Heç baxmır sözümə sözlərim bu gün

Təranə MƏMMƏD

Gözlərim

Neçə dərdə həmdəm olub,

Qəm selinə məskən olub,

Göydə buluddək nəm olub,

Gözlərim...

Gözəlliyə zövqlə baxıb,

Sevgidən şimşəktək çaxıb,

Bəlkə hərdən nazla axıb,

Gözlərim...

Qaranlıqda nur axtarıb,

Süzüb keçmişə aparıb,

Bəzən səbəbsiz yaşarıb,

Gözlərim...

Günahları, qəbahəti,

Nadanlığı, əsarəti,

Məhəbbətə xəyanəti,

Görməməkçün,

Ya bir cansız daş olmalı,

Ya əbədi yumulmalı,

Gözlərim...

O mənəm sənsiz

Tənha çinar fikrə gedib, düşünür,

Yarpaqları qəm donuna bürünür,

Dindirirsən, əlif qəddi bükülür.

Bəlkə o mənəm sənsiz?

Göy Xəzərin dalğaları kükrəyir,

Sevənlərə min bir nəğmə söyləyir,

Bir gözəl sahildə yarın gözləyir

Bəlkə o mənəm sənsiz?

Başı qarlı dağ dayanıb, danışmır,

Bir gözəldən üzü dönüb, barışmır,

İllər ötür, bu dağ düzə qarışmır.

Bəlkə o mənəm sənsiz?

Nə çinar, nə gözəl, nə dağam sənsiz,

Sevincdən, nəşədən uzağam sənsiz.

Yayın istisində qarlı bir qışam,

Şux bahar çağında sazağam sənsiz.

Bir səhər oyanıb xəyala dalsan,

Qoca yer üzündə tək-tənha qalsan,

Yadına yeganə bir kəsi salsan,

İnan ki, o mənəm, o mənəm sənsiz.

Sözüm alınmır

Yenə kağız küsüb, qələm quruyub,

İlham öz üzünü çevirib məndən.

Qafiyə qarışıb, vəzn uyuyub,

Ruhum ayrı düşüb sanki bədəndən.

Düzürəm sıraya ömrümü gün-gün,

Günün hər birinə bir misra düşür.

Heç baxmır sözümə sözlərim bu gün,

İşıqdan yazıram, qaranlıq düşür.

Bu nə xəyanətdir şerə, sənətə,

Dünən yazdıqlarım bu gün alınmır.

Qovuşa bilmirəm şux təbiətə,

Könül nəğmələrim daha çalınmır.

Dağlayır qəlbimi Vətən həsrəti,

Yanıb qovruluram, dərdim dağılmır.

Nə qədər gözləyim mən ədaləti?

Elə ha yazıram, sözüm alınmır...

Xəyalları yormayın

Keçmiş xəyallarda yaşayır ancaq,

Yolu o keçmişə tez-tez salmayın.

Onsuz da ötən gün qayıtmayacaq,

Xəyalları yormayın.

Hərdən gələcək də xəyala dönür,

Quş tək qanad açıb ora uçmayın.

Gələcək bir zaman özü gələcək,

Xəyalları yormayın.

Xəyallar - gələcək,

Xəyallar- keçmiş.

Xəyallar adlayıb zamanı keçmiş.

Xəyallar içində ximə qurmayın,

Xəyalları yormayın.

Havasızlıq

Həyat yükü ağrı dolu,

Qaldırıram, gücüm çatmır.

Yer də, göy də hava dolu,

Mənim isə havam çatmır.

Arzuların uzaq yolu,

Boylanıram, əlim çatmır.

Göydən ötür hava yolu,

Mənim isə havam çatmır.

Yorulmadım bilərəkdən,

Köks ötürüb ah çəkməkdən,

Nəfəs alır el ürəkdən,

Mənim isə havam çatmır.

Əl uzadıb ağ dumana,

Boy atıram asimana.

Sualım var Yaradana,

Mənim niyə havam çatmır?!

LEYLA

Hüsnünlə ətrafa nur paylayırsan,

Günəşin özündən yararlanırsan,

Zülflərin bənzəyir gur şəlaləyə,

Gözəlim, bəs adın Leyladır, niyə?

Leyla qaranlıqdır,

Leyla zülmətdir,

Sənə leyla demək bir cinayətdir,

Səni günəş verib yerə hədiyyə,

Gözəlim, bəs adın Leyladır, niyə?

Sən gecə deyilsən, sən gündüzümsən,

Qaranlıq deyilsən,

sübhün özüsən.

Zülmət özü möhtac bu gözəlliyə,

Gözəlim, bəs adın Leyladır, niyə?

Parla günəş kimi, dəniz tək çağla,

Verim ürəyimi qəlbində saxla!

Adın nə fərqi var? Qoy olsun Leyla!

Özün işıqlı ol! İşıq saç, Leyla!

Qoru məni

Sən qönçə güldən incəmsən,

Həzin mahnım, şən nəğməmsən,

Əzəlim sən, sonum sənsən.

Gəl boynumda həmayil ol, qoru məni!

Bu dünya qonaq evidir,

Kimi gəlir, kimi gedir.

Ömrüm sənə həvalədir.

Gəl boynumda həmayil ol, qoru məni!

Dərd selində boğuluram,

Zaman qaçır, mən qovuram,

İmdadı səndən umuram.

Gəl boynumda həmayil ol, qoru məni!

Ədalət 2017.- 27 iyul.- S.4.