"Hər günümdə bir damla yaş kirpikdə üzərlik..."

Əbülfət MƏDƏTOĞLU

Hər günümdə bir damla

Yaş kirpikdə üzərlik...

Gözlərimdə qorunur -

Yar, səndəki gözəllik!..

Qarşımda dayanmağın

Xoşbəxtliyi ölçüsüz...

Könlümdəki arzunu -

Qoy mən deyim elçisiz!..

Sarıl mənə, sən elə

Sarıl ki, biz tam olaq...

İkimiz bir doğulmuş -

Bütöv bir adam olaq!..

lll

Bəxtim gətirmədi

bilirsən niyə?

Öncə

səsini eşitməyə,

sonra

üzünü görməyə,

gözünü öpməyə

gecikdim...

amma

bil ki,

səsini,

üzünü,

gözünü -

bütövlükdə özünü

öncə görə bilsəydim

nə vardı indi

sevə-sevə ölməyə?!

lll

Pərvanə tək dolandım,

Görmədin amma məni...

Varlığımı qəbul et -

Sən Allah, danma məni!

Titrəyir ruhun simi

Üst-üstədi dərd çimi!

Axan bir ulduz kimi -

Heç zaman anma məni!..

Kərpic düşmüş sarayam

Səsəm, ünəm, harayam..

Yarımçığam, parayam -

İnsaf et, tamla məni!

lll

Tanrıdan istədiyim

Dinclikdi ürəyinə!

Bu dinclik sevgi qatsın -

Duzuna, çörəyinə...

Tanrıdan istədiyim

Təbəssümdü gözünə...

Bizim olan dünyanı -

Sən cənnət bil, özünə!

Tanrıdan istədiyim

Xəyalında olandı...

Bu istəklə sən məni -

Yar, başına dolandır!

lll

Səni görməyəndə səbrim daralır

Səni görəndə də havalanıram...

Səni görməyəndə ömrüm qaralır-

Mən səni özümə hava sanıram!..

İşıqsan, atəşsən, bir az da mehsən

İşıqda, atəşdə, mehdə yanıram...

Dan üzü ruhumu oxşayan şehsən -

Sənə İlahi tək mən inanıram!..

Sevincsən, kədərsən, vüsalsan, qəmsən

Yağışsan, dolusan, boransan, qarsan...

Sən də mənim kimi kirpiyi nəmsən -

Şükür ki, tək mənə həyatsan, yarsan!

Dünyam varlığında, sənsə dünyada

Pərvanə doğuldun sevginə sənin!

Bir fikri salıram mən hər gün yada -

Ürəyim tapıbdı səndə Vətənin!

lll

Mən danışım, sən mürgülə

Qollarımın üstü yerin...

Ürəyim kövrək sevginə -

Kaş olsun ən isti yerin!

Bil, məndəki bir umuddu

Gözlərim dolu buluddu...

Gözün gözümü unutdu-

Öz-özündən küsdü yerin...

Xəyal qurdum - baxam səndə

Şimşək kimi çaxam səndə...

Ürəyim, həm yaxam səndə -

Deməli, ən pisdi yerin!

lll

Mən bitmiş, tükənmiş adam

Göyə də, yerə də yadam...

Sənə də çatmayan sədam -

Qoy ölsün, içimdə mənim!

Tapındım sənə son din tək

Qapını döydüm, səs-ün tək...

Dolandım başına gün tək -

Əridi gücüm də mənim...

Uzaq yox, yaxın olacaq

Mənsiz gün "ah"ın olacaq...

Bir az günahın olacaq -

Bu vaxtsız köçümdə mənim!

lll

Daha kimsə arzu etmir

Yordum mən, hamını yordum...

Dərd də boğazımdan getmir -

Sordum mən, tamını sordum...

Nə varsa bəxtin özündə

İstədim yanam közümdə...

Sevdiyim qızın gözündə -

Mən sönən şamımı gördüm...

Bu ömrü axşam, ya səhər

Sona çatdırın bir təhər...

Sinəmdəki düyün, qəhər -

Vermədi, yamını gördüm!..

lll

Yorub salmışam əldən

Halı yoxdu səslənə...

Sevdiyi qucaq açmır

Girib orda bəslənə -

Ürəyim...

Qaranlıqda ulayan

Küləyin səsi kimi...

Özünə ağı deyir

Özünün kəsi kimi -

Ürəyim...

O halsız halımda da

Yenə yönü sənədi...

Sevənlərin olmadı -

Sevdiyim bir dənədi -

Ürəyim!

lll

Mənim də günəşim olubdu yəqin

Mənim də ulduzum hardasa qalıb...

Bəxtimin açarın gətirən mələk -

Ulduzu itirib hardasa salıb...

Üzümdən-gözümdən tökülən kədər

Heç kimə xoş deyil bir damla qədər...

Demək, mən çəkirəm bu yükü hədər -

Ürək borcu kimi boynuma alıb...

Anlamaq çətindi, amma gərəkdi

Dizim yer şumladı, əlim vər əkdi...

