki, maliyyə imkanlarımız vardır, biz bu işləri mütləq görməliyik və gördük".

Azərbaycan Respublikasının Prezidenti

İlham Əliyev

... Bu yerlər uzaqdan da, yaxından da çox gözəl görünür. O yerdə ki, həyat qaynayır, o yerdə ki, böyük abadlıq və quruculuq işləri görülür, təbii ki, o yurd daha nurlu və işıqlı olur. Hansı ki 1993-cü ilin avqustunda bu şəhəri və 22 yaşayış məntəqəsini ermənilər xarabalığa çevirmişdilər. Bir ev, bir tikili qalmamışdı ki, onu göstərib deyəsən; bax, bu bina yandırılmayıb. İşğalçılar "uf" demədən hər şeyi bir göz qırpımında altını üstünə çevirmişdilər...

Yeni həyat

Yazımızın əvvəlində qeyd etdik ki, bu yerlərə uzaqlardan və yaxından baxanda da adam valeh olur. Dediyimiz şəhər Horadizdir. Və onunla yaxınlıqda yerləşən digər 22 yaşayış məntəqəsi var. Bu gün Füzulidə 70 minə yaxın insan həmin şəhərdə və yaşayış məntəqələrində məskunlaşıb. Əlbəttə, camaat 1994-cü ilin yanvarından sonra işğaldan azad olunan kəndlərə qayıdanda bir müddət çətinliklə üzləşdi. Amma atalar yaxşı deyib: "Yaman günün ömrü gödək olar". Elə ilk növbədə Füzulinin işğaldan azad olunmuş Horadiz qəsəbəsi və 22 yaşayış məntəqəsi Böyük Öndər Heydər Əliyevin yeritdiyi siyasət nəticəsində əsaslı surətdə yenidən bərpa edildi və yanmış evlər tikilərək əhalinin istifadəsinə verildi.

Əlbəttə, qısa zamanda Füzulinin işğaldan azad olunmuş Horadiz şəhərində və 22 yaşayış məntəqəsində möhtəşəm abadlıq işləri görüldü. Hansı ki işğaldan bir ay sonra orda vəziyyət çox ağır idi. Lakin buna baxmayaraq, dövlətin apardığı məqsədyönlü siyasət nəticəsində rayonun işğal zamanı dağılmış inzibati binaları, xəstəxanaları və yaşayış evləri bərpa edildi.

Bunlar asan deyildi

Füzulililəri bir yerə toplamaq və orda möhtəşəm işlər görmək rayon rəhbərindən çox şey tələb edirdi. Bunu əvvəlki rəhbər də və sonradan təyin olunmuş icra başçısı Alı Alıyev də çox yaxşı təşkil etmişdi.

Rayona qayıdan əhali ilk növbədə ölkə prezidentinə və onun səlahiyyətli nümayəndəsinə inanırdı. Məhz bu inamın nəticəsi idi ki, əhali az bir müddətdə özünün dolanışıq yolunu tapdı və çıxış yolunu yaxşı bildi. Bütün bunlar isə onu deməyə əsas verirdi ki, Füzulidə həyat yenidən axarına düşüb, rayonun Horadiz şəhəri və yaşayış məntəqələri əsaslı surətdə abadlaşır. Onu da qeyd etmək lazımdır ki, bunlar o qədər də asan məsələ deyildi.

Düzdür, ölkə rəhbərliyi tərəfindən rayonun sosial-iqtisadi inkişafına böyük önəm verilirdi və diqqət yetirilirdi. Bu məqsədlə rayonun inkişafı üçün milyonlarla manat vəsait ayrılmışdı. Və bu vəsait də zaman-zaman təyinatı üzrə düzgün xərclənildi və rayon öz əvvəlki simasından daha da gözəl oldu.

