Adlı, ünvanlı misralar

Xalqımızın sevilən şairlərindən biri olan Oqtay Rza öz yaradıcılığında fərqli bir cığır da açıb. O, ilk dəfə olaraq biz oxucular üçün adlı-ünvanlı rübailər, şeirlər yazıbdır. Həmin o rübailərin qəhrəmanlarının bir çoxunu mən də, siz də tanıyırsınız. Yeri gəlmişkən onu da xatırladım ki, ustad Oqtay Rza "Adlı, ünvanlı misralar" başlıqlı dörd cildlik kitabın da müəllifidir. Həmin o dörd cildin sonuncu - beşinci cildi də artıq oxucuların görüşünə gəlməyə hazırlaşır və ədəbiyyatımızda böyük Nizamidən sonra Oqtay Rza özünəməxsus bir "Xəmsə" qoyur ortalığa. Oqtay Rzanın "Xəmsə"si adlı, ünvanlıdı. Elə indi sizə təqdim etdiyim şeirləri kimi. Buyurun, oxuyun.

Əbülfət MƏDƏTOĞLU

Oqtay Rza

Mövlanə Rumi

Sözünün bəzəyi hikmət, gözəllik,

Dillər əzbəridir Mövlanə Rumi;

Arxada qalsa da səkkiz yüzillik,

Ölməyib, diridir Mövlanə Rumi!

İdraka dəryadan dərin deyir O,

"Gəl, gəl! Göz üstdədir yerin" deyir O -

Olduğun kimi də görün deyir O

Nə vaxtdan bəridir Mövlanə Rumi!

Doğmadır Konyaya, Təbrizə, Qarsa,

Türkə, yəhudiyə, ərəbə, farsa...

Tanrıya çox yaxın on dahi varsa,

Onların biridir Mövlanə Rumi!

"Eşqi də oyadıb" şeirin səsiylə,

Ruhsuza can verib pak nəfəsiylə;

Əlli min beytlik "Məsnəvi"siylə

Əbədi yol gedir Mövlanə Rumi!

Qədim müasiri bütün çağların

Uca zirvəsidir qoca dağların;

Haqqı, hürriyyəti sevən xalqların

Böyük şairidir Mövlanə Rumi!

Təbrikim

Alim-torpaqşünas Qərib Məmmədova

Ömrün nümunədir gənc nəsillərə,

Növrağın-xoş əməl, bayrağın-bilik;

Sorağın çatıb ən uzaq ellərə,

Xoş gəlib yeddinci, şanlı on illik!

Ey torpaq aşiqi, torpaq sərrafı!

Gör neçə qış, bahar geridə qalıb;

Kövrək duyğuların safı, şəffafı

Sənin də qəlbində yurd-məskən salıb.

Torpağa bağlılıq - köklərdən miras,

Halal mükafatın adın-sanındır,

Hər yeni xəritə, hər yeni atlas

Xalq üçün dəyərli ərməğanındır.

...Nağıl - unudulmaz uşaqlıq çağı,

Qürur - sınaqlarda aldığın "əla"!

Nəhəng Pedaqoji Təhsil Ocağı

Həmişə fəxr edir öz məzunuyla.

Fəsillər arxada, fəsillər öndə,

Şamilə oğulsan, Nicata baba.

Xəyalın - Arpaçay sahillərində,

Yolunu gözləyir qədim kənd, oba.

Çağırır Beyləqan, Siyəzən, Şəki,

Mil, Muğan, Qarabağ...ünvanlar min-min;

Keçmiş tələbəmə hamı deyir ki,

Ad günü mübarək akademikin!

Zaman karvanını hey sürüb gedir,

Həftə var-aya tən, Qərib müəllim!

Çox şey cəmiyyətdə dəyişməkdədir,

Sən daim özünsən, Qərib müəllim!

Mübarək

Dünya şöhrətli xalq artisti

Zeynəb Xanlarovaya

Zeynəb - səhnəmizin gözəl Leylisi,

Qışda da oxuyan bülbülümüzdür;

"Şüştər"in, "Segah"ın səsidir səsi,

Odu, atəşi - eşq, çələngi sözdür.

