Ürəyimi asmışam bir yarımçıq misradan

Saqif

***

Dünən dəfn eləmişəm bir sevgini içimdə,

İndi məzarı üstdən ağlamaqdan gəlirəm.

Ürəyimi qoymuşdum gül əvəzi, darıxmış,

Səhər qaçıb yanına yoxlamaqdan gəlirəm.

Daha gəlib axtarma məni, mən də ölmüşəm,

Çox aradım, tapmadım... gördüm səndə ölmüşəm.

Xəbərim yoxmuş, səni sevən gündən ölmüşəm,

Öz əlimlə gözümü bağlamaqdan gəlirəm.

Kim görsə, donar qanı, yox, belə zülm olmaz,

Mənim kimi ölənə bir daha ölüm olmaz.

Öz başıma tökməyə bir ovuc külüm olmaz...

Qaysaq tutan yaramı dağlamaqdan gəlirəm.

Kəndirimi kəsmişəm, qalsın divin yanında,

Sən də asıl saçından bir az sevin yanında...

Dayanıb sən yıxdığın tənha evin yanında

Nişan alıb könlümü oxlamaqdan gəlirəm.

Nə gələn var, nə gedən... vaxt bir qamış tütəkdi,

Ömrüm-günüm yalanmış, xatirələr gerçəkdi,

Bir kitabın içində unutduğum çiçəkdi...

Onu basıb bağrıma qoxlamaqdan gəlirəm.

***

Mən sənin bir yay günü keçib getdiyin şəhər,

Heç özün də bilmədən ayaqüstü dayandıng

Xəbərin yoxdu bəlkə min ildi yuxudaydın,

Bu da qismətdi belə, məni görüb oyandın.

Nə vaxtdı susamışdın bir sevgidən ötəri,

Elə onu gəzirdin dirilik suyu kimi.

Bir gecənin içində çıxmışdı qanadların,

Ömrün son nəğməsini oxuyan bir qu kimi.

Bir saatlıq düşmüşdün bir ömrün qatarından,

Bir qəfil qonaq idin bir nakam məhəbbətə.

Bəlkə də bütün yollar ayrılıqdan başlayır,

Bəlkə də bütün yolar gedir üzü həsrətə...

Bu qəfil görüş nəydi?!

Belə də qismət olar?!

Əllərimin içində buza döndü əllərin.

Sən getdin... onda bildim, heyf, ömür bir andı,

Bir ömür səyriyəcək səndən ötrü gözlərim.

Mən çoxdan unutmuşam sevinməyin dadını,

Nə vaxtdı göz yaşımı qurudub duz yığıram.

Bir səhra qəribsəyir hər gün məndən ötəri,

Mən hər gecə gizlicə öz içimə yağıram...

***

Sınadım, sınıq çıxdı, çox heyf "can" deyənlər,

Eh... ürək qızdırmağa bir adam da qalmadı.

Neyləsin bu qürbətdə bəs indi pərvanələr,

Başına dolanmağa bircə şam da qalmadı.

Bitdi kəpənək ömrü arzumun, həvəsimin,

Gizlicə dəfn elədim ürəyimin başında.

Əllərimi gül kimi qoydum üstünə hərdən,

Bəlkə bir gün göyərdi-gözlərimin yaşından...

Sonra yığdım tozunu, xatirətək saxladım,

Misra-misra dirildi barmağımın ucunda.

Ürəyim puçurladı hər gələn yaza doğru,

Hər gecə su içdikcə ayrılığın ovcundan.

Elə sındı içimdə şüşə-şüşə ümidlər,

Qırıq-qırıq nəğməsi heç dodağa çatmadı.

Nə vaxtdı başlamışam şeir-şeir ölməyə,

Bəlkə elə söz ömrüm son varağa çatmadı.

***

Gör necə həvəsin var ürəyimi üzməyə,

Yoxsa ləzzət alırsan çəkdiyim hər əzabdan.

O qədər sabah var ki! Gələ, ya da gəlməyə,

Söz verirəm unudum daha səni sabahdan.

Ünvanını unutmuş bir uşaqdı əllərim,

Elə təzə qoymuşdum ürəyimin üstünə.

Sən gedəndən ömrümə əsir payız yelləri,

Bir ürəkdi mənimki... o da durub qəsdimə.

Dərd deməyə nə bir kəs, nə də elə üzüm var;

Gizlicə gümüldənib pıçıldayım özümə.

İstədim qoyub gözə həsrətini azıdım,

Ha qaçdım, kölgəm kimi düşüb gəldi izimə.

Çox görüşmək istədik...heyf, qismət olmadı,

Eh... bizim sevincimiz keçib getdi bu yazdan.

Biz bir olana kimi gör bir nələr olmadı...

Yüz özünə uşaqtək gəmi düzəlt kağızdan.

Ha arzula, ha istə, geriyə dönmək olmur,

Mən çoxdan axıtmışam heyf ki suya ömrü.

Gün doğan pəncərədi başlayan hər təzə gün,

Bəlkə baxdım, verməsəm qəfil yuxuya ömrü...

***

Onsuz bu yer üzündə yerim elə dardı kig

İçimdə eşq var deyə yerə-göyə sığmıram.

Göz yaşımı səpirəm sevdamın yollarına,

Sonra utandığımdan birini də yığmıram.

Hələ ki ikimizik, bir kimsə yox bu yolda,

Bəxtimiz gətiribdi, deyəsən gəlhagəldi.

Başımız qarışıbdı bir səsin harayına,

Yoldaş gözəl olanda yol getmək də gözəldi.

Adəmin unutduğu ilk sözdən doğulmuşuq,

Sən yalın əl olandan - mən də yanar bir közəm.

Göydəki ildırımlar ruhumuzun rəqsidi,

Sən bir az könülsüzsən, mən bir az ürəksizəmg

Günahı çiynimizə aşırıb da gedirik,

Mərhəməti böyükdü, Tanrı bir gün bağışlarg

Ömür-gün səhrasında su gəzən divanəyik,

Əlini tut altınag bax, başladı yağışlarg

***

Ürəyimi asmışam

bir yarımçıq misradan.

Hönkürüb ağlasam da

görməz məni bir adam...

Sən də baxdın, görmədin,

içimdəki buludu.

Bir ümid saxlamışdım,

heyf... göz yaşım yudu.

Şükür, danışdıq bir az,

bəlkə sonuncu dəfə...

Sözün güllədən betər,

Dayanma, sıx hədəfə!

Bəlkə də vaxtdı elə,

saxlama yoldan məni.

Durma, bitir bu şeri,

qoy sonuncu nöqtəni...

Ədalət.-2017.-16 dekabr.-S.16.