Xalq şairi Söhrab Tahirin 90 illik yubileyi qeyd olundu

Martın 28-də Azərbaycan Yazıçılar Birliyində (AYB) xalq şairi Söhrab Tahirin 90 illik yubileyinə həsr edilmiş tədbir keçirildi. Adalet.az xəbər verir ki, Söhrab Tahirin qələm dostları, yaxınları, mətbuat nümayəndələrinin iştirak etdiyi tədbiri xalq şairi Sabir Rüstəmxanlı açaraq səhhəti ilə əlaqədar yubiley mərasiminə qatıla bilməyən Söhrab Tahirə can sağlığı arzuladı, onun salamlarını tədbir iştirakçılarına çatdırdı. Söhrab Tahirin yaradıcılığından danışan Sabir Rüstəmxanlı onun 19 romanın, cildlərlə şeir kitablarının olduğunu bildirdi. Eyni zamanda, yaxın günlərdı çap olunan 70 min misradan çox "Ata” poemasını da diqqətə çatdırdı: "Söhrab Tahir həqiqətən də böyük şairdir. Araz dərdini, bölünmüş Azərbaycan ağrısını sözlə ovudan, tarixi hadisələri dəqiqliklə, böyük məharətlə yazan qələm sahibidir. O, Pablo Neruda, Əziz Nesin kimi XX əsr dahiləri ilə bir sırada duracaq ədibdir. Amma təəssüflər olsun ki, xalqımız digər millətlər kimi fəal deyil, ona görə də Söhrab Tahir dünyada layiqli yerini tuta bilməyib”.

Daha sonra AYB sədri, xalq yazıçısı Anar çıxış edərək bildirdi ki, həyati məşəqqətlər çəkərək 90 il yaşamağın özü böyük qəhrəmanlıqdır. Söhrab Tahirin böyük romanlarla yanaşı, kiçik misraları da hikmətli kəlamlar kimi xalqımızın yaddaşında özünə yer edib. "İkiyə bölünməkdən elə qorxmuşam, çöpü də ikiyə bölə bilmirəm” misrası bölünmüş Azərbaycan dərdinin bu böyük insanda necə dərin iz qoyduğuna nümunədir.

Xalq yazıçısı rəhbərlik etdiyi qurumun adından hədiyyəni Söhrab Tahirin oğluna təqdim etdi.

Xalq şairi Nəriman Həsənzadə Söhrab Tahirin bütöv bir dünya, epoxa olduğunu vurğuladı. Onun böyük qələm sahibi olmaqla yanaşı, həm də böyük şəxsiyyət olduğunu dedi. Çəkdiyi əziyyətlərə baxmayaraq, həmişə nikbinliyini, yumor hissini saxladığını bildirdi. Onun azərbaycanlı siyasi fəal seyid Cəfər Pişəvərinin yanında çalışdığını, Bakıda müxtəlif vəzifələr tutduğunu diqqətə çatdırdı.

AYB-nin Güney Azərbaycan bölməsinin rəhbəri Sayman Aruz Söhrab Tahiri mənəvi atası kimi dəyərləndirdi. Onun cənubi azərbaycanlılara yaşamaq, var olmaq uğrunda mübarizə apardığını öyrətdiyini bildirdi: "Onun bütün əsərləri şəxsi müşahidələri əsasında yaradılıb. Söhrab Tahir əsl söz fədaisidir. Azərbaycanı birləşdirən qələm simvoludur”.

Tədbirə qatılmış dünya şöhrətli azərbaycanlı Yaqub Zurufçu yaxın zamanlarda Söhrab Tahirin şeirlərinə həsr olunmuş mahnılardan ibarət disk çıxaracağını diqqətə çatdırdı. Və o mahnılardan birini – xalq şairinin məşhur şeirinə yazdığı mahnıdan bir hissəni canlı olaraq zümzümə etdi. Həmçinin, şairin şeirlərindən biri "Təzadlar” qəzetinin əməkdaşı Elçin Məmmədli tərəfindən səsləndirildi.

Tədbirdə xalq şairi Fikrət Qoca, tanınmış şərqşünas Vasim Məmmədəliyev, Dünya Azərbaycanlıları Mədəniyyət Mərkəzinin vitse-prezidenti Rasim Məmmədov və başqaları Söhrab Tahirin yaradıcılığı, şəxsiyyəti haqqında yüksək sözlər deyərək, şairlə səfərlər boyu rastlaşdıqları maraqlı əhvalatları, duzlu-məzəli xatirələri bölüşdülər.

Şəfiqə ŞƏFA

Ədalət.-2016.-29 mart.-S.4.