"AZƏRBAYCAN"

Artıq sentyabr ayı arxada qaldı. Amma mənim üçün və düşünürəm ki, AYB-nin ədəbi-bədii jurnalının oxucuları üçün də bu ay hələ başa çatmayıb. Çünki jurnalın sentyabr sayı, yəni 9-cu nömrəsi elə sentyabrın 3-cü ongünlüyündə oxuculara təqdim olundu. Təbii ki, həmişə maraqla gözlədiyim və hər sayında da rəngarəngliklə qarşılaşdığım "Azərbaycan"ın 9-cu nömrəsində də çox maraqlı poeziya və nəsr nümunələri ilə qarşılaşdım.

Öncədən onu deyim ki, jurnalın üz qabığında edilmiş dəyişikliklər mənim üçün çox maraqlıdı. Çünki üz qabığına çıxarılmış müəlliflərin adları və onların əsərlərinin adları dərhal ilk təəssüratı yaradır. Oxucu nəyi oxuyacağını əvvəlcədən təxmin edir. Bu məlumat xarakterli təqdimatı nəzərdən keçirib. Mən də jurnalı vərəqləməmişdən öncə deyə bilərəm ki, 9-cu sayda Azərbaycan poeziyasında öz dəsti-xətti, öz yeri olan sevilən şairimiz Vaqif Bəhmənlinin, eləcə də gənc şair Fərid Hüseyinin, həmçinin dəyərli nasirimiz, bir-birindən maraqlı romanlar müəllifi Elçin Hüseynbəylinin "Yenə iki od arasında" romanını oxuya bilərlər. O ki, qaldı bütövlükdə jurnala...g

Bəli, "Azərbaycan"ın 9-cu sayında yaradıcı kollektiv, başda jurnalın baş redaktoru İntiqam Qasımzadə, baş redaktor müavini Südabə Ağabalayeva və məsul katib Tofiq Mahmudov olmaqla maraqlı bir ədəbi söz çələngi ortaya qoyublar. Fikirlərimin əvvəlində söylədiyim kimi jurnal Vaqif Bəhmənlinin son iki ildə qələmə aldığı yeni şeirləri ilə başlayıb. Həmişə həssas, səmimi duyğular qələmə alan və bunu oxucu yaddaşına rahatlıqla həkk edən Vaqif Bəhmənli yazır:

Gerim o, irəlim o,

bir yaxam, bir əlim, o,

Çıxmır həyat sevgisi

gecə-güngüz başımdan.

Gözü yaşaranın, o,

həm də ki, məzəli o,

Mən həyatı sevirəm

çolma-çocuq yaşında.

Şairin bu təbii həyat sevgisi əslində bizim hamımızın yaşadıqlarımızın poetik təqdimatıdı. Poeziyasevərlər Vaqif Bəhmənlinin bir-birindən maraqlı şeirlərinin ardınca Fərid Hüseynin şeirlərinin özünəməxsus mənzərəsi ilə qarşılaşacaqlar. Bu şəxsən mənə bir az rəngarəng, yəni həyatın müxtəlif cizgilərini, görüntülərini ifadə edən söz çələngi kimi təsir bağışladı. Mən bu şeirlərin təkcə yazı üslubunu deyil, həm də onun oxucuya, yəni mənə etdiyi təsiri də aydın şəkildə duyub yaşadım. Məsələn:

Daşürəkli xoşbəxtlik

keçmişdə qalandan

mən heç kəsdən

saat soruşmuram -

"Üç il əvvəl bu gün",

"Beş il öncə bu vaxtlar"la

Bilirəm saatıg

Bizim dövrdə,

xoşbəxtlik ancaq

partlamayan saatlı

bombalardakı vaxtdı.

Oxucular bu sayda Sabir Yusifoğlunun, Tahir Taizoğlunun, Nofəl Ümidin, Aftandil Ağababanın, Dəyanət Osmanlının və İsmayıl İmanzadənin də şeirlərini oxuya bilərlər. Yaradıcılıqlarına yaxından bələd olduğum Dəyanət Osmanlı və İsmayıl İmanzadənin yeni şeirlərində oxucular onların həm də söz meydanındakı uğurlarının şahidi olacaqlar. Məsələn, Dəyanət yazır:

Küləyi görəndə əsmək,

Uşağı görəndə uçmaq,

Gəmini görəndə üzmək

Boylu buludların arasıyla,

Bulud sualarının içiylə

Anidən qeybə qarışmaq...

- bax bunlar azadlığın hakim olduğu yerdə hər kəsin içindən keçən duyğuların bir hisəsidir.

İsmayıl İmanzadə isə vurğulayır ki:

Sevgisi qəlb coşduran,

Gəlini, qızı çaşdıran

Baxışı göz qamaşdıran -

Yetənə vurulan şair.

Jurnalın nəsr bölümündə Elçin Hüseynbəyli ilə yanaşı, Kamran Nəzirlinin və Aydın Talıbzadənin hekayələri, yazıçılar haqqında xatirələr qeydə alan Məzahir Süleymanzadənin, Qarabağ müharibəsi ilə bağlı fikirlərini sözə çevirən Vahid Məhərrəmovun, həmçinin filologiya elmləri doktoru Vaqif Yusiflinin xalq şairi Qabilin 90 illiyi ilə bağlı qeydləri və digər materiallar jurnalda oxuculara təqdim olunur.

Düşünürəm ki, jurnalın bu sayındakı tərcümə olunmuş və artıq son hissəsi çap olunan "Və bircə kəlmə də demədi" romanı da öz oxucularını sevindirəcək.

Son olaraq onu da xatırladım ki, jurnalın bu sayı da sözün xridarı olanlar tərəfindən yenə maraqla qarşılanacaq.

Ədalət.-2016.-7 oktyabr.-S.3.