Gözünün önündə ağ bir vərəqdi -

Yazarsan sən məni xəyala dalıb...

lll

Yenə qaçıb gəlmişəm

Xatirələr bağına...

Şehli bir sükut çöküb -

Çiçəklərin tağına...

Hər ləçəkdə göz yeri

Pıçıltılı söz yeri...

Ürəyimdə köz yeri -

Toxunmuram dağıla...

Dərvişəm mən həyatda...

Dərd üstdədi mən altda!

Aman Allah, mən adda -

Qar yağıbdı dağına...

Demirəm sən də dön, gəl,

Nə yol dəyiş, nə döndər...

İki qərənfil göndər -

Ömrümün bu çağına...

lll

Düşünürdüm şəklini

Sözlə çəkməyim daha...

Çəkdiyim hər şəkillə -

Batdığımçün günaha!..

Ruhumu oda salıb

Ağlımı başdan alıb...

Göz qırpımı yol qalıb -

Gülüm, artıq sabaha!..

Yumruq tək sıxılıram

İçimdən yıxılıram...

Bir sənə sığınıram -

İnan, bir də Allaha!..

lll

Ümid külündən özgə

Heç nə yoxdur içimdə...

O külü sovurmağa -

Daha çatmır gücüm də!

Biganəlik zirvəsi

Çəkib səni özünə...

Önündə dayansam da -

Dəymirəm ki gözünə!

Sanki yoxam, mən hətta

Əlinə bulaşmıram...

Şeh kimi kipriynə,

Telinə dolaşmıram...

Bu qədər buzlaşmanın

Zərəri var sənə də...

O soyuqluq damacaq -

Məzarımda mənə də!..

lll

Elə anım yoxdu ki,

O anda olmayasan...

İşıq kimi, nur kimi -

Ruhuma dolmayasan!..

Ürək axşam və səhər

Gözləyir hər gün xəbər...

Bəlkə ömrə bərabər -

Bir ümid yollayasan?!

Unut özgə fitnəsin

Vaxt ortada itməsin...

Mənim ömrüm bitməsin -

Sən isə solmayasan!..

lll

Hər bir ada yazılıb

Əl boyda - para kağız...

O da həm son məktubdu -

Həm də ki, Qara kağız!..

Orda vida notları

Orda ayrılıq yatır...

Qəribədir, son məktub -

Qara kağız tez çatır?!

Təlaşlanma, deyəsən

Qapı döyür poçtalyon...

İstəmirəm döyəsən -

Dizlərinə... bu da son...

lll

Tumurcuğu çırtlamış

Təzə dərdim, tər dərdim...

Mən səni şehli-şehli -

Təzə dərdim, tər dərdim!..

Sarıldın sən də mənə

Eşq vardı səndə mənə...

Titrəmə, səndələmə -

Sən də məni dər, dərdim!..

Qarışaq sirdaş olaq

Bir divar, bir daş olaq!..

Dərdlərə bir qaş olaq -

Sən üstündə zər, dərdim!..

lll

Bir təklifim var, ömrüm,

Gəl səssizcə dayanaq...

Ruhumuz nəfəs alsın -

Biz nəfəsə boyanaq...

Gözlərimiz dincəlsin

Kirpiklərimiz dinsin...

Bu qəribə söhbətdən -

Ürəyimiz isinsin...

Bir də bizdən xəbərsiz

Toxunsun bir-birinə...

Əlimiz ülfət qatsın -

Söhbətin bu yerinə...

Təklif könlüncədisə

Kirpikləri öpüşdür...

Ürəyində nə varsa -

Ürəyimlə bölüşdür...

lll

Heç nə yoxdu həyatda

Heç kim də olmayıbdı...

Mən adlı həyatında -

Köçkün də olmayıbdı!..

Yüyürən yıxılacaq

Yıxılıb sıxılacaq...

Mənim də sığınacaq -

Köşküm də olmayıbdı...

Düşün, nə də ki, yad et

Məni yuxu hesab et...

Bir ovuc torpaq at, get -

Eşqin də olmayıbdı...

lll

Üz-gözümdən qəriblik

Yuxu kimi tökülür...

Dan yeri də gözümün-

Lap dibindən sökülür...

Pəncərədən dənizə

Düşən işığa baxıb...

Qarışıram dənizə -

İşıqla birgə axıb...

İçimdəki dünyanı

Dalğalara çırpıram...

Qərq olan mən - Sahildə

bəs o kimdi çırpınan?!

lll

Saxlayanım beş əlli

Qədərdi, qədər mənim...

Ürəyimə təsəlli-

Kədərdi, kədər mənim...

Bulud tək çökməyin də

Göz yumub tökməyin də...

Dərdimi çəkməyin də-

Hədərdi, hədər mənim...

Hər gün artır göynəyim

Soruşmuram neyləyim?!

Haqqım yoxdu söyləyim-

Nə dərmə, nə dər! - mənim...

525-ci qəzet 2017.- 23 dekabr.- S.31.