Yeni qəsəbələr, yeni yaşayış sahələri

Bir-birinin ardınca Füzulinin işğaldan azad olunmuş torpaqlarında yeni qəsəbələr salındı. Bu qəsəbələr arasında "Qayıdış" və "Zobucuq" qəsəbələri öz infrastruktur quruluşu və müasir görkəmi ilə seçilirdi. Yeni salınan qəsəbələrdə hər cür şərait yaradılmışdı. Burda xəstəxanalar, məktəblər və digər inzibati binalar inşa edilmişdi.

Yəni insanların yaşayışı və həyatı üçün nə lazımdısa, onun hamısı yüksək səviyyədə qurulmuşdu.

Məhz buna görə də həmin yaşayış sahələrində on minlərlə insanlar məskunlaşa bildi. İndi demək olar ki, adını çəkdiyimiz qəsəbələrdə hər cür şərait var. Sakinlər nə elektrik enerjisindən, nə istilikdən, nə də yol sarıdan heç bir çətinliklə üzləşmirlər.

Qeyri-adi inkişaf

Diqqətlə baxanda bu gün Füzulidə hər şey dəyişib. Azərbaycan necə sürətlə inkişaf edirsə, bax, Füzuli də bu gün həmin sürətlə inkişafdadır. Bəlkə də respublikamızda üç-dörd nümunəvi əsaslı surətdə yenidən qurulan və tikilən şəhər varsa, onlardan biri Horadiz şəhəridir. Çünki cənab prezident İlham Əliyev dəfələrlə Füzuliyə səfər edərkən bu regionun sosial-iqtisadi inkişafının sürətləndirilməsinə xüsusi diqqət yetirib. Və çıxışlarında qeyd edib ki, mən həmişə cəbhə bölgələrini və o cümlədən Füzulini diqqət mərkəzində saxlayacağam. Bu həqiqətən də belə olub. Cənab Prezident son səfərində də füzulililər qarşısında çıxış edərək rayonda görülən abadlıq və yenidənqurma işlərindən razı qaldığını bildirib. İndi Füzulidə elə bir kənd, elə bir yaşayış məntəqəsi yoxdur ki, ora asfalt yol çəkilməsin. Əksər kəndlərə mavi qaz verilir. Bütün bunlar ölkə prezidentinin rayon sakinlərinə olan qayğısının nəticəsidir. Horadiz şəhərində o qədər yeni tikilmiş gözəl binalar və mədəniyyət mərkəzləri var ki, onların adını çəkməklə qurtarmaq mümkün deyil. Belə ki, bir-birindən gözəl binalar və yeni tikililər şəhərə əsrarəngiz bir gözəllik verir. Son vaxtlar istifadəyə verilmiş Bayraq Meydanı isə öz möhtəşəmliyi ilə seçilir. Gecələr Bayraq Meydanında bərq vuran qırmızı, yaşıl işıqlar həmin yeri daha da gözəlləşdirir.

Hər ürəkdə bir sevgi

Rayonda abadlıq, quruculuq işlərinin həyata keçirilməsində icra başçısı Alı Alıyevin və onun komandasının əməyi çox böyükdür. Söhbət düşəndə Alı müəllim deyir ki, biz Füzulidə nə əldə eləmişiksə, hörmətli prezidentimiz İlham Əliyevin köməkliyi və qayğısı nəticəsində nail olmuşuq. Cənab Prezident həmişə cəbhə bölgəsi olaraq bizim rayona böyük diqqət və qayğı göstərib və maliyyə dəstəyi verib. Məhz bütün bunların hesabına möhtəşəm Horadiz şəhəri inşa edilib və 22 yaşayış məntəqəsində böyük abadlıq işləri görülüb. Bir daha füzulililər adından bu qayğı və diqqətə görə cənab Prezidentə öz minnətdarlığımızı bildirir və əmin edirik ki, bizə göstərilən etimadı öz əməli işimizlə doğruldacağıq.

(Ardı var)

Faiq QİSMƏTOĞLU

Ədalət.-2015.-28 yanvar.-S.7.