İŞIQ OLAN YERDƏ...

Layihənin istiqaməti: Regionların sosial-iqtisadi inkişafının təşviq edilməsi

"... Artıq Horadiz şəhərinin abadlaşması hamımız üçün bir nümunədir. Çünki bu onu göstərir ki, işğaldan azad olunan ərazilərdə belə gözəl şərait yaratmaq mümkündür. Bunu biz etmişik, Azərbaycan xalqı Azərbaycan dövlətinin imkanları hesabına edib. Bu, onu göstərir ki, bu gün işğal altında qalan torpaqlarımız azad olunandan sonra orada da belə, daha da gözəl şərait yaradılacaqdır. Biz Füzuli şəhərini də mütləq bərpa edəcəyik".

Azərbaycan Respublikasının Prezidenti

İlham Əliyev

(əvvəli ötən sayımızda)

... İşğaldan azad edilən məntəqələrdə çox böyük, möhtəşəm işlər görüldüyü barəsində ötən yazımızda qeyd etmişdik. Bütün sahələrdə olduğu kimi, təhsil sahəsində də əsaslı irəliləyişlərə və inkişafa nail olunub. Belə ki, işğaldan sonra Horadiz şəhərinin özündə hər cür müasir şəraitə cavab verən ikimərtəbəli yeni məktəb binası və uşaq bağçası tikilib istifadəyə verilib. Bununla yanaşı, "Qayıdış" və "Zobucuq" qəsəbələrində müasir infrastrukturlu tam orta məktəblər müəllimlərin və şagirdlərin istifadəsindədir. Eləcə də digər onlarla orta məktəbdə əsaslı təmir işləri aparılıb. Rayon təhsil şöbəsinin müdiri Almaz Həşimova deyir ki, cənab prezident İlham Əliyev bütün sahələrdə olduğu kimi, təhsilə də önəm verib. Və bizim rayonumuzda təhsil sahəsində çox möhtəşəm işlər görülüb. Ona görə bir daha cənab Prezidentə öz minnətdarlığımızı bildiririk.

Bir məktəbin uğurları

Təhsil önəmli sahələrdəndir. Təbii ki, əgər biz cəmiyyətdə normal insan, savadlı və əxlaqlı gənclər yetişdirmək istəyiriksə, ilk növbədə təhsilə diqqət yetirmək lazımdır. Təhsili olmayan millət və xalq heç vaxt azadlığa və işığa çıxa bilməz. Füzuli rayonundakı 5 nömrəli tam orta məktəb də belə nümunəvi təhsil ocaqlarından sayılır. Məktəbin direktoru Səbinə Məmmədova 2008-ci ildən bu kollektivə rəhbərlik edir. O, Yeni Azərbaycan Partiyasının üzvüdür və Azərbaycan Pedaqoji Universitetinin kimya-biologiya fakültəsini bitirib. Bu vəzifəyə gələnə qədər digər məktəblərdə müəllim və direktor müavini vəzifələrində çalışıb. Həmişə də bacarığı və təşkilatçılığı ilə digərlərindən seçilib. O, 5 nömrəlli tam orta məktəbə direktor təyin edildikdən sonra kollektivdə çox böyük uğurlara imza atıb. Ən azından ona görə ki, bu məktəb bir neçə bilik yarışmasında iştirak edərək 1-ci yerə layiq görülüb.

