“Milli Məclis regional siyasətdə çox mühüm rol oynayır"

Cavanşir Feyziyev: “Müvafiq iş planım var və gündəlik fəaliyyətimdə də bu vəzifələrin öhdəsindən gəlməyə çalışıram”

Milli Məclisin deputatı, "Avromed" MMC-nin təsisçisi Cavanşir Feyziyevin Adalet.az-a müsahibəsi

-Cavanşir müəllim, seçkidə növbəti dəfə qələbə qazanaraq mandat əldə etdiniz. Qarşıdakı müddət ərzində hansı işlərin görülməsi sizin üçün prioritetdir?

-Son seçkilərdə Şəki seçiciləri növbəti dəfə etimad göstərərək məni Milli Məclisə deputat seçdilər. Buna görə seçicilərimə minnətdarlığımı bildirirəm və qarşıdakı illər ərzində mən onların etimadını doğrultmağa, öz fəaliyyətimi seçicilərimin arzu və təklifləri əsasında həyata keçirməyə çalışacağam.

-Deputatın əsas missiyası mandatı qazandığı seçicilərin problemlərinin həllidir. Maraqlıdır Cavanşir Feyziyevin seçicilərinin nə kimi problemləri var və bunların həlli üçün hansı addımlar atılır?

-Bəli, doğrudan da deputat seçildiyi ərazidə yaşayan vətəndaşların, yəni seçicilərin ölkənin ali qanunvericilik orqanında təmsilçisidir. Deputatın fəaliyyət dairəsini mən üç səviyyədə görürəm. Yerli səviyyədə, ölkə səviyyəsində və beynəlxalq səviyyədə. Yerli səviyyədə fəaliyyət seçicilərin Azərbaycan qanunlarına uyğun hüquqlarının təmin olunması və onların rifah halının yüksəldilmıəsi üçün icra orqanları qarşısında təşəbbüslər qaldırmaq, seçiciləri narahat edən bütün problemlərin müvafiq icra strukturları ilə müzakirə olunaraq həll olunmasına nail olmaqdan ibarətdir. Ölkə səviyyəsində fəaliyyət Milli Məclisdə həyata keçirilən qanun yaradıcılığında fəal iştirak etmək, qanunvericilik təşəbbüsləri ilə çıxış etmək və bütövlükdə ölkə vətəndaşlarının həyat və fəaliyyətini tənzimləyən qanunların qəbul olunmasına töhfə verməkdən ibarətdir. Beynəlxalq səviyyədə fəaliyyət dünyanın bütün parlamentlərində və ya beynəlxalq tədbirlərdə ölkəmizi, onun ali qanunvericilik orqanı olan Milli Məclisi milli maraqlarımıza uyğun layiqincə təmsil etməkdən ibarətdir. Hər üç istiqamətdə fəaliyyətimi həyata keçirmək üçün müvafiq iş planım var və gündəlik fəaliyyətimdə də bu vəzifələrin öhdəsindən gəlməyə çalışıram.

-Milli Məclisdə Beynəlxalq münasibətlər və parlamentlərarası əlaqələr komitəsinin üzvüsünüz. Komitənin fəaliyyəti barəsində nə deyə bilərsiniz?

-Üzvü olduğum Beynəlxalq münasibətlər və parlamentlərarası əlaqələr komitəsi Milli Məclisin ən böyük, ən fəal komitəsidir və komitə kifayət qədər geniş müstəvidə işlər aparır. Bu Komitənin üzvü kimi mən Azərbaycan-Böyük Britaniya parlamentlərarası işçi qrupun rəhbəri, İsveçrə, Fransa, Macarıstan, Yaponiya parlamentlərarası işçi qrupların üzvüyəm. Milli Məclisin beynəlxalq əlaqələri və digər ölkələrin parlamentləri ilə qarşılıqlı fəaliyyəti məhz bu komitə tərəfindən həyata keçirilir. Azərbaycan Respublikasının xarici siyasətinin tənzimlənməsi ilə bağlı qanunların, dövlətlərarası beynəlxalq Müqavilələrin ratifikasiyası da bu komitədə müzakirə olunaraq Milli Məclisin müzakirəsinə təqdim olunur. Son çağırış Milli Məclisdə komitələrin sayı artırılıb və indi hər bir deputat eyni zamanda iki komitənin üzvü ola bilər və mən hal-hazırda həm də Mədəniyyət komitəsinin üzvü seçilmişəm və bu Komitənin işində də öz fəaliyyətimi həyata keçirirəm.

-Azərbaycan Milli Məclisinin regionda yeri və rolu barəsində nə deyə bilərsiniz?

-Azərbaycan Milli Məclisinin regionda yeri və rolu Azərbaycan dövlətinin regionda rolu və yeri ilə mütənasiblik təşkil edir. Azərbaycan siyasi, iqtisadi, sosial və s. baxımdan regionun ən qüdrətli dövlətidir və müvafiq olaraq Azərbaycan Milli Məclisi də regional siyasətə, regionun iqtisadi inkişafına təsir baxımından çox mühüm rol oynayır.