Ucalıq gətirib sənəti bizə,

Misilsiz sərvəti-ecazkar səda;

Bakıda doğulan müğənnimizə

Gül-çiçək verilib Amerikada!

Zeynəb ulduzudur nəğməli bürcün,

Dost, qardaş ellərdə ötməyi tarix;

Əsgər oğullarla görüşmək üçün

Ön cəbhə xəttinə getməyi tarix.

Müşfiq dühasından ilham alaraq,

Yolu Sayadlara salmağı xoşdur;

Kasıbın evində yandırıb çıraq,

Millət vəkili də olmağı xoşdur.

Onu dəfələrlə alqışlayıbdır

İstanbul, Buxarest, Tokio, London...

Ona xoş duyğular bağışlayıbdır

Şərqdə-Çin, Hindistan, Qərbdə-Paris, Bonn.

Gəlir teleqramı, gəlir təbriki

Onu sevənlərin, tanıyanların;

Vətənlə bərabər cahan deyir ki,

Ad günü mübarək Zeynəb Xanların!

Yunis Oğuza

Ey tarixi əsər yazan Yunus Oğuz,

Ədib şair, alim, ozan Yunus Oğuz!

Türkə yamaq böhtanları firçasıyla

Birdəfəlik silən, pozan Yunus Oğuz!

Əmir Teymur dərslərini öyrənərək,

Ağıllanır yolu azan, Yunus Oğuz.

Nadir şahın taleyindən söhbət açıb,

Təzə zəfər, uğur qazan, Yunus Oğuz!

Amalları gerçəkləşən ziyalımız,

Əməlləri - meyar, mizan Yunus Oğuz!

Səciyyələr növ-növ, əla, çətin, asan,

Yaşa, var ol, gözəl insan Yunus Oğuz!

Məmləkətin keçmişini vərəqləyib,

Ey tarixi əsər yazan Yunus Oğuz!

Nigar

Vətənin xeyirxah qızıdır Nigar,

Nurlu taleyindən razıdır Nigar;

Nigarın qeyrətli, hörmətli, həssas

Cüt oğlu-Tofiqi və Hüseyni var.

Onu da saf, təmiz ürək yaşadır,

Gözəl arzuları qoşa-qoşadır;

Kadr şöbəsinin rəhbəri idi,

İndi Həmkarların əməkdaşıdır.

Gəlir Badamdardan işə hər səhər,

Öpür qədəmini qocaman şəhər.

Nigar da istəyir, istəyir daim

Eşidək xoş xəbər, ancaq xoş xəbər!

Yıxılsın cəhalət, dava, şər, hədə...

Sevinsin qoca da, gənc də, körpə də.

Nigarın nüfuzu get-gedə artır

Bakıda, nəinki keçmiş APİ-də.

Bağlarda həm Nərgiz, həm lalə olsun,

Dağlarda çay, bulaq, şəlalə olsun.

Nigar ailəsini gərək böyüyüb,

Nəvə-nəticəli sülalə olsun!

İki Azər

Dinlə, böyük Azərbaycan!

Dinlə, əziz, doğma Vətən!

Ürək sözü deməliyəm

İki Azər haqqında mən.

İki kişi - iki Azər,

İkisi də canlı əsər.

Biri - baba, güclü yazar

Azər Turan,

Zaman-zaman yorulmadan

Hələ qələm çalasıdır;

Biri - nəvə, məsum çocuq.

Qoy söyləyim, ay dost, kimin

Unudulmaz İmamverdi müəllimin

Balasının balasının balasıdır.

...Xəyal quşum dönə-dönə

Uçub Kürün sahilinə,

Neftçalada müjdə yayır,

Qədim Muğan alqışlayır;

- Əhsən ata Camal bəyə,

Əhsən ana Cəmiləyə!

Baba artıq yarım əsri salıb yola,

Nəvə üçün yaş ölçülür günlə, ayla.

Azərbaycan kəlməsinin

Əvvəlində adları var:

Biri baba, biri nəvə,

Daim xoşbəxt yaşasınlar

Təbiəti duya-duya,

İnsanları sevə-sevə!

Ədalət.-2017.-8 fevral.-S.4.