Çətinliklər arxada qalıb

Bu gün 5 nömrəli tam orta məktəbdə 201 nəfər şagird təhsil alır və onların təlim-tərbiyəsi ilə 36 müəllim məşğuldur. İlk növbədə məktəbdə müasir texnika və texnologiyanın yeniliklərindən istifadə edilməyə səy göstərilir. Elə bunun nəticəsidir ki, məktəbdə yaradıcı və elmi tədqiqat işlərinə böyük maraq yaranıb. Hətta bu təhsil ocağında "Kiçik Akademiya" Könüllü Birlik fəaliyyət göstərir. Təsadüfi deyil ki, məktəbin 6-cı sinif şagirdi Ceyhun Xəlilov 2013-2014-cü il tədris ili üzrə "İlin şagirdi" adına layiq görülüb. Bununla yanaşı, məktəbdə Respublika Təhsil Nazirliyi, Respublika Ekoloji Tərbiyə və Təcrübəçilik Mərkəzi tərəfindən keçirilən "Müharibə və ətraf mühit" yarışmasında şagirdlərdən Röya İsmayılova, Aytac Məmmədova, Günel Hacızadə 1-ci yerə çıxıblar. Bununla yanaşı, Respublika Təhsil Nazirliyi və Azərbaycan Neft Şirkətinin birgə təşkilatçılığı və respublka məktəbliləri arasında keçirilən ekoloji "Breyn-rinq", "Ekoerudit" intellektual bilik yarışmasında məktəb 1-ci yerə layiq görülüb.

Nailiyyətlər davam edir

Onu da qeyd edək ki, məktəbdə xüsusi qabiliyyətli və intellekti yüksək olan 21 şagird var. Və bu şagirdlər istedadları və savadları ilə həmişə fərqlənirlər. Belələrinə nümunə olaraq Çiçək Məmmədli, Murad Məmmədli, Günel Hacızadə, Cavad İdrisli, Etibar Bəşirov, Aytəkin Əliyeva və Vüsal Nərimanov nümunə göstərilə bilər. Onu da xatırladaq ki, məktəbin şagirdləri "Meşələri qoruyaq" mövzusunda da 1-ci yerə çıxıblar. "Təmiz dünya" rəsm müsabiqəsində isə 11-ci sinif şagirdi Fəridə Hacızadə müsabiqənin qalibi olub. Ötən il məktəbi bitirən 20 məzundan 12-si ali məktəb tələbəsi adını qazanıb. Onlardan biri - Elməddin Xudiyev 637 bal toplayaraq Azərbaycan Tibb Universitetinə qəbul olub. Digər bir şagird Elnarə Vəliyeva isə 545 balla Azərbaycan İqtisadiyyat Universitetinin tələbəsi adını əldə edib. Əlbəttə, bütün bunları qazanmaq o qədər də asan olmayıb. Çünki əgər müəllimlər şagirdlərə düz yol göstərməsəydi və onların üzərində əziyyət çəkməsəydi o uğurlar da çətin ki, əldə oluna bilərdi.

Açılan səhər

Məktəbin direktoru Səbinə Məmmədova deyir ki, hər səhər açılanda sevinirik ki, məktəbə gedəcəyik, şagirdlərimizlə ünsiyyətdə olacağıq və onlara bildiklərimizi öyrədəcəyik. Məgər bundan gözəl nə ola bilər? Əgər bir məktəbdə ki, 32 nəfər əlaçı var, deməli, burda həqiqətən müəllimlərimiz öz ürəklərini şagirdlərin yolunda şam kimi əritməyə can atırlar. Müəllim görəndə ki, şagird onu başa düşür, öyrətdiklərini gəlib sabah danışır, bax, onda onun uçmağa qanadı olmur. Çünki çəkdiyi zəhmət öz bəhrəsini verir. Mən bir direktor olaraq qürur hissi keçirirəm ki, sabahın insanları olan bu şagirdləri biz həyata normal qaydada hazırlaya bilirik.

Bu yaxınlarda məktəbimizdə bir neçə möhtəşəm tədbirlər keçirilib. Bu tədbirlər sırasında İlyas Əfəndiyevin "Xurşudbanu Natəvan" əsərinin müzakirəsi, "Narkomaniyaya yox deyək" tədbirində şagirdlərimizin qeyri-adi çıxışları, 20 Yanvar faciəsinin 25 illiyi ilə bağlı keçirilən ədəbi-bədii kompozisiyada şagirdlərimizin gözəl çıxışları və şeir ifa eləmələri bir daha göstərir ki, biz onları əsl vətənpərvərlik ruhunda tərbiyə eləmişik və onları cəmiyyətə intellektli, düşüncəli, məntiqli gənclər kimi verə biləcəyik.

Faiq QİSMƏTOĞLU

Ədalət.-2015.-29 yanvar.-S.7.