-Adətən Millət vəkilləri ilə İcra Hakimiyyətləri və ya bir sıra məmurlar arasında müəyyən soyuqluq olur. Sizdə bu sarıdan nə kimi problemlər var?

-Bizim halda belə deyil. Seçki dairəsi ərazisində vətəndaşlar tərəfindən qaldırılan bütün məsələləri müvafiq olaraq yerli və ya mərkəzi icra orqanları qarşısında qaldırıram və onların həllinə çalışıram. Həll olunan məsələlər də olur, olunmayan da, amma bu hər hansı problem yaratmır. Problemin olub-olmaması icra və qanunverici orqanlar arasında birgə iş ahəngdarlığının mövcud olub-olmamasından asılıdır. Mənə elə gəlir ki, bizim halda bu ahəngdarlığı müşahidə etmək mümkündür.

-115 saylı Şəki kənd ikinci seçki dairəsindən millət vəkili seçilmisiniz. Şəki ipəkbaramaçılığı ciddi problemlər içindədir. Bu sahənin inkişafı ilə bağlı nə kimi təklifləriniz var?

-Şəkidə ipəkçiliyin tarixi inkişaf mərhələləri olub. Hal-hazırda Şəkidə ipəkçilik bir az yumşaq desək, özünün durğunluq dövrünü yaşayır. Bu da ölkəmiz öz müstəqilliyini bərpa etdikdən sonra bu böyük istehsalat müəssisəsinin yeni iqtisadi şəraitə uyğun perspektiv inkişaf planının olmamasından irəli gəlib. Hal-hazırda Şəki İpək ASC-nin yeni rəhbərliyi daha çox iş yerlərinin açılması ilə bağlı yeni biznes-planın hazırlanması ilə məşğuldur. Çox güman ki, yaxın zamanlarda Şəki İpək ASC-nin fəaliyyətində müsbət dəyişikliklərin şahidi olacağıq.

-Son zamanlar ölkədə dərman istehsalında yerli müəssisələrin yaradılması istiqamətində iş aparılır. Bu kimi müəssisələrin fəaliyyətə başlaması bazar münasibətlərinə nə kimi təsir göstərə bilər?

-Bizim ölkəmizdə hələ sovet dönəmindən dərman preparatlarının istehsalı prioritet sayılmayıb. Həmin dövrdə mərkəzləşdirilmiş iqtisadiyyat rejimində yaşadığımızdan bunun elə də böyük təsiri yox idi. Lakin indi, müstəqillik dövründə hökumətimizin qarşısında Azərbaycanın özünü həyat üçün zəruri olan əmtəə növləri ilə, o cümlədən, ən zəruri dərman preparatları ilə təmin edə bilməsi vəzifəsi durur. Bu hökumətin fəaliyyətində strateji istiqamətlərindən biridir və mətbuatdan da məlumdur ki, bir sıra ölkələrin hökumətləri və biznes dairələri ilə bu barədə danışıqlar aparılmaqdadır. Yəqin ki, yaxın illərdə biz əczaçılıq sahəsində yerli istehsal müəssisələrinin açılmasının şahidi olacağıq. Bu həm yeni iş yerlərinin açılması, həm də ölkəmizin xarici bazarlardan asılılığının azaldılması baxımından olduqca əhəmiyyətli bir hadisə olacaq.

- Azərbaycana idxal ediləndərman vasitələrinin ƏDV-dən azad edilməsi təklif olunur. Siz bu məsələyə necə baxırsınız. Bu mümkündürmü?

-Məlum olduğu kimi, keçən ilin sonunda həyata keçirilmiş devalvasiyadan sonra sahibkarlığın inkişafını stimullaşdırmaq məqsədilə cənab prezident tərəfindən bir sıra mühüm sərəncamlar verilmiş və fərmanlar imzalanmışdır. Bütün bu qərarlar iqtisadi fəallığın artırılmasına və son nəticədə neft gəlirlərinin azaldığı bir şəraitdə əhalinin həyat səviyyəsinin yüksəldilməsinə yönəlmiş tədbirlərdəndir. Bu kimi tədbirlərin sırasında ölkəyə idxal olunan dərman preparatlarının satışından ƏDV ödənişinin aradan qaldırılması təklifi də vaxtaşırı mətbuatda və müvafiq icra qurumlarında müzakirə olunmaqdadır. Bir sıra ölkələrdə dərman preparatlarının satışı ƏDV-yə cəlb olunmur, yəni belə bir presedent mövcuddur. Yəqin ki, bu müzakirələrdən sonra bizim ölkəmizdə də bunun hansı dərəcədə məqsədəuyğun olub-olmaması haqqında müvafiq qərar qəbul olunacaq.

Ədil Ədilzadə

Ədalət.-2016.-13 aprel.-